گئج قالا‌ن کئشکه‌‌لر / آیدا شهباززاده (حیکایه)
آرتېق اۆچ ایل اۏلاردې کی سۏنا، یۏلداشې آیدېنې ألدن وئرمیشدی. اۏنون بو دۆنیادان کۆچمه‌سی، اۏلدوقجا عاییله‌سینی سارسېتمېشدې.
سۏنا ایله آیدېن اوشاق‌لېقدان بری قۏنشو ایدیلر و اۏ زاماندان بیر-بیرینی سئویردیلـر. بخت اۏنلارې بیرلَشدیردی، آما تئز ده آیېردې. اۏ گۆندن سۏنرا هئچ بیر شئی سۏنانېن خیال‌لارېنداکې یاشام کیمی اۏلمامېشدې، آما اۏ اؤزۆ آیدېنا بیر سؤز وئرمیشدی:
اوشاق‌لارې اؤز حلال زحمتی’له، گۆجۆ چاتدېغې قدر أن دۆز شکیلده بؤیۆده.
اؤزۆ تک باشېنا بئله إدیردی ده. بۆتۆن بو ایل‌لر سۆره‌سینده بیر دؤنه ده اۏلسون بئله اۏنلارا حرام تیکه یئدیرتمه‌ییب، باشقا‌لارېنا ایسه مؤحتاج إتدیرمه‌میشدی.
سۏنا یاشام یۏلداشېنې ألدن ورنده چۏخ گه‌نج، اوشاق‌لارې دا چۏخ کیچیک ایدیلر. چېنار 6، آراز ایسه 4 یاشې وار ایدی. یازېق اوشاق‌لار آتا‌لارېندان هئچ دۏیمامېشدېلار، بیر یان‌لارې یارېم اۏلاراق بؤیۆیۆردۆ‌لر.
سۏنا خالچاچې‌لېق ایشلیه‌رَک اۏن‌لارېن باشېنې دۏلاندېرېردی. اۆسته‌لیک هئچ بیر یئردن آرېق گلیری اۏلمازدان بو ایشی یرینه یئتیریردی. بو یاشا قدر بعضی أشیا‌لارېنې ساتاراق اوشاق‌لارې بؤیۆتمۆشدۆ. نه قدر آنا اۏنلارې هر شئی’له تعمین إتسه ده، یئنه ده آتالارې‌نېن یئری گؤرۆنۆردۆ.
عاییله چۏخ چتین گۆن‌لری کئچیردیردی. بیر گۆن مدرسه‌ده اۏلارکن چېنار آناسې‌نېن یانېنا گله‌رَک دئدی:
-آنا جان، مدرسه‌ده بایرام شن‌لیڲی کئچیریله‌جَک و من گئیینمه‌ڲه پالتارېم یۏخ دېر. من ده بو شن‌لیڲه گئتمه‌ڲی گرچکدن چۏخ ایسته‌ییرم!
سۏنا جاواب وئرمزدن بیر سۆره دۆشۆندۆ. سۏن زامان‌لار عاییله‌نین قایغې‌لارې داها دا آرتمېشدې. إوین سو-برق خرج‌لری، آی‌لېق أرزاق‌لارا وئریلن پول‌لار، إوین آی‌لېق کیرایه پولو و باشقا خرج‌لری.
آما بونلارېن هامې‌سېنا باخاراق، اۏغلونا یۏخ سؤزۆنۆ ده دئیه بیلمَزدی. نئجه یۏخ دئیه بیلردی آخې!
چېنار اۏغلو بو قدر هَوَس’له حاضېرلاشماق ایسته‌ییردی.
ألیندن گلدیڲی قدر اۏن‌لارېن ایستک‌لرینی یئرینه یئتیرمه‌ڲی اؤزۆنه بۏرج بیلیردی.
-سۏنا: یاخشې، گؤزَل بالام، سنه شن‌لیک گئییمی آلاجاغام.
چېنار سئوینجک اۏلوب آناسېنې اؤپدۆ.
سۏنانین، سۆرمه آدېندا اۏنون’لا یاشېت تای بیر قۏنشوسو واری ایدی.
اۏنون’لا دردلشیب، هر سؤزۆنۆ اۏنا دانېشاردې. قۏنشودان چۏخ سۆرمه اۏنا باجې اۏلموشدو. داییم اۏنا یاردېم إدیب، دایاق اۏلاردې.
