یئنی قاپې Yeni Qapı یئنی قاپې، یئنی بير باخېشدېر تۆرک دۆنیاسېنا
تۏپپوشوم / نیل‌آی عالی (اوشاق ناغېلې)
گۆلشَن آدېندا بیر قېز وار ایدی، اۏنلارېن إولری‌نین حیطینده اۆچ دنه گۆلدان وار ایدی؛ یازدا آناسې’یلا اۏنلارېن ایچینده گۆل أکردیلر، بیر گۆلداندا سارې گۆل، بیر گۆلداندا قېرمېزې و بیرینده ده مۏر گۆل‌لر أکردیلر. گۆلدان‌لاردان بیرآز اۏیان‌لېق بیر آلما آغاج‌لارې دا وار ایدی.
بیر قېش گۆنۆنده گۆلشَن إوده دارېخېردې، دوروب حَیَط‌لرینه چېخار، گؤرَر کی حَیَطین هر یانېنې قار توتوب، گۆلدان‌لارې‌نېن اۆستۆنۆ، آلما آغاج‌لارې‌نېن بوداق‌لارېنې، هر یئری قار اؤرتۆب. گۆلشَن قارې گؤرجَک دارېخماسې قاچېب، ایچینده سئوینجدن بیر قېشقېرېق چېخار، تئز قېرمېزې رنگلی کاپشئنی’یله آغ رنگلی چکمه‌لرینی آیاق‌لارېنا گئییب، حَیَطه گلیب باشلایار قار آدامې دۆزلتمه‌ڲه.
گۆلشَن قاردان آدام دۆزَلدنده، گؤرَر کی آلما آغاجې ترپه‌نیر و اۆستۆنده‌کی قارلارې یئره تؤکۆلۆر، باشېنې قۏوزایېب باخاندا، گؤرَر کی بیر دنه پیشیک آلما آغاجې‌نېن بوداق‌لارېندان حیطه آتیلدې، گۆلشَن دیکسیندی! ایسته‌دی کی إوه قاچا، آما گؤردۆ پیشیک آغاجېن یانېندا پارلاق سئویملی گؤزلری’یله گۆلشَنه باخېر، هله سۏنرا دا باشلادې مییولدایا-مییولدایا اؤزۆنۆ، آغاجا، گۆلدان‌لارا سۆرتمه‌ڲه، پیشیک یاواش-یاواش اؤزۆنۆ گۆلشَنه یاخېنلادېب باشېنې یاواشجا گۆلشَنین چکمه‌لرینه سۆرتدۆ، گۆلشَن پیشیڲی چۏخ-چۏخ سئودی، سۏنرا اؤز-اؤزۆنه دۆشۆندۆ؛ “اۏلمایا بو پیشیک چۏخ آجدې؟!” تئز قاچېب آناسېنا دئدی، آناسې گۆلشَنین سؤزلرینه قولاق آسېب بیرلیکده پیشیڲه یئمک گتیردیلر.
اۏ گۆندن سۏنرا پیشیک گۆلشَنین لاپ یاخېن یۏلداشې اۏلوب، هرگۆن گلیب گۆلدان‌لارېن بیری‌نین اۆستۆنده اۏتوروب، مییولدایا-مییولدایا گۆلشَنی گؤزله‌یَردی، گۆلشَن ده هرگۆن پیشیڲه یئمک حاضېرلایېب آپاراردې، گۆلشَنین پیشیگی‌نین إله اوزون یوموشاق تۆک‌لری وار ایدی کی اۆزۆ تۆک‌لری‌نین ایچینده ایتیردی بئلی‌نین اۆستۆنده ده زۏل-زۏل بۏز رنگده تۆک‌لری آیاق‌لارې‌نېن اۆستۆنه تؤکۆلۆردۆ، بیر ده یامان قارېنپا پیشیک ایدی؛ گۆلشَن نه یئمک آپارسا بیر گؤز قېرپېمېندا یئییب قورتارېب تۏپپوشلاناردې، إله اۏ اۆزدن ده گۆلشَن اۏنون آدېنې تۏپپوش قۏیموشدو.
گۆن‌لر بئله سۏووشوردو کی تۏپپوشدان بیر نئچه گۆن خبر چېخمادې، داها حَیَطده‌کی قارلار أریمیشدی گۆلشَن هرگۆن چېخېب تۏپپوشون یئمه‌ڲینی آلما آغاجې‌نېن یانېنا قۏیوردو، نه‌قَدَر گؤزله‌ییردی تۏپپوشدان خبر گلمه‌ییردی، گۆلشَن بیلمه‌ییردی نئینه‌سین! گئدیب آناسېنا دئدی:
-من نه‌قَدَر تۏپپوشا یئمک قۏیورام، تۏپپوش نه حَیَطه گلیر، نه قۏیدوغوم یئمک‌لری یئییر!!
آناسې دئدی:
-قېزېم ناراحات اۏلما إشیڲه چېخاندا کۆچه-باجایا یاخشې باخارېق گؤرَک تۏپپوش هاردادې!!
گۆلشَن و آناسې نئچه سئری قېوېر-زېوېر آلماغا إشیڲه چېخاندا، هر یئره باخدېلار بلکه تۏپپوشو گؤره‌لر، آما هر دؤنه گۆلشَن اۆزگۆن حالدا إوه قایېتدې…
گۆن‌لر بیر-بیری‌نین دالېسې’یجا گلیب کئچیردی، یاز گلیب یئتیشمیشدی، آغاج‌لارېن گۆل‌لری یاواش-یاواش آچېردې، گۆلشَن آناسې’یلا إشیکده گئدیردیلر کی بیردن گۆلشَنین قولاغېنا بیر مییولتو سسی گلدی!! دؤنۆب باخاندا، گؤردۆ دووارېن اۆستۆنده تۏپپوش یئریییر. گۆلشَن تۏپپوشو گؤرنده، چۏخ-چۏخ سئویندی! تۏپپوش دوواردان آتېلېب گلدی، باشلادې اؤزۆنۆ گۆلشَنین قېچېنا سۆرتمه‌ڲه، گۆلشَن سئوینجیندن اۏتوروب، باشلادې تۏپپوشو تومارلاماغا، بیردن قولاغېنا آیرې مییولتو سس‌لری ده گلدی، آناسې هیجان’لا دئدی:
-گۆلشَن باخ بورا گؤر نه‌لر وار؟!
گۆلشَن دؤنۆب باخاندا، گؤردۆ دؤرد دنه پیشیک‌بالا مییولدایا-مییولدایا تۏپپوشون یانېنا گلیر، گۆلشَن سئوینجیندن چېغېرېق آتېب گۆلدۆ. پیشیک‌بالالارې‌نېن هره‌سی بیر رنگده’یدی؛ بیری سارې، بیری آغ-قارا، ایکی‌سی ده تۏپپوش کیمی بۏز رنگده زۏل-زۏلویدو. گۆلشَن پیشیک‌لرین ایچینده سئوینجدن گۆلۆردۆ و اۏنلار’لا اۏینایېردې…
نیل‌آی عالی / 10 یاشېندا / تبریز / 18/04/2022
