یئنی قاپې Yeni Qapı یئنی قاپې، یئنی باخېش دېر تۆرک دۆنیاسېنا
آخشام اۆستۆ گؤزلرین / موصطافا شیخ‌پور (شعر)
(باجېم نسرین‌ین واخت‌سېز کؤچمه‌سینه)
هر صۆبح دۏغولورام سندن سۏنرا
یئنه گلمیشسن اؤنجه‌دن
هر صۆبح گۆلۆرم
هر صۆبح گۆلۆرسَن
تله‌سیرسَن
گۆنَش ترسینه دۏلانېر
کؤلگه‌لَریمیز گئت-گئده کیچیلیر
ناهار نامازلارېمېز قضا قېلېنېر هر گۆن
اۆزۆلۆرسَن
ناهاردان سۏنرا سئویرَم سَنی
هر ناهار سۏنراسې قوجاغېمدا
ساچ‌لارېوا تۏخانېرام
أل‌لریندن اؤپۆرَم
گئت-گئده بیتیر کؤلگه‌لر
سوسورسان
آخشام اۆستۆ گؤزلرین
هر آخشام اۆستۆ گؤزلرین
آخشام دېر گؤزلرین
یومورسان
هر گۆن ساعات کیمی
گئجیکیرَم
مندن اؤنجه گؤزلریوی
یومورسان
هر گۆن بئله یاشایېرام
گۆنَش ترسینه دؤنۆر
گئجه گۆن‌لریمه گیریر
و سن یئنه و سن هر گۆن اؤلۆرسَن
مندن اؤنجه تک باشېوا
آذر 1396 میانا-گۆنئی آذربایجان
