بیری وار / فرهاد کدخدائی (شعر)

بیری وار / فرهاد کدخدائی (شعر)

دوستاق ایسه؛
میله‌لرین اۏ تایې……بو تایې
دۆنیا دۆشۆندۆکجه بیر اۏلترا لایت نۏت’لا
بیری وار یالوارماغا
بارماق‌لارېم أل‌لرینده
اولدوزلار دؤڲمه‌لَنیر بیر-بیر
گۆنش؛
ایچی بۏش طبیل
آیاق‌لارېمدان یاپېشېب گۆنَشه چېرپېرلار باشېمې
قوووه چېراغې’یلا سنی قاران‌لېق‌لاردان تاپا بیلمه‌دیڲیم اۆچۆن،
بیر یئریم گؤینه‌ییر
بلکه کؤکسۆمده‌کی مانیتۏردا تبلیغ یاراسې وار!
ساچ‌لارېوا یارالارېمې سار
اؤنملی‌یـَم
بیر دۆنیا
من
تانری‌نېن سؤزجۆڲۆ!

بیری وار دۆشۆنمه‌ڲه؛
باتېلې بیر قادېنېن کؤینه‌ڲی‌نین آلتېندا
گۆنَش‌سیز قالدېغېم زامان
بیری وار اینانماغا؛
دۏغولو بیر قېزېن یاناق‌لارېندا قېزارار
روحونو پایلایار ماکیاژ عملیات‌لارېندا

هاردا دېر اۏ؟!
أل‌لریم آنتئن‌لردن آسېلې
قاورام‌لار تئلئویزیۏن‌لاردا قوربان اۏلور
آخ، دئوریمچی‌لر،
بیر آن دایانماق گره‌کیر
دیل‌سیز و دین‌سیز!!
تۏپراقدان بایراق ایسته‌ییرَم
اینسان‌لېغېن ایتمیش ایزینی