قاطار‌داکې آدام / کامال عبدالله (حیکایه)
قاطار یاواش-یاواش حرکته گلدی. دریندن سیلکه‌لَنیب اۆرَکدن فیت وئردی و آلایارېمچېق فنر ایشېغېنا بۆرۆنمۆش بو زاواللې دوراقدان هَوَس’له سېیرېلېب چېخاراق گئجه‌نین ظۆلمت قاران‌لېغېنا بۆرۆنمۆش چؤللۆ-بییابانا کئچمه‌ڲه باشلادې.
بورا قدر من کوپه‌ده تک ایدیم. قاطار یۏلا داوام إدنده سئویندیم کی، کوپه‌یه قۏنشو گلمه‌دی. آما سئوینجیم اوزون چکمه‌دی. بیر قدر رئلس‌لرین بیر‌نَسَق سَسینی إشیتدیکدن سۏنرا کوپه‌نین قاپې‌سې بایېر طرفدن دارتېلماغا باشلادې. بیر-ایکی اوغورسوز یؤندن سۏنرا، نهایت، قاپې هۆجم’له یانا، اؤز یوواسېنا دۏغرو شاققېلتې’یلا یۏل إدیب آچېلدې. اوزون بۏیونا باخمایاراق ایکی‌قات اۏلموش یاشلې بیر کیشی ألینده یۏل سبَدی ایچه‌ری کئچدی:
– سلام. آخشامېن خئییر.
– سلام…
من مۆمکۆن قدر چالېشدېم کی، سَسیمده‌کی اۆزۆنتۆ دویولماسېن. بونا ناییل اۏلدوم، یا اۏلمادېم، بیلمک اۏلماز، آما یئنیجه گلمیش بو قۏنشوم منیم “سلام”ېمدان سۏنرا سولانمېش گؤزلری’له ظن’له، بیر قدر ده تعجّۆب’له منه باخدې.
قاطار گئتدیکجه سۆرعتینی آرتېرېردې. پنجره‌دن اۏ طرفده‌کی زیل قاران‌لېق رنگه بۆرۆنمۆش چؤللۆ-بییابان قارا دلیک کیمی قاطارې اؤز ایچینه سۏووروب اودماقدا ایدی. إله بیر گئجه دۆشۆردۆ کی، إله بیل، اؤز یئرینی أبدیيَّن قۏرویوب ساخلاماغا گلمیشدی.
منیم یئریم آلت قاتدا ایدی. قۏنشوم ألینده‌کی سبَدی بیردفعه‌یه قالدېرېب کوپه‌نین یوخارې مرتبه‌سینده‌کی أشیا‌لار اۆچۆن نظرده توتولموش بۏشلوغا ایته‌لَدی. سۏنرا بو آهېل کیشی قوش یۆنگۆللۆیۆ ایله سېچرایاراق منیم’له اۆز-به-اۆزده، آما یوخارېداکې یئرینه، ألبتّه کی، أل‌لری’له بَدَنینه دیرسک وئریب آتېلېب اۏتوردو، إله اۏتوردوغو یئرده‌جه فېرلانېب اۆزۆ کوپه‌یه دؤندۆ. سۏنرا بو کیشی باشلادې سۏیونماغا. ایلک اؤنجه پئنجه‌ڲینی چېخارتدې. کمالی-قابیلییَّت’له شالوارېنې سۏیوندو. قاطار‌دا تئز-تئز زامان کئچیردن آدام‌لارا خاص سلیقه ایله اۏنلارې یاتاغېن آشاغې طرفینده‌کی آسېلقانا کئچیردی، أ‌لی ایله سېغاللایېب، نهایت، یئرینه اوزاندې. بۆتۆن بونلارې عادت‌إله‌میش شکیلده، چۏخ بؤیۆک بیر یئتکین‌لیک’له إتدی. اۏنو مۆشاهیده إله‌مک ماراقلې ایدی. بو آدام، إله بیل، قاطار‌دا یاشاماق اۆچۆن دۏغولموشدو. أصل قاطار آدامې ایدی. اۏنون هر بیر حرکتی قاطارېن رئلس‌لرده چېخارتدېغې “تاق-تاراق” سَسینه هم‌آهنگ ایدی. آز قالا بیر آدام بۏیدا اۏلان واقۏن تَکَر‌لری‌نین بیر‌نَسَق سَسی اۏنون بَدَنی‌نین اینجه و کۏبود تیتره‌ییش‌لری‌نین ایفاده‌سینه چئوریلیردی. یا دا عکسینه…
قۏنشوم یاتاقداکې نازیک و آلابَزک پتونو اۆستۆنه چَکدی. باشې‌نېن آلتېندا‌کې آلچاق یاستېغې أ‌لی ایله بیر نئچه دفعه دۆمسۆکله‌دی و بۆتۆن بونلاردان سۏنرا بیر “آه” چکیب اۆره‌ڲی‌نین درین یئریندن گلَن آه’لا بیرگه بو سؤز‌لری دئدی: “یا غریب ایمام ریضا…”. سۏنرا کوپه ساکیت‌لیک ایچینده أریدی.
