توتولارکن / علی نوروَش (چاغلا) (شعر)

توتولارکن / علی نوروَش (چاغلا) (شعر)

قاناد آچدېم اوچماغا،
قانادېمدان ووردولار.
آددېم آتدېم قاچماغا،
منی یامان یۏردولار.

یۏردولار، قاچانمادېم، –
تۆلکۆ‌لرین ألیندن‌.
ووردولار، اوچانمادېم،
سؤز چکدیلر دیلیمدن‌.

بو کامئرا چۏخ سۏیوق،
اۆشۆیۆرَم نئینه‌ییم؟!
بوردان خیلاص اۏلماغا،
دۆنَن لاپ آز قالېردېم،
سَنین آدېنې دئییم!..

توتولارکن سؤیۆلدۆم،
گئجه‌ گؤزۆ، یاتاقدا.
گؤزۆم باغلې دؤڲۆلدۆم،
بیر قاران‌لېق اۏتاقدا.

تکجه‌ من سؤیۆلمه‌دیم،
سؤیۆلدۆ جاوید بابام،
سؤیۆلدۆ مۆشفیق بابام.
دؤڲۆلدۆ، تاپدالاندې،
منیم دۏغما إل-اۏبام.

مۆشفیق بابام، باغېشلا،
سن دئیَن اۏلانمادېم.
کامئرادا اۆشۆدۆم،
عئشقیندن‌ سۏلانمادېم.

چیچک کیمی آچېلدېم،
سؤیۆلرکن آی بابام.
گۆنَش کیمی سا‌چېلدېم،
دؤیۆلرکن آی بابام.

دؤیۆلرکن دیلیمدن‌،
إعتیرافېم دۆشمه‌دی.
إعتیرافېم نه‌ ایدی؟
– وطن،
وطن،
وطنیم…
منی ساتان کیم ایدی،
کیم ایدی گؤرَن اۏر‌دا،
هارایېما یئتَنـیم؟!

منی ساتان دا ساتدې،
منی آلان دا آلدې،
اۏندان سۏنرا بیلمیرَم،
کیم‌لر قایدېما قالدې.

مۆشفیق بابام آغلادې،
“اۏخو تار”-دا چاغلادې،
جاوید بابام حالېما،
سئناریۏ باغلادې…

1400.01.03

Yazını bu əlifbada oxuyun: TÜRKCƏ