شالوار / سعید نجاری (یاشانمېش مینیمال‌لار)
دۆنن اوشاق‌لېق ایل‌لرینده گئیدیڲیم شالوارلاردان بیرینی آنبارداکې کؤهنه پالتارلارېن ایچینده گؤردۆم، اۏن بئش ایل اؤنجه‌یه قایېتدېم. بؤیۆک قارداشېمېن شالوارې ایدی، آرتېق اۏنون أڲنینه گلمیردی، بۆکۆلۆب ایشکافدا قالمېشدې. مندن اؤنجه قارداشېم اۏنو نئچه ایل گئیمیشدی. قارداشېم مندن اۆچ یاش بؤیۆک ایدی. اۏنون پالتارلارې‌نېن یارې‌سېندان چۏخونو من ده گئیَردیم. آنجاق آتام ایلده بیر دفعه منه بیر پارچا یئنی پالتار دا آلاردې.
اۏ شالوارې گئیمه‌ڲـه باشلادېغېم گۆنۆ یاخشې خاطېرلایېرام. مکتب‌لرین آچېلماسېنا اۏن گۆن قالمېشدې. بیرینجی صینیفه گئده‌جکـدیم.
رحمت‌لیک آتام ألینده شالوار، منیم یانېما گلدی.
«باخ، گۆل کیمی شالوار دېر، قارداشېن سلیقه‌لی دیر، شالوارې یاخشې ساخلایېب» دئییب، منه باخدې.
قاش‌قاباغېمې ساللادېم، هئچ نه دئمه‌دیم.
«باخ، اۏغلوم، سنه بایرامدا یئنی پالتار آلاجاغام، بونو بیر نئچه آی‌لېق گئی» دئیه، منی اۏووتماغا چالېشدې، سۏنرا دا باشېمې اۏخشادې.
اۏ شالوارې بیر ایل گئیدیم، سۏنرا أڲنیمه دار گلدی، داها گئیه بیلمه‌دیم. ایکینجی صینیفه گئدَنده آتام منه چتین‌لیک’له یئنی اوجوز بیر شالوار آلدې. آتام فهله’یدی…