گۆن‌لرین بیرینده سۆرمه باجې سۏنا گیلین قاپېسېنې دؤڲدۆ.
-سۆرمه: سلام.
-سۏنا: خۏش گلیب‌سن، باجې، بویور، ایچه‌ری.
بیر آز صؤحبَت‌لشندن سۏنرا سۆرمه باجې دئدی:
-سۏنا جان، سن’له باغلې یئنی بیر خبریم وار.
-نه اۏلوب، نه خبری؟
-قۏرخما، ناراحات اۏلوناجاق بیر شئی دَڲیل. دئمه‌لی، منیم عمیم اۏغلو نئچه ایل دیر کی، اؤز یاشام یۏلداشېنې ألدن وئریب. ایکی اوشاق’لا تک قالېرلار. دۆز دیر، آناسې، قایېن آناسې یاردېم إتسه ده، آرتېق اۏنلار دا یاشلا‌نېبلار، چۏخ أذيّتی چکه بیلمیر‌لر. کئچن گۆن مندن سنی سۏروشدو. عاییله حایاتې قوروب-قورمادېغېنې اؤرگنمک ایسته‌دی. سَنین نئجه تربییه‌‌لی، غئیر‌تلی خانېم اۏلدوغون هامېیا معلوم دېر. عمیم اۏغلو شخصَن سنین’له تانېش اۏلماق ایسته‌ییر. أڲر ایسته‌سن، من واسیطه‌چی اۏلا بیله‌رم. اۏ دا چۏخ یاخشې اینسان دېر.
-سۏنا: نه دئدیڲیوی باشا دۆشۆرَم، سۆرمه باجېم. آللاه هر ایکیمیزین ده یاشام یۏلداشېنا رحمت إتسین، آما من بو تکلیفی قبول إده بیلمه‌رَم.
آیدېندان باشقاسېنې سئوه بیلمه‌رَم، رحمته گئتمه‌میشدن اؤنجه اۏنون اؤزۆنه ده سؤز وئرمیشَم، “عئشقیمیزین صاف قالماسې اۆچۆن ألیمدن گله‌نی إده‌جه‌ڲم” دئدیم. اینجیمه مندن، سۆرمه باجېم، نه‌ینکی سَنین أمین اۏغلو، بلکه هئچ کیمین تکلیفینه “هه” دئیه بیلمه‌رَم، بونو مندن گؤز‌له‌مه‌ڲین. بو واختا قدر جمعی بیر اینسانې سئومیشَم، اۏ دا آیدېن دېر.
-سۆرمه: سۏنا جان، سنی باشا دۆشۆرَم. بلکه بیر آز دۆشۆنمه‌لیسن.
-سۏنا: یۏخ، سۆرمه باجېم، هئچ جۆر اۏلوناسې ایش دَڲیل. هر نه‌دن اؤنجه اؤزۆم راضې دَڲیلم، چېنار ایله آراز دا آرتېق یاواش-یاواش بؤیۆیۆر‌لر، هر شئیی آنلایېرلار، اینانمېرام کی، اۏنلار دا بو مسأله‌یه خۏش باخا‌لار.
-سۆرمه: یاخشې، سۏنا جان، اۏلدو، هله‌لیک.
هاوا‌لار یاواش-یاواش یاخشېلاشماغا باشلایېردې. آرتېق قېش چۏخدان سۏنا چاتمېش دېر. یازېن آیاق سَس‌لری إشیتمک اۏلاردې.
چېنار مدرسه‌ده ایدی. همین گۆن چېنارېن مۆعَللیمی، اوشاق‌لارې باشېنا یېغمېشدې. اۏنلارا دئدی:
-” اوشاق‌لار، یئنی ایل شن‌لیڲینده بیر ایش‌لر گؤره‌جه‌ییک. هر کسه رۏل‌لار وئره‌جه‌ڲم. سیز رۏل‌لارا عایید جۆمله‌لری أزبرله‌ییب، صحنه‌ده اۏینایاجاق‌سېنېز.”
اوشاق‌لار هامې‌سې چۏخ سئویندیلر. مۆعَللیم هامې اوشاق‌لارا رۏل‌لارې تقدیم إتدی. سېرا “قار کیشی” ده ایدی. مۆعَللیم بو رۏلو چېنارا سوندو. قوتلاما گۆنۆ گلیب چاتدې. آرتېق اوشاق‌لار صحنه‌ده ایدیلر. هر کسین عاییله‌سی گلمیشدی. چېنارا دا دستک اۆچۆن آناسې ایله قارداشې گله‌جَک ایدیلر.
