کؤچ / میرحسین دلداربناب (شعر)

کؤچ / میرحسین دلداربناب (شعر)

دور آیاغا گئدک، بیز گئتمه‌لی‌ییک
قۏرخا-قۏرخا یاشام، اؤلۆمدن پیس‌ دیر!
چکینه-چکینه نفس چکمه‌دن
ایچیمین هاواسې، دومان دېر سیس‌ دیر

سیزلری بیلمیرم! منه أل وئرمز
بئله بیر حیاتې، قوسماغېم گلیر
قېسېلا-قېسېلا یاشاماق نه‌دیر؟!
اؤلۆمۆ باغرېما باسماغېم گلیر!

ایچیمده بیر قوش وار، آدې «جان قوشو»
گؤڲ‌لرین هاواسېن، ایچمک ایسته‌ییر
کؤچه‌ری بیر قوش دېر، قفسه سېغمېر!
اۆره‌یی سېخېلېب، کؤچمک ایسته‌ییر

گئجه‌دن یۏرولوب، مین‌بیر گئجه‌ دیر
دارېخېر، هارایلېر، گۆنش چاغېرېر
سانکی بیر آنا دېر، اۏغول‌سوز قالېب
یارالې-یارالې نیسگیل باغېرېر!

دور آیاغا گئدک، بیز گئتمه‌لی‌ییک
قاطار-قاطار دورنا بیزی گؤزله‌ییر
بیر دوزلو دنیز وار، اۆره‌ڲی یانېر
آرازا بند اۏلان، کۆرۆ اؤزله‌ییر

بیلیرم بوگۆن‌لر من اؤله‌جه‌ڲم
کابوس‌لار یوخودا بۏغاجاق منی
مین گئجه مین گۆندۆز، کئچندن سۏنرا
دنیزلر بیر گئجه دۏغاجاق منی…

۱۴۰۲/۰۷/۰۹

#şeir #güney_azərbaycan_şairləri
#güney_azərbaycan_kişi_şairləri
#qüney_azərbaycan_şeiri #kişi_şairlər #klassik_güney_azərbaycan_kişi_şeiri #mirhüseyn_dildarbinab
#شعر #گۆنئی_آذربایجان_شاعیرلری
#گۆنئی_آذربایجان_کیشی_شاعیرلری
#گۆنئی_آذربایجان_شعری #کیشی_شاعیرلر
#میرحسین_دلدار_بناب #کلاسیک_شعرلر #کلاسیک_کیشی_شعری #کلاسیک_گۆنئی_آذربایجان_کیشی_شاعیرلری