یئنی قاپې Yeni Qapı یئنی قاپې، یئنی باخېش دېر تۆرک دۆنیاسېنا
ننه‌مین اونودولماز خاطیره‌سینه / شلاله جوانشیر (آنلاتې)
أل‌لری أل‌لریمین ایچینده ایدی. أل‌لری‌نین سیجاق‌لیغېنې حیسّ إدیردیم. باشېمې چیڲنینه سؤیکه‌میشدیم. بو ساعاتدان سۏنرا داها اۏنو گؤرمه‌یه‌جه‌ڲیمی دۆشۆنۆردۆم. یانېمدایکن اؤزله‌ییردیم. ساعات ۱۱ ایدی. دۏکتۏردایدېق هله نؤوبه‌میز چاتمامېشدې. ننه‌م اوصولجا دانېشماغا باشلادې: “یوخو گؤرمۆشَم بالا، کیمسه‌یه بو یوخونو سؤیله‌مه‌میشَم. بو یوخونو ساخلا یادېندا اونوتما!” دئدی.
ننه‌م یوخوسونو آنلاتدېقجا قلبیم سېخېلېردې. گؤز‌لریمدن آخان یاشې، ننه‌مین گؤرمه‌سینی ایسته‌میردیم.
ننه‌مین آنلاتدېغې یوخونو کیمسه‌یه آنلاتمامېشام هله. بیر سیر کیمی آرامېزدا قالېر. بعضن ننه‌می یوخودا گؤرۆب اۏنون’لا رؤیا‌دا دانېشېرام. آنجاق سانکی هئچ رؤیا دَڲیل، هر شئی گرچک کیمی گؤرۆنۆر. بیر آن گؤزلریمی آچارکن هر شئی سیلینیب گئدیر گؤزلریمین اؤنۆندن.
اېنسان هئچ بیر زامان سئودیڲی اینسانې اونودا بیلمیر. بو، اینسانېن فیطرَتینده وار اۏلان بیر سیر دیر.
ننه‌مین اینانج‌لارېندان بیری یوخولارې ایدی. یوخو‌لارېن نه‌دن‌سیز اۏلمادیغېنې دۆشۆنۆردۆ. گؤردۆڲۆمۆز یوخولارې یۏزاردې دیققت’له دینله‌یه‌رک. “ننه، یوخو گؤرمۆشۆک؟” دئدیڲیمیزده ننه‌م “آللاه خئییر إیله‌سین!” دئییب یوخوموزو آنلاتمامېزې ایستَردی. ننه‌م “آدام یوخوسونو هر کسه آنلاتماز. یوخونو آنلاتدېغېن آدام اؤنجه “آللاه خئییر إیله‌سین!” سؤیله‌مه‌‌لی دیر. بوندان سۏنرا یوخو آنلادېلار. بو سؤزۆ دئمزسه، یوخونوزو آنلاتماما‌لې‌سېنېز” دئیَردی. ننه‌م اۆچۆن اینانج اؤن سېرادا گلیردی. بو اۆزدن ده هئچ بیر زامان تانرې‌یا اۏلان سئوگی‌سی أکسیلمه‌دی.
دوعا‌لار’لا تانرې’یلا اؤزۆ آراسېندا بیر باغ اۏلوشدورموشدو. ننه‌مین تانرې’یلا دانېشېق‌لارېنې چۏخ سئوردیم و اۏنون بو دانېشېق‌لارېنې ایزله‌مک چۏخ تأثیر‌لی ایدی.
هر کس اۆچۆن دوعا إدردی، آنجاق هئچ بیر زامان گۆنتایا اۏلان دوعاسېنې اونوتمازدې. رسیم‌لرینه باخاراق اۏنو اؤزلردی. کئچمیشده قالمېش خاطیره‌لریندن دانېشاردې بیزه.
ننه‌م دۏغانې چۏخ سئو‌ردی. دۏغا‌دا اۏلان یارار‌لې بیتکی‌لری تانېیاردې. اۏنلارېن نه‌لره یارایاجاغېنې بیلیردی. بیتکی‌لر حاققېندا بیزه بیلگی وئرَردی. “تۆرکه چاره” تجرۆبه‌لرینی بیز‌لر’له پایلاشار تأثیر‌لی اؤیۆد‌لر وئرَردی.
یاشامېن سۏنو ایسه، اؤلۆم’له بیتیر. بیر گۆن اؤلۆم هر کسین سۏراغېنا گلیر. کؤکسۆ خاطیره‌لر’له، بایاتې‌لار’لا، تاریخ’له دۏلو اۏلان ننه‌میزی ده اؤلۆم بیزدن آلدې. ایندی آرتېق ننه‌م تۏرپاغېن آلتېندا دېر. إویمیزده یئری بۏش گؤرۆنۆر. هر طرفدن اۏنون خاطیره‌لری، نورانی صیفتی بۏیلانېر. اۏنون یوخلوغونا آلېشا بیلمیریک. هر بیریمیزین ایچیمیزده سانکی هَمن قانایاجاق اۏلان بیر یارا وار. إوده هر کسین اۆزۆنده و داورانېشېندا غم دالغالانېر. اۏتوردوغو یئرده اۏنو گؤرمک ایسته‌ییریک. گؤزَل تۆرکچه‌سی ایله بیزه بایاتې‌لار سؤیله‌مه‌سینی، خاطیره‌لر آنلاتماسېنې، اۏغلونون حَسرَتیندن کؤنلۆنده دالغالانان کدری آنلاتما‌لارېنې اؤزله‌ییریک. اولوسال وارلېغېمېزېن آنې‌لارې ننه‌‌لریمیزین گؤزَل آنلاتې‌لارېندا نه قدر سیر‌لی و جاذیبه‌لی گؤرۆنۆر. سۏنسوز بیر سئوگی عالَمی، مَعنوییاتدا دۆنیاسې ایدی ننه‌میز.
۲۰۱۲/۰۱/۰۶
آینې گۆن، ساعات: ۱۳:۲۸