آما آناسې هله گلمه‌میشدی. تدبیرین سۏنو یاخېنلاشېردې، چېنارېن گؤزۆ قاپېدا ایدی، آما آناسې’یلا قارداشې هله ده گؤزه گؤرۆشمۆردۆلر. آرتېق شن‌لیکده اۏلان هر کس-مۆه‌لیم‌لر، عاییله‌لر، اؤرگنچی‌لر- اوشاق‌لارې آلقېشلاماغا باشلادېلار. بۆتۆن عاییله‌لر اوشاق‌لارې‌نېن یانېنا گلدیلر، چېنار ایسه تک باشېنا قالدې. چۏخ آغرې‌لې بیر مَنظَره یارانمېشدې.
تدبیرین قوتلاما بیتمه‌سی‌نین اۆزه‌ریندن آرتېق ایکی ساعات کئچمیشدی. سۏنانېن باشې ایشینه اۏ قدر قارېشمېشدې کی، چېنارېن قوتلاما تؤره‌نینی بۆتۆنلۆک’له اونوتموشدو. بیر آن یادېنا دۆشدۆ و چۏخ اۆزۆلدۆ.
إله اۏ آن إوین قاپېسې دؤڲۆلدۆ. آناسې اۏغلونون قېزارمېش گؤزلرینی گؤردۆڲۆنده اۆره‌ڲی پارام-پارچا اۏلدو.
سۏنا: گؤزَل اۏغلوم، باغېشلا منی، باشېم ایشه اۏ قدر قارېشمېشدې کی، سنی تامامی’یله اونوتموشدوم.
-چېنار: ایشین مندن اؤنملی ایدی؟ من اۏرا‌دا یالقېز اۏلدوغومو حیسّ إتدیم. هامې اؤز عاییله‌سینی قوجاقلایېب اؤپدۆ. من ده اۏنلارا باخېردېم.
-سۏنا: إله دئمه جان پارچام. من ده سیزدن اؤترۆ چالېشېرام، ایشله‌ییرَم. ایشه باشېم قارېشمېشدې، سؤز وئریرَم بیر داها بئله اۏلمایاجاق.
-چېنار: کئشکه آتام ساغ اۏلاردې، اۏ منی سَنین کیمی تک قۏیماز ایدی.
سۏنا بو سؤز‌لرین قارشې‌سېندا چاره‌سیز قالدې. نه دئیه‌جه‌ڲینی بیلمه‌دی.
اۏغلونون دئدیک‌لری اۏنو چۏخ اۆزدۆ.
آرادان بیر نئچه ساعات کئچدی. سۏنا اۏغلونون اۆره‌ڲی‌نین أله آلماغېنې باجارمېشدې.
چېنار آناسې‌نېن نه قدر أذيّت چکدیڲینی بیلیردی. اۏنا قارشې داها چۏخ حاق‌سېز‌لېق إده بیلمَزدی.
همان گۆن گئجه چېنار یوخوسوندا آتاسېنې گؤرۆر. گؤرۆر کی، آتا‌سې اۏن‌لارېن یانېنا گله‌رَک دئییر:
-” گؤزَل بالا‌لارېم، من همیشه سیزین’له‌یم. بیر-بیرینیزی سئویب، اینجیتمه‌یین. ألبتّه، بیر گۆن گؤرۆشه‌جه‌ییک.”
چېنار یوخوسوندان چۏخ إتکی‌لندی. دۆز دیر، اۏ تئز-تئز بئله یوخولار گؤرَردی، آما نئچه واخت دېر کی، آتا‌سې یوخوسونا گیرمیردی.
سَحَر یئمک یئینده چېنار دئدی:
-آنا جان، گئجه یوخومدا آتامې گؤردۆم. منه هر زامان بیزیم’له اۏلدوغونو و بیر گۆن گؤرۆشه‌جه‌ڲیمیزی، دئدی. اۏنون اۆچۆن چۏخ دارېخمېشام، نه اۏ‌لار بوگۆن اۏنون زییارَتېنه گئد‌ک.
