بیر شَهَر گؤرۆرَم یوخولارېمدا
قارانلېق کۆچهلرینده شۆشهسی آچېق بوراخېلمېش بۏش ماشېنلار
دووارلارېندا قان ایسپرئیی ایله یازېلمېش غضبلر
پۏلیسلرین ایشلری یۏخ دېر غضبچیلر’له
ایسپرئی ساتانلارې آختارېرلار
و میللتین قانېنې سۏروب میللته باهاسېنا ساتان ایسپرئیچیلر
أللرینده تاپانچا، چیڲینلرینده پارلایاراق اولدوزلار
کۆچهلرده ایت کیمی فېرلانېب آختارېرلار جاناوارلارې…
بیر شَهَر گؤرۆرَم یوخولارېمدا
مجنون دَڲیشیب جینسيَّتینی
آه لئیلا، لئیلا، لایلای’لا، لایلا…
فرهادې وازئکتۏمی إلَتدیریب خۏسرۏو
شیرین کۆلۆنگ گؤتۆرۆب قازېر بیستونو
لئیلی نَجدین دۆزلرینده مجنونلاشمېر، لئزبییَنلَشیر…
کۏراۏغلو دؤردنالا چاپسا دا آتېنې چنلی بئلده
نیگارېن گؤزلریندن شهوت یاغېر مِئترۏ دوراغېندا.
ساغ ألی ایله آچېر گؤزۆنۆ ایللر دیر تاریخدهکی حیلهکار کۏر حَسَن
سۏل ألینده ایسپرئی، دووارا طرف قاچېر.
آغامحمّدی کۏر إلهییر اۏتوز مین سارې کیرمانا بنزر کیرمانلېلار
ماحمودو آختالایېر ساغ یانېندا دایانمېش آیاز
بابکین قۏللارېنې دَڲیل، ساچېنې وورورلار گۆلۆستان سارایېندا
کئچل حمزه شۆشهسی آچېق بوراخېلمېش بۏش ماشېنلارې اۏغورلایېر کۆچهده
باشېنا تۆک أکدیرمک اۆچۆن.
صاباح أحمدین باشېنا پاپاق کئچیردهجکلر، تاج عَوَضینه.
بیر شَهَر گؤرۆرَم یوخولارېمدا
زینجیر کیمی بیر-بیرینه باغلانمېش ساوادلېلار
باخمازدان کئچیرلـر دردین اؤنۆندن.
صادیق قازې آچېب اینتیهار إلهییر شهری
رامیزین چیڲنینده چانتاسې
اؤزۆنه بیر یئنی وطن دۆزلتمهڲه گئدیر.
غلامرضانې خستهخانادان قاچېردېر آروز اۏغلو باسات
لوایی، شیکاقۏدان بۏیلانېر خۏجانېن رنگبهرنگ داغلارېنا
آینالار زامانېن قېرېشمېش آلنېنې هَدَفه آلېر
دومانېن گؤزلۆڲۆنۆ اۏغورلایېرلار کافهدهکی دۏستلارې
گؤردۆکلرینی گؤره بیلمهسین.
یۏخ، عۆذۆرلۆ سایېن عزیز شَهَرداشلار
یازا بیلمهسین گؤردۆکلرینی.
آیېن پنچر اۏلموش تکرینی دَڲیشدیر’سه ده
قادېنلارېن طرفینده دایانېر چالغېن.
هر ایل آپرئلده، شَهَریمین پاریس آدلې خیابانېندا
گۆللـهلَییرلر نرگیسین ایچیندهکی مئریلین مۏنرۏنو…
واریثین گؤندَردیڲی مکتوبون إرمنیلر ألینده یاندېرېلدېغېنېن خبرینی آلېرام پۏست ایدارهسیندن.
بلدییه باشقانې “شهرین گؤزَللیڲی” وئریلیشیندن سۏنرا
گئجهلر ماشېندان دۆشۆب دووارلارا ایشهییر.
غضبلر آخېر سۆدۆڲه قارېشمېش قانلې دووارلاردا
صاباحدان تاریخی ترسینه اۏخویاجاق مکتب اوشاقلارې
خیاباندان کئچرکن…
– عزیز ایزلهییجیلر، حؤرمتلی بلدییه باشقانېنېن حالې چۏخ پیس ایدی، نۏبَتی یوخولارېنېزا قدر، ساغ قالېن!..
یئنی قاپې Yeni Qapı یئنی قاپې، یئنی باخېش دېر تۆرک دۆنیاسېنا


