یانېت‌سېز سۏرغولار / فائضه بزرگان (حیکایه)

یانېت‌سېز سۏرغولار / فائضه بزرگان (حیکایه)

سَس‌لَندیرَن: آیهان میانالې

گؤزلریمی آچېب گئجه گؤردۆڲۆم یوخونو خاطېرلاماغا چالېشېرام، إله ایندی یادېمدایدې ها… بیر یاخشې یوخو ایدی!
یوخونو خاطېرلایا بیلدیم، آما اۏنون شیرین‌لیڲی ایچیمده بیر خۏش حیس یاراتمېشدې.
یاتاغېمدان قالخېب، یئریمی صافالتماغا تنبل‌لیک إله‌ییردیم.
دیلیمین اوجوندا «بیرآز سۏنرا گلیب یۏرقانېمی سلیقه‌یه سالارام» دئییب، چایدانې سو ایله دۏلدوروب، قاز اۆستۆنه قۏیدوم؛ حامامېن قاپې‌سېنې آچېب، بیر درین نفس آلاندان سۏنرا، اؤزۆمۆ سویون باغرېنا تاپشېردېم، اۆزه-اۆزه سویون درین‌لیڲینه گئتدیم، سودا اۆزَن بالېق‌لارا یاخېنلاشېب، ألیمی بیر بالاجا بالېغا سارې آپاردېم، بارماق‌لارېمېن آراسېندان زۆڲۆب قاچدې، آما قۏرخمامېشدې، منیم’له اۏینایېردې. بیر نئچه دؤنه ده ألیم ایله اۆزمه‌سی‌نین یۏنۆنۆ دَڲیشدیم، بالاجا بالېق دا، اۏنون’لا هَنَک إله‌ییرم دئیه، کیچیک ترپه‌نیش‌لری ایله یۏلونا داوام إدیردی.
اوشاق‌لېق ناغېل کیتاب‌لارېمېن بیری یادېما دۆشدۆ: «بالاجا قارا بالېق» اۏرداکې کیچیک بالېق دۆنیانېن ساده‌جه اۏنون یاشادېغې یئر اۏلمادېغېنې کشف إتمک اۆچۆن، یۏلا دۆشمۆشدۆ. بالاجا اۏلدوغونا باخمایاراق چۏخ اۆرَکلی و فیکیرلی بیر بالېق ایدی.
اۆزمه‌ڲه داوام إدیرم، هر جۆره بالېق سودا اۆزۆر، رنگ به رنگ، هره‌سی بیر شکیلده، بیر اؤلچۆده، اۏنلارا قارېشېب، اؤزۆمۆ سویا تاپشېرېرام. اؤزۆمدن سۏروشورام: گؤره‌سن بیر بئله چئشیدلی جانلې‌لار نه اۆچۆن یارانېبلار؟ بیزلر بونجا قاتماقارېشېق دۆنیانېن صاحاب دورولمایان چاغېندا، نه اۆچۆن یارانمېشېق؟!!
یانېت‌سېز سۏرغولار بئینیمی قورجالایېر…
سویون دیبی یوموشاق تۏرپاق ایدی. تۏرپاغېن اۆستۆنده یاتېرام، هر یئر سس‌سیزلیڲه بۆرۆنۆب، سو ایسه بیرآز ایستی دیر و قۏل‌لارېمېن آلتېندان سویون اینجه-اینجه یوخارې‌یـا حرکت إتمه‌سینی حیس إدیرم. بیرآز اؤزۆمۆ ترپه‌دیب، تۏرپاق‌لارې آیاق‌لارېم ایله دئشیرم، بونو بالېق‌لاردان اؤرگندیم. باشېمې ترپه‌دیب یوخارې‌یـا سارې، اۆزمه‌ڲه باشلایېرام…
باشېمې سودان چېخاردېب، نَفَسیمی إشیڲه وئره-وئره أل‌لریمی اؤنجه اۆزۆمه، سۏنرا ساچ‌لارېما چکیرم. سودان چېخېب، یئر-یئڲین دوش آلېب، قوروتقانا بۆرۆنۆرم.
بوگۆن چۏخ اۆزدۆم، ایندی سو قاینایار، گئدیم چای دمله‌ییم…