یئنی قاپې Yeni Qapı یئنی قاپې، یئنی باخېش دېر تۆرک دۆنیاسېنا
ایبلیس – حۆسئین جاوید / نرمین ریضا (کؤشه یازې-تحلیل)
جاوید أفندییه دۏغونون شئکسپیری دئییرلر. آما منه گؤره اۏ، إله بیر زیروه‌ده دیر کی، شئکسپیر ایچره، هئچ کیم اۏ زیروه‌یه قالخا بیلمز. جاوید إله بیر دَریا دېر کی، یانلېز أنگین دَریا‌لاردا آزماغا جسارَتی اۏلان‌لار اۏنو آنلایار… چۏخ حئییف وطنیمیزین بئله بیر دۆهاسېنې قۏرویا بیلمه‌دیک. آما اۏنون یارادېجې‌لېغېنې، ایرثینی قۏروماق، رئکلام إتمک أن بؤیۆک بۏرجوموز دېر.
یازاۏی‌دا حادیثه‌لر بیرینجی دۆنیا مۆحاریبه‌سی عَرَفه‌سینه تصادۆف إدیر. مۆحاریبه‌نین دهشتی، اینسانېن وحشی‌لیڲی، قان گؤلۆنه دؤنمۆش بشرییَّت… بس گۆناهکار کیم دیر؟ ایبلیس؟ یا اینسانېن اؤز نفسی؟
أثرین باش قهرمانې عاریف، دۆشۆنن، سۏرغولایان، رۏمانتیک روحلو بیر گنج دیر. مۆحاریبه‌نی، اینسانداکی وحشی‌لیڲی پیسله‌ییر، لعنت‌له‌ییر. بونا گؤره اۏنو دیوانه بئله آدلاندېرېر‌لار. باشلار‌دا ایبلیسین سؤز‌لرینه آلدانمېر، اۏنو یانېندان قۏوور. آما سۏندا…
سۏندا سئودیڲی قېزې ألده إتمک اوغرونا ایبلیسه آلدانېر. أ‌لی سئودیک‌لری‌نین، أن سۏنوندا اؤز دۏغما قارداشې‌نېن قانېنا بولاشېر. فرقینده اۏلمازدان جاناوارا دؤنۆشۆر.
جاویدین ایبلیسی أصلینده اینسانېن اؤز نفسی، اۏنون ایچینده‌کی قاران‌لېق طرفی دیر. هر اینسانېن ایچینده خئییر’له یاناشې، شر ده وار.
باخېن سیز هانسې طرفینیزه قولاق آسېب، اۏنو بسله‌ییرسیز…
