ألده قایېرما چیچک‌لر / بولود قاراچۏرلو (سهند)

ألده قایېرما چیچک‌لر / بولود قاراچۏرلو

آلتونلوجا ناخېشلې،
آغ گۆلداندا بیر دسته.
ألده قایېرما “چیچک”
قۏیولموش میزین اۆسته.
یام-یاشېل یارپاق‌لارې
آغ، قېرمېزې، بنفشه،
نه سو، نه قایغې ایستر
آرسېز-آرسېز، تپ تزه!
اوزون ایل‌لر کئچسه ده
دوروب یاشایاجاقلار.
رییاکار طراوت’له،
هله ده قالاجاقلار.
کیمسه نه دئییر، دئسین،
نه سؤیله‌ییر، سؤیله‌سین.
یۏخ!
نه سوووزوندان اؤلن،
نه عطیر ساچا بیلن،
بو پیلاستیک‌لری من
چیچک سانا بیلمیرم.
من بزک-دۆزک‌لری،
گؤزل‌لیک سانانمېرام.
گؤزل‌لیکدن نه رنگه،
نه شکله آلدانمېرام.
نه سئون، نه سئویلن،
نه اوموب کۆسمک بیلن،
نه یاشاماق آنلایان،
نه ده کی، اؤلمک بیلن.
جان‌سېز تؤر-تؤکۆنتۆلر،
گۆلمۆ، چیچک‌می اۏلار؟
گۆل کمال دېر، حیات دېر،
هم آچار، هم ده سۏلار!
بو، گۆل دَڲیل، اؤلۆم دیر،
آلدانېش دېر، دهشت دیر.
یۏخ، اۏنا اؤلۆم دئسم،
اؤلۆمه أهانت دیر.
اۏلسون! اؤلۆمده سۏلماق،
چۆرۆمک دهشتی وار.
و لاکین تۏخوم اۏلماق،
جۆجرمک قۆدرتی وار.
نه قېزارېب سارالماق،
نه آچېلماق، نه سۏلماق،
نه اوتانېب، قېپچېنماق،
محبت تانېماماق
گۆلمک بیلمه‌ین‌لرده
قهبه‌لیک صیفتی وار.

 بولوت قاراچورلو

تهران 1353/1/13