سسیندن…./ آیسو مختاری
سسینده اینله‌ییر بیر پایېز خزل
بیر چېلپاق گرایلې، بیر عیصیان غزل
سسین اۆره‌ڲیمه اؤیله کی اؤزل
سسیندن بیر قوجاق پای گؤندر گۆلۆم
هارای اااا دؤنۆرم ، های ااا دؤنۆرم
کؤنۆل آسمانېندا آی ااا دؤنۆرم
دنیزه چئوریلیب … چای ااا دؤنۆرم
سسیندن بیر قوجاق پای گؤندر گۆلۆم
سسین’له کؤنۆله باسېلان سازام
نـه‌قدر چۏخالسام یئنه ده آزام
أشهدی، حَمدی یۏخ سېنېق نامازام
سسیندن بیر قوجاق پای گؤندر گۆلۆم
سسینده صوفی‌یم! دؤنه‌نم … اوجاللام
گؤڲ‌لرین اولدوزون سنه باج آللام
سسیوی چۏخ گؤرسن… اینان قۏجاللام
سسیندن بیر قوجاق پای گؤندر گۆلۆم
سسین قوربتیم‌دیر، سسین تبریزیم
سسین بولاق باشېم، سسین کهریزیم
من آخی اۏ سس‌سیز دئ نئجه دؤزۆم
سسیندن بیر قوجاق پای گؤندر گۆلۆم
سسینده نبی وار، سسینده هجر
وطن قېزلاری وار، گؤز سۆزر کئچر
سسین بایاتېم‌دېر! درین، مۆختَصر
سسیندن بیر قوجاق پای گؤندر گۆلۆم
سسین ایلدېرېم‌دېر آل شاخار کئچر
کؤنلۆمه درد اۏخون، یان تاخار، کئچر
بیر گئدر، بیر دؤنر، بیر باخار کئچر
سسیندن بیر قوجاق پای گؤندر گۆلۆم
آیسو مختاری
