یئنی قاپې Yeni Qapı یئنی قاپې، یئنی باخېش دېر تۆرک دۆنیاسېنا
آدسېز شعر! / امین حاجیلو (شعر)
یالنېزلېغېمېن
دووارېنا دېرماشان حۆزون‌لریم’له حیات‌دان فراگمئنت‌لر سوندوم
بیر:
قادېن ایچه‌ری گیرَر، کیشی یاتمېش
ایکی: کیشی قادېنېن ساچېنې اۏخشار
اۆچ: قادېنېن قارنې بورنوندا
دؤرد: یالنېزلېق قېز اوشاغې دېر ایکی دۆنیا آراسېندا
باغېشلایېن حایاتدا قالدېنېز
من روحومو شئیطانا ساتېب قارشې‌سېندا کۏکاکولا آلدېم
و بیر پنجره
ایچیمه آچېلان
ایچیمده چؤمبَلمیش ساغېر سَسیزی دینله‌ین
قارشې‌سېندا قولاق‌لارېمې وئردیم
سئومک سئوگینی فالش اۏخوماق دېر
هر “أک”دن سۏنرا دیل قایداسېندا گیزله‌نر
سئو آما أک قۏیما
نه ایسه
پنجره‌دن باخدېم
باخماق گؤزۆ ایمگه‌یه داشېماق دېر
جَهنّم
جَهنّم‌ده باخماق جَهنّم‌دن باخماغېن قارشې‌سېندا
سنه باخماق سندن باخماغېن قارشې‌سېندا
شاعیر مجهول فاعیل ایمیش أسکی زامان‌لاردا
سۏنرا جاهیل فاعیل اۏلدو
ایندی مفعول دور (قاه قاها)
باغېشلایېن
حایاتدا، قالدېنېز
(اۆسته‌لیک ویرگول حایات و قالماق آراسېندا بیر قېز اوشاغې قدر معصوم و شئیطان دېر)
من اؤلدۆم
آما اؤنجه روحومو شئیطانا ساتدېم
اؤلمک فعل دَڲيل دیر، فعلین بیتیشی دیر
بوردا هارداسا بیر حایات گیزلی دیر
یاشانسا ایدی قیامت
یاشانمادې، یئنه قیامت آما فالش سس’له
منده بیر حیات گیزلی دیر
یالنېزلېغېمېن دووارېنا دېرماشان حۆزون‌لریمین اۏرتاسېندا
سنده بیر حیات گیزلی دیر
قارنې بورنوندا