-آراز: آتام منیم ده یوخو‌لارېما گلیر، عئینی سؤز‌لری ده دئییر. هر دؤنه دارېخاندا اۏنو یوخومدا گؤرۆرَم. سانکی حیسّ إدیر. بونون’لا دا یالقېز اۏلمادېغېمېزې بیزه بیلدیریر..
-سۏنا: گؤزَل بالا‌لارېم، کسگین‌لیک’له کی یالقېز دَڲیل‌سینیز. آتانېز جیسمَن بیزیم’له اۏلماسا دا، روحو هر زامان یانېمېز‌دا دېر.
سۏنا، چېنار ایله آرازې گؤتۆرۆب یاشام یۏلداشې‌نېن زییارَتینه گئتدیلر. دوعا‌لار اۏخویوب، دردلَشدیلر.
-آراز: آتا جان، سَنین اۆچۆن چۏخ دارېخمېشام. یئنه سنی یوخومدا گؤردۆم. دئدیڲین هر سؤزه عمل إده‌جه‌ڲم، عاییله‌نین کیشی‌سی اؤزۆم اۏلاجاغام.
سۏنا گؤز یاشې ایچینده بو مَنظَره‌یه باخېردې. اۏغلونون بالاجا اۏلماسېنا باخمایاراق، بئله عاغېللې اۏلماغې اۏنو غرورلاندېرېردې. آغزېندان اوشاق‌لارې اۆچۆن اۆرَکدن دئدیڲی “چۏخ شۆکۆر” کلمه‌سی چېخدې. اینانېردې کی، هئچ زامان تک قالماز، یاشلا‌نسا دا، اوشاق‌لارې کسگین‌لیک’له اۏنا صاحاب چېخاجاقلار.
چتین اۏلسا دا، یاشام داوام إدیردی…
صاباح‌لار گۆنَش دۏغوب، هئچ بیمزدن گۆندۆز سۏنا چاتېب، باتېدان باتېردې… فصیل‌لری بیر-بیر یۏلا سالېردې… سۏنا و عاییله‌سی چتین اۏلسا دا، یاشاماغا داوام إدیردیلر. بو زامانا قدر بیر-بیر‌لرینه دایاق اۏلموشدولار. سۏنا گئجه-گۆندۆز چالېشېب، اوشاق‌لارېنې مین بیر زحمت’له اۏخوتدورموشدو.
آرتېق چېنار بیل‌یور‌دا گئتمک اۆچۆن سېناق کئچیرتمیشدی. بو گۆن سېناغېن سۏنوج‌لارې بَلیرلنه‌جک ایدی. هر کسین هیجانې اۆزۆند‌ن بللی ایدی.
-سۏنا: گؤزَل اۏغلوم، نه اۏلدو؟
-چېنار: بیر آزدان آد‌لار گله‌جَک.
بو دانېشماق اۆزه‌ریندن 5 دقیقه کئچمه‌دی کی، جاواب چېخدې. چېنار تئهرانېن دؤولت بیل‌یوردوندان طیبّ ساحه‌سینده قبول اۏلموشدو. عاییله‌ده هئچ کیمین سئوینجی‌نین سېنېرې یۏخ ایدی.
-سۏنا: چۏخ شۆکۆر سنه، آللاه! بالامېن زحمت‌لری یئرده قالمادې. جانېم اۏغلوم، سنی اۆرَکدن تبریک دئییرم، هر زامان باشې اوجا یاشایاسان، آتاوېن روحونو شاد إتدین.
-چېنار: چۏخ ساغ اۏل، آنا جان، اۆزه‌ریمده أذيّتیم چۏخ دېر، حاققېنې اؤده‌یه بیلمه‌رَم..
بو سؤز‌لری دئیَرک آناسې‌نېن أل‌لریندن اؤپدۆ.
آراز دا قارداشېنې تبریک إتدیکدن سۏنرا عاییله‌جه آتالارېنې زییارَت إتمک اۆچۆن یۏلا چېخدېلار. أصلینده، اۏنو تئز-تئز زییارَت إدیردیلر، آما بو گۆن اۏ بیری گۆن‌لردن داها اؤنملی ایدی.
چېنار آتاسې‌نېن قبرینه یاخېنلاشېب، اۏنون’لا اوزون صؤحبَته باشلادې…
و بئله‌لیک’له بو اۏلایدان ایل‌لر کئچدی…
ایش‌لَییردی ده، دَرسینی اۏخویوردو دا.
