یئنی یازې‌لار / Yeni Yazılar
آنا صفحه Ana Səhifə / آیهان میانالې / قۏرخو / آرتور کۏئستلئر (اؤلۆم’له‌ دانېشېق کیتابېندان)

قۏرخو / آرتور کۏئستلئر (اؤلۆم’له‌ دانېشېق کیتابېندان)

Qorxu-Artur Koestler-Ayhan Miyanalı -YeniQapi.com--
قۏرخو / آرتور کۏئستلئر (اؤلۆم’له‌ دانېشېق کیتابېندان)

چئویرن: آیهان میانالې

یوخودان اۏیاناندا ایشېق هله‌ چېرېلدایېردې، بیر سَس منی اۏیاتمېشدې. قولاق آسدېم، بیری‌سی اۏخویوردو، اۏخویان کیشی یقین کی، قارشېمداکې یالقان دوستاق‌لارېن بیرینده‌ ایدی. یاتاغېمدا اۏتوروب، اۆره‌ڲیمین دؤڲۆنتۆسۆنۆن دایانماسېنې حیسّ إتدیم؛ اۏ، اولوس‌لار آرا‌سې مارشې اۏخویوردو.

فالش و توتقون بیر سَس’له‌ اۏخویوردو، باشقا مَحکوم‌لارېن دا اۏنا قۏشولوب، اۏنون’لا سَس-سَسه‌ وئرمه‌‌لری‌نین گؤزله‌دیڲی آچېق-آیدېن دویولوردو، آما هئچ کیم اۏنون سَسینه‌ سَس وئرمه‌دی. اۏ، یال-یالقېز تک باشېنا گئجه‌نین تن اۏرتاسېندا، دوستاغېن یالقان‌لېغېندا اۏخویوردو.

دوستاق‌لار ایله‌ دایقاج‌لارېن حاققېندا گؤرگه‌له‌مه‌لر اۏخوموشدوم. بو یازې‌لار‌دا اولوس‌لار آرا‌سې مارشېن اۏخونماسېندان چۏخلو سیاسی إعتیراض و یا سۏنونجو های‌چېخېش کیمی سؤز آپارېلمېشدې. آما شهید‌لره اۏلان درین حؤرمَتیمه‌ باخمایاراق، هر زامان یازې‌لارېن بو حیصّه‌سینی مئلۏدرام‌یانا و ایمکان‌سېز حئسابلایېردېم، آما ایندی إعدام اۏلوناجاغېنې بیلن و اولوس‌لار آرا‌سې مارشې اۏخویان بیر آدامېن سَسینی اؤز قولاق‌لارېم’لا إشیدیردیم، بو هئچ ده‌ دویقویانا و یا قاباردېلمېش دَڲیل ایدی. توتقون بیر فالش سَس اۏلدوقجا آجېناجاقلې، هم ده‌ فلاکت‌لی گؤرۆنۆردۆ. سَس‌سیزلیڲین قایېدېشېنې أرته‌‌له‌مک اۆچۆن، بونو ایکی-اۆچ دؤنه‌ تکرارلایېب، اۏلدوقجا اوزون سۆرمه‌سینه‌ چالېشېردې.

آیاغا قالخېب، قاپې‌نېن آرخاسېندا دایاندېم. دیش‌لریم بیر-بیرینه‌ سۆرتۆشۆردۆ. سلام سیمگه‌سی اۏلاراق یومروغومو قالدېرېب، حیسّ إتدیم کی، یان-یؤورَمده‌کی بۆتۆن یالقان‌لېق‌لاردا باشقا‌لارې دا قاپې آرخاسېندا دایانېب، منیم کیمی جیدّی و سایقېنجا سلام سیمگه‌سی اۏلاراق یومروق‌لارېنې قالدېرېبلار.

اۏ اۏخویوردو، اۏنو قېرخېلمامېش داغېنېق اۆزۆ و شیکنجه‌‌لی گؤز‌لری ایله‌ قارشېمدا گؤره‌ بیلیردیم.

اۏخویوردو… سَسینی إشیدیب، باشېنا تؤکۆلۆب، اۏنو پارام-پارچا إده‌ بیلردیلر. اۏ اۏخویوردو… دؤز‌مه‌ڲه‌ گلَن دَڲیل ایدی، اۏنو حدسیزجه‌ سئویردیک.

آما هئچ بیریمیز اۏنون سَسینه‌ سَس وئرمه‌دیک، قۏرخو اۏلدوقجا گۆجلۆ ایدی.

چئوری سؤزلۆڲۆ:
یالقان دوستاق: سلول انفرادی
دایقاج: بازداشگاه
های‌چېخېش: تظاهرات

یازار / Yazar : آیهان میانالیAyhan Miyanalı

بو یازېنې دا اۏخویون /Bu Yazını da Oxuyun

آزادلېغېن دوروشوغو / آیهان میانالې (کؤشه یازې)

آزادلېغېن دوروشوغو / آیهان میانالې (کؤشه یازې)   آزاد‌لېق هر کس اۆچۆن فرقلی بیر اۏلای، …

Leave a Reply

Your email address will not be published. Required fields are marked *