یئنی قاپې Yeni Qapı یئنی قاپې، یئنی باخېش دېر تۆرک دۆنیاسېنا
دۏغا اؤزۆنه یئنی پالتار تیکیرسه، نه‌دن بیز اینسان‌لار بو دَڲیشیم، یئنی‌لَنمک و یئنی بیر یاشاما سلام وئرمه اۏلایېندا، اۏلایداش اۏلمایاق؟
بایرام گلدیڲینیده، اؤزۆ ایله یئنی‌لیک گتیریر و دۏغا اوزون بیر اؤلۆمدن سۏنرا، یئنی جان ألده إدیب، آیاغا قالخېر. بیز اینسان‌لارا أن بؤیۆک اؤرگتمن، إله هَمَن دۏغا دېر. هر اینسانېن یاشامېندا، سۏیوق، قارا و چتین بیر قېش اۏلا بیلَر، آنجاق قَلَم اؤز ألیمیزده دیر، ایستر شن‌لیڲه، یاشاما و دیری‌لیڲه پنجره‌سی آچېلان یازې یازاق، ایستر قارا قېش‌لارېن اؤنۆنده قېچدان دۆشۆب، بیر اودوزان شۏوالیه کیمی دیز چؤکَک!
کئچن ایلین بۆتۆن چتین‌لیک‌لریندن بؤیۆک درس‌لر آلدېق. بو یئنی ایلده، یاز ایله یئنی بیر یازقې یازمالې‌یېق؛ آیاغا قالخېب، یاشامېمېزداکې شَهَرین بۆتۆن کۆچه‌لرینی گؤزل-جانلاندېرېجې بۏیاق‌لار’لا بۏیامالې‌یېق. یئنی قاپې مئدیا یاواش-یاواش آلتېنجې یاشېنې بیتیریب، یئددینجی ایلینه آیاق باسېر. بو ایل‌لرین سۆره‌جینده چۏخ دَڲرلی یازارلار، شاعیرلر و بؤیۆک اینسان‌لاردان گؤزل أثرلر پایلاشدېق. سیزلر’له بیز اۏلدوق. أللی میلیۏن صفحه گؤرۆنۆشۆنۆ بیرلیکده آشدېق و سیزلره گۆوه‌نه‌رَک، گله‌جکده‌کی بؤیۆک آددېم‌لارېن گرچک‌لَشمه پلانېنا دۆشۆنۆرۆک. بیز آیرې سئچگی‌لیڲه قارشې شۆعارې ایله قاباغا گلدیک. قوسوروموز، یانلېشېمېز دا اۏلدو، آنجاق سیزلر’له اۏنلارې گۆنۆ-گۆندن آزالتماغا چالېشېرېق.
بو ایل، یئنی آدلار، أدبیات رَفیمیزه قاتېلاجاقلار و بئله داوام إتسک، یاخېن گله‌جکده، اۏ آرزېلادېغېمېز گله‌جه‌ڲی ألده إده بیله‌جه‌ییک. اۏ گؤزل گله‌جک اۆچۆن بۆتۆن خالقېمېزې اؤز یئنی قاپې‌لارېنا و أن باشدا آنا دیلیمیزین حاققېندا بۆتۆن چالېشان‌لارا دستک اۏلماق اۆچۆن چاغېرېرېق، نه‌دن کی بیزلر بیر اۏلورساق، یېخېلمایارېق، گۆجلۆ اۏلارېق!
بو سیز، بو یئنی ایل، بو دا اؤز یئنی قاپې‌نېز
Yazını bu əlifbada oxuyun: TÜRKCƏ