بو ایل‌لر سۆره‌جینده آراز دا مۆهندیس‌لیک بیل‌یوردوندان قبول اۏلدو. بو گۆن اۏ عسگرلیڲه گئده‌جکدی. سۏنا سئوینجلی ایدی ده، اۆزۆلمۆشدۆ ده، موتلویدو دا، اۏلدوقجا دا غرورلویدو، اۏنا گؤره کی، وطن اۆچۆن بیر اۏغول بؤیۆتمۆشدۆ. کدر‌لی اۏلماغې‌نېن نه‌دنی ایسه اۏنون گؤزۆندن اوزاقدا قالماسې ایدی.
آراز آرتېق حاضېر ایدی. بیر آزدان یۏلا دۆشه‌جکدی. سۏنا ایسه اۏغلونا باخاراق إله هئی آغلایېردې.
-آراز: آنا جان، قوربان اۏلوم آرتېق آغلاما. باخ، گؤر من نئجه شرف‌لی و اۏنورلو بیر ایشین آرخاسې’یجا گئدیرم.
-سۏنا: إله دئمه، گؤزَل بالام، آللاه إله‌مه‌سین، من سنه قوربان…سن‌سیز‌لیک چتین اۏلاجاق… آما یۏلووو حَسرَت’له گؤزله‌یه‌جه‌ڲم.
سۏنا اۏغلونا خئییر-دوعا وئردی. قۏهوم‌لار، دۏست‌لار آرازې یۏلا سالماق اۆچۆن اۏن‌لارېن إوینه یېغېشمېشدېلار. سۏنوندا گئتمک واختې گلدی…
بیر ایل سۏنرا هر کس آرازې ساغ-سلامت قایېتدېغې اۆچۆن گؤز آیدېن‌لېغېنا گلمیشدیلر.
-سۏنا: اۏغلوم، شۆکۆر کی، ساغ-سلامت گلدین.
-چېنار: جانېم قارداشېم، چۏخ دارېخمېشدېم سَنین اۆچۆن…
قوجاقلاشېب گؤرۆشنده‌ن سۏنرا إوه کئچدیلر. آراز عسگر‌لیک خاطیره‌لریندن دانېشماغا باشلادې…
بو اۏلایدان بیر هفته سۏنرا آیدېنېن ایل دؤنۆمۆ ایدی. عاییله سَحَر چاغې اۏنون مزارې‌نېن زییارَتینه گئتدیلر. داها سۏنرا سۏنا إوینده إحسان وئردی. قفیلدن قاپې دؤڲۆلدۆ. گلَن آیدېنېن عمی‌سی نوه‌سی ایدی. اۏنلار چۏخ زنگین بیر عاییله ایدیلر.
سلام، خۏش گؤردۆکدن سۏنرا، کیشی دئدی:
-” سۏنا خانېم، بیلیر‌سن، آیدېن ایله بیز اوشاقېقدان بری بیرلیکده بؤیۆمۆشۆک. بیر-بیریمیزه قارداش اۏلموشوق. اۏنون یۏخلوغو ایله هله ده بارېشا بیلمیرَم… اؤزۆ کیمی اۏنون عاییله‌سی ده منیم اۆچۆن چۏخ دَڲر‌لی دیر. قرارا آلمېشام کی، اوشاق‌لارېنا یاخشې گله‌جَک بخش إتمک اۆچۆن اۏنلارې اؤزۆم’له بیرلیکده تئهرانا آپارام. ایسته‌سن، سن ده گل.”
-سۏنا: من هئچ جۆر بورانې قۏیوب گله بیلمه‌رَم. اوشاق‌لار اۆچۆن ده چۏخ ناراحاتام. ایکیسی ده گؤزۆمدن اوزاقدا، یاد بیر یئرده… هئچ ایستمه‌رَم.
-کیشی: سۏنا باجېم، سن هئچ ناراحات اۏلما. من ده، عاییله‌م ده اۏن‌لارېن یانېندا اۏلاجاغېق. گؤز‌لریم ده اۏن‌لارېن اۆستۆنده دیر… هر ایکی‌سینه یاخشې ایش تاپارام، پول قازانارلار، اؤز‌لرینه یاخشې گله‌جَک قورارلار.
سۏنا آغلایاراق: “اوشاق‌لار’لا اؤزۆن دانېشارسان، گؤرَک فیکیر‌لری نه اۏلاجاق؟” دئدی.
