یئنی قاپې Yeni Qapı یئنی قاپې، یئنی باخېش دېر تۆرک دۆنیاسېنا
گئجه دۆشۆنجه‌سی / میکایېل مۆشفیق (شعر)
خۏشلادېغېم بیر گئجه، یئرلر، گؤڲ‌لر ایشېقلې،
آی بیر سرخۏش گؤز کیمی، اولدوزلار یاراشېقلې.
بونلارې سئیر إدرکن
بیر آز فیکره گئد‌رکن
فیکریم، حیسّیم، خیا‌لېم اۏ قدر یۆکسلدی کی،
منه اؤیله گلدی کی،
بیز‌لردن أوّل نه یئر، نه گؤڲ، نه حَیات اۏلموش،
نه بو اوجسوز-بوجاق‌سېز گؤزَل کایینات اۏلموش…
گئجه ساکیت… دۆشۆنجه‌م ساکیت دَڲیل دیر فقط،
گؤزلریمین اؤنۆنده جانلاندې بیر حقیقت.
خیا‌لېم أنگین‌لره اۏ قدر یۆکسلدی کی،
منه اؤیله گلدی کی،
ایلک دفعه دیر کایینات-
دۆنیانې سئل‌لرینده چالخایان بیزیم حَیات
ساغدا، سۏلدا دؤڲۆشمۆش،
سۏنرا یۏلونا دۆشمۆش.
نه دایانماق واختې دېر، گؤزَل دۏستوم، سن ده گل!
سئیر إده‌لیم قۏل-قۏلا بو زۆمرۆد چمنده گل!
گؤڲ اۆزۆنه بیرجه باخ، هر اولدوز بیر سارې گۆل،
یارې غنچه، یارې گۆل.
سنی گؤردۆم، خیا‌لېم اۏ قدر یۆکسلدی کی،
منه اؤیله گلدی کی،
بیزه بو ناز‌لې عالَم گؤرۆنَردی قاران‌لېق،
گؤزَل چارپېشماسایدېق، گؤزَل یاشاماسایدېق.
خۏشلادېغېم بیر گئجه، یئرلر، گؤڲ‌لر ایشېقلې،
آی بیر سرخۏش گؤز کیمی، اولدوزلار یاراشېقلې.
بونلارې سئیر إدرکن،
بیر آز فیکره گئد‌رکن،
فیکریم، حیسّیم، خیا‌لېم اۏ قدر یۆکسلدی کی،
منه اؤیله گلدی کی،
بیز‌لردن أوّل نه یئر، نه گؤڲ، نه حَیات اۏلموش،
نه بو اوجسوز-بوجاق‌سېز گؤزَل کاینات اۏلموش…
