یئنی قاپې Yeni Qapı یئنی قاپې، یئنی باخېش دېر تۆرک دۆنیاسېنا
گۆزگۆنۆن یادداشې یۏخ دېر…/ خیاله موراد
گۆزگۆنۆن یادداشې یۏخ دېر…
اوشاق‌لېغېنې، یئنی‌یئتمه‌‌لیک و گنج‌لیڲینی یادداشېندا ساخلایېب، نه واخت‌سا اؤزۆنده عکس إتدیرمه‌یه‌جک. أن خۏشبخت گۆنۆنده سئوینجدن بَزه‌نیب، ساچ‌لارېوې اۏخشایاراق گۆزگۆده‌کی عکسیوه تاماشا إدَرکن کئچیرتدیڲین عۆلوی حیسّ‌لری، قهردن بۏغو‌لاراق قارا قلمین هارا یایېلدېغېنې بیلمک اۆچۆن باخدېغېن أل گۆزگۆنده گؤرمه‌یه‌جَکسن.
گۆزگۆنۆن یادداشې یۏخ دېر… اۆزۆنده‌کی قېرېش‌لار گۆن کئچدیکجه گؤزۆنه باتاجاق، یاناغېنداکې چیل‌لر أحوالېوې کۏرلایاجاق. بیر آن‌لېق کئچمیشه قایېتماق، یئنی‌دن گنج و گؤزَل اۏلماق ایسته‌یه‌جَکسَن. اۆزۆوه إستئتیک تۏخانېش‌لار وئره‌جکسن، اؤزۆوۆ و یان-یؤوره‌نده‌کی‌لری گنج قالدېغېوا ایناندېرا بیله‌جک‌سن، لاکین ایل‌لر بیر-بیرینی قۏوالادېقجا بَدَنینده‌کی قېرېش‌لار اؤز سؤزۆنۆ دئیه‌جَک. گۆزگۆده‌کی عکسیوه تاماشا إدیب قات دۆشمۆش بئلیوه چاره آختاراجاقسان. گۆزگۆ حقیقتی عکس إتدیردیکجه اۏندان قاچماغا چالېشاجاقسان.
حقیقتدن قاچماق مۆمکۆن دَڲیل…
بونو ایسه چۏخ گئج آنلایاجاقسان!
گۆزگۆنۆن یادداشې یۏخ دېر… هر باخېشېندا روحووون عکسینی گؤره‌جکسن. قلبیوین درین‌لیڲینده ایز قۏیموش کَدَری گۆزگۆ لکه‌سی کیمی سیله بیلمه‌یه‌جک‌سن. بوخار آرخاسېندا گؤزدن ایتمه‌ڲه، سۏرون‌لاردان گیزلَنمه‌ڲه چالېشاجاقسان.
حقیقتدن گیزلَنمک مۆمکۆن دَڲیل…
بونو ایسه چۏخ گئج آنلایاجاقسان…!
گۆزگۆنۆن یادداشې یۏخ دېر… تک یومورتا‌نېن أکیزلری کیمی اؤز عکسیوه بنزه‌یه‌جَکسن. سن اۏنون، اۏ سَنین تکرارېن، کؤلگه‌ن اۏلاجاق. لاکین داورانېش، فیکیر، حتتا حیسّ‌لرین عئینی‌لیڲی سیزی واحیدلشدیرمه‌یه‌جک.
گۆزگۆنۆن یادداشې یۏخ دېر… گؤردۆک‌لرین بۆتۆنۆنۆن عکسی دیر. اۏرقان‌لارېن بئله یئرینی دَڲیشیب، اۆره‌ڲین ساغا، قارا جیڲَرین سۏلا، سۏل قولاغېن، سۏل گؤزۆن ساغا، ساغ قولاغېن، ساغ گؤزۆن سۏلا کئچیب. أل‌لرین ده باشقالارېندان فرق‌لَنمه‌مک اۆچۆن یئردَڲیشمه قانونونا تابئع اۏلوب، إوینده‌کی أشیا‌لار دا، گؤزۆوه فرقلی گؤرۆنۆر. حتتا دیققت إتسَن اۆز قارېشېغېن دا دَڲیشیب، قایدا-قانونا، مۆتناسیب‌لیڲه اویمور.
بئینینده یئنی فیکرین تۏخومو أکیلیر. جۆجه‌ریب جۆجرمه‌یه‌جه‌ڲی حرکت‌لری‌نین آردېجېل‌لېغېنا باغلې دېر: سن، گۆزگۆده‌کی سن اۏلماق ایسته‌ییرسَن!
گۆزگۆنۆن یادداشې یۏخ دېر…. لاکین سن تأکید’له گۆزگۆده‌کی سن اۏلماق ایسته‌ییرسَن! اۏ یئردَڲیشمه‌ڲه معروض قالا‌ن اۏتاقدا، کۆچه‌ده، شَهَرده، حتتا دۆنیادا یاشاماق ایسته‌ییرسَن. قۏجانېن جاوان، ایمان‌سېزېن ایمانا گلدیڲی، آجېن تۏخ اۏلدوغو، اؤلۆنۆن دیری، ساواشېن صۆلح، قارانېن آغ، “یۏخون” “هه” اۏلدوغو دۆنیادا… بو ایکی دۆنیانې آیېران تک شئی تضییقه داوام‌سېز، هر آن چیلیک-چیلیک اۏلاجاق گۆزگۆ دیر.
سن’سه یئنه ده گۆزگۆده‌کی سن اۏلماق ایسته‌ییرسَن!
گۆزگۆنۆن ایسه یادداشې یۏخ دېر…
بونو ایسه چۏخ گئج آنلایاجاقسان…!