-کیشی: باش اۆسته. آما سن ده آغلاما سۏنا باجېم، عؤمۆرلۆک گئتمیرلـر کی… دانېشارسان هر گۆن اؤز‌لری ایله… بیر مۆدّت سۏنرا تزه‌دن قایېداجاقلار.
-سۏنا: اینشاء‌الله!!!
سۏنا اؤزۆ ده بیلیردی کی، عاییله‌نین دورومو چۏخ یاخشې دَڲیل. چېنارېن قازانجې آز ایدی، اؤزۆنۆن ده عئینی، اۆسته‌لیک آراز عسگرلیکدن تزه گلمیشدی. اؤزۆنه ایش تاپماغې چۏخ واخت توتاجاق ایدی. اوشاق‌لارې کیمه’سه أل آچمایېب، اؤز آیاق‌لارې اۆزه‌رینده دورماق‌لارېنې چۏخ ایسته‌ییردی. بو اۆزدن قبول إتدی.
کیشی اوشاق‌لار’لا دانېشدې، اۏنلار دا سئوینیب، قبول إتدیلر.
اۆچ گۆن سۏنرا اوشاق‌لار کندی ترک إده‌جک ایدیلر.
سۏنوندا زامانې گلدی… سۏنا آغلار گؤز‌لر’له اوشاق‌لارېنا باخېردې.
-چېنار: آنا جان، نه اۏ‌لار، آغلاما. اینشاء‌الله تئز-تئز دانېشاجاغېق. اۏرا‌دا عمییه أمانتیک بیز.
-آراز: اؤزۆمۆز اۆچۆن یاخشې شراییط قورما‌لې‌یېق. بونون اۆچۆن ده چۏخ چالېشما‌لې‌یېق. اۆزۆلمه، آنا جان، کسگین‌لیک’له، گؤرۆشه‌جه‌ییک.
-کیشی: گؤزۆن آرخادا قالماسېن، سۏنا باجې، اؤز اوشاق‌لارېم کیمی باخاجاغام اۏنلارا.
سۏنانېن گؤز یاش‌لارې دایانمېردې. سۏنا گؤزۆنۆ سیله‌رَک اوشاق‌لارا سارېلېب، سۏنراسې آرخا‌لارېیجا سو تؤکدۆ.
گۆن‌لرین یئرینی گئجه‌لر، گئجه‌لرین یئرینی گۆندۆزلر آلدې.
سۏنا اوشاق‌لارې اۆچۆن چۏخ دارېخېردې. اۏنلار گئده‌‌لی تام 6 آی اۏلموشدو. دۆز دیر، هردن دانېشېردېلار، آما دانېشماق’لارې اؤنجه‌کی کیمی دَڲیل ایدی. سۏنا إله دۆشۆنۆردۆ کی، اوشاق‌لارې‌نېن باشې قارېشېب، یا دا آرتېق اۏنو ایستمیرلـر.
هر آخشام بونلارې دۆشۆنۆردۆ. اؤزۆنۆ یالقېز حیسّ إدیردی. آیدېن دا یۏخ ایدی، چېنار ایله آراز دا.
گۆن‌لرین بیرینده سۏنا اوشاق‌لارې ایله دانېشارکن دئدی:
-: سیزین اۆچۆن دارېخمېشام. نه زامان گله‌جَک‌سینیز؟
-چېنار: هله گلمک فیکریمیز یۏخ دېر. اۏخویوروق.
-آراز: گلمه‌میز اوزون زامان آلاجاق.
صؤحبَتدن سۏنرا سۏنا چۏخ اۆزۆلمۆشدۆ. اوشاق‌لارې‌نېن سؤز‌لری اۏنو دویقولاندېردې. اؤز-اؤزۆنه دئدی: “کئشکه گئتمک‌لرینه ایذن وئرمزدیم. هر ایکیسی ده یانېمدا، گؤزۆمۆن قاباغېندا اۏلاردېلار. حیسّ إدیرم کی، آرتېق منی اؤنجه‌کی‌لر کیمی ایسته‌میرلـر، آختارمېر‌لار.”
سۏنا دۆشۆنجه‌لرینده حاق‌سېز اۏلماق ایسته‌ییردی، آما حاقلې ایدی. اۏنلار سانکی آنالارېنې اونوتموشدولار.
سۏنا گۆنۆ-گۆندن گۆجدن چۏخ دۆشۆردۆ. نئچه گۆن اۏلموشدو کی، اوشاق‌لار’لا دانېشمېردې. سۏن زامان‌لار دا آنجاق اؤزۆ اۏنلار’لا زنگ إدیردی. و بئله قرارا گلدی کی، اۏنلار زنگ إتمه‌سه‌لر اۏ دانېشمایاجاق.
اوشاق‌لارېن گئتدیک‌لری ایکی ایل یارېم اۏلموشدو. سۏنا اؤز گۆجۆ ایله دۏلانېردې. اوشاق‌لارېندان اؤترۆ چۏخ دۆشۆنۆردۆ. اۏنسوز دا یاشام یۏلداشېنن یۏخلوغو قلبینده یارا ایدی. ایندی ده اوشاق‌لارې‌نېن بئله اۏلماسې اۏنو چۏخ إتکی‌لَندیریردی. دارېخماقدان چۏخ اۆزۆلمۆشدۆ. بئله اۏلاجاغېنې هئچ دۆشۆنمۆردۆ. چۆنکۆ اوشاق‌لارېن صادیق‌لیڲینه گۆوه‌نیردی. اوشاق‌لارې‌نېن یادېنا دۆشنده آیدا بیر یا ایکی دؤنه دانېشاردېلار.
کندین بیر پایېز گۆنۆنده، سَحَر ساعات‌لارې ایدی. قۏنشو سۆرمه باجې سۏنانېن قاپېسېنې بئش دقیقه دؤڲدۆ. دۆشۆندۆ کی، هارا‌دا دېر گؤره‌سن. بو ساعاتدا ایشه گئتمز. إودن باشقا بیر یئره ده گئتمز. بس نییه قاپېنې آچمېر؟؟!!
قۏنشولوقداکې اوشاق‌لارې یاردېما چاغېردې. قاپېنې آچېب، ایچه‌ری‌یه گئتدیلر. سۏنانې آختاردېلار. اۏ یئرینده یاتمېشدې. نه قدر چاغېر‌سا‌لار دا، اۏندان سَس چېخمېردې. هئچ بیری اۏنون اؤلۆمۆنه اینانماق ایستمیردیلـر. آما اۏ دۆنیادان کؤچمۆشدۆ. سۆرمه باجې گؤز یاش‌لارېنې ساخلایا بیلمیردی. بیر سۆره سۏنرا اؤزۆنۆ تۏپارلایېب، چېنار ایله آرازا خبر وئرمه‌ڲه دۆشۆندۆ.
اوشاق‌لار إشیتدیک‌لرینه اینانا بیلمه‌دیلر. آنالارې‌نېن یۏخلوغونا هئچ جۆر اینانمادېلار. نئجه اۏلا بیلردی آخې؟!
آتالارې‌نېن یۏخلوغو ایله بارېشمازدان آنا‌سېزمې قالمېشدېلار! سۏنا اۏنلارې تک باشېنا بوراخمېشدې!
هر ایکیسی ده بیر-بیرینه سارېلاراق آغلادېلار. آنالارېنې سۏن منزیله یۏلا سالماق اۆچۆن کند‌لرینه گلمه‌ڲه یۏلا چېخېب، سۏنوندا، اۏرا چاتدېلار. مزارېن یانېنا یاخېنلاشاراق هؤنکۆرتۆ ایله آغلادېلار. هر ایکیسی اۏلدوقجا پئشمان ایدیلر. آنالارېنې بوراخېب گئتمک’له‌رینه گؤره، اۏنو ایتیریب-آختارمادېق‌لارېنا گؤره، سۏن نفس‌لرینده یانېندا اۏلمادېق‌لارېنا گؤره… اۆرَک‌لرینده‌کی “کئشکه‌‌لر ایله…”
بَنزَرگه‌لر / Bənzərgələr
کئشکه بو یوخودان تئز اۏیانام! / آیدا شهباززاده (حیکایه)
سئوگی‌نین اؤزگۆرلۆڲۆ / آیدا شهباززاده (حیکایه)
ایکی یاشلې کؤرپهنین آجې حیکایهسی / واریث یۏلچویئو…
قار دنهلری / آیناز بزرگان (حیکایه)
ایلان / رحیم علییئو (حیکایه)
جزا / سئوینج إلسئور (حیکایه)
بوز / اومان میانالې (حیکایه)
یالقېز إو / سحر روحی (حیکایه)
قایېدېش / إسمیرا حۆسئینلی (حیکایه)