واقۏن تَکَر‌لری‌نین بیر‌نَسَق سَسی آیدېن شکیلده إشیدیلمه‌ڲه باشلادې: تاق-تاراق-تاق-تاراق…
من یئریمین ایچینه گیریب اۏرا-بورا چؤنه‌رَک بَدَنیم’له سۏیوق یاتاغې قېزېشدېرماغا و صاباحا قدر هئچ اۏلماسا گؤزلریمین آجې‌سېنې آلماغا چالېشدېم. بیر مۆدّت کئچدی. تَکَر‌لرین یئک‌نَسَق تاققېلتې‌سې قولاغېما آز قالا لایلا کیمی گلمه‌ڲه باشلایاندا یوخارېدان قۏنشومون خئیلَک گۆمراه سَسی إشیدیلدی:
– دئییرسن، محبّت دۆنیا‌نېن أن گؤزَل نعمتی دیر؟ بئله دئدین ده سن؟!
من آرتېق یومولماقدا اۏلان گؤزلریمی زۏر-گۆج آچدېم. قۏنشومون “ایمام ریضا”سېنې خاطېرلادېم و بئینیمدن بونلار کئچدی: “محبّت باره‌ده دانېشماق اۆشۆن بوندان داها نامۆناسیب واخت تاپماق مۆمکۆن اۏلمازدې… بئله ده ظۆلم اۏ‌لار؟! و هم ده! من نه زامان بو آنلام‌سېز سؤز‌لری دئدیم، یا غریب ایمام ریضا؟!”
– من سنی آنلایېرام. – قۏنشوم اۆچۆن منیم اۏنو دینله‌ییب-دینله‌مه‌مه‌ڲیمین بیر فرقی یۏخ ایدی. – من سنی گؤزَل آنلایېرام… چۏخ آدام بئله دۆشۆنۆر. آما اینان منه، بئله دَڲیل. یوخون گلمیر’سه، سنه بیر أحوالات دانېشېم. إعتیراضېن یۏخدو کی؟!
من آنجاق سۆکوتدان عیبارت جاوابېم’لا إعتیراض إده بیلردیم. بئله بیر إعتیراضېن ایسه قبول إدیله‌جه‌ڲینه اومودوم یۏخ ایدی. منیم جاوابېمې هئچ کیم گؤزله‌مه‌دی.
– اۏ ایلین باهارې قایسې، گیلاس، ویشنه آغاج‌لارې‌نېن آغ چیچک‌لرینه بۆرۆنۆب بر-بَزَکلی گلین کیمی گلمیشدی…
ایلک جۆمله منی نئجه توتدوسا دیققتیمی تۏپلادېم.
– من رایۏن مرکزینده‌کی مکتبیمیزین سۏنونجو صینفینده اۏخویوردوم. گله‌جَک پلان‌لارېمې قوروردوم، اۏن‌ایل‌لیکدن سۏنرا هانسې عالی مکتبده نئجه اۏخویاجاغېمې بئینیمده گؤتۆر-قۏی إدیردیم. صینفیمیزده‌کی ایدبار رازی ایله بؤیۆک-بؤیۆک شهر‌لره گئده‌جه‌ڲیمیزی، گؤزَل-گؤزَل یئرلری گزه‌جه‌ڲیمیزی، سئویب-سئویله‌جه‌ڲیمیز گؤزَل-گؤیچک قېز‌لارې آغېز لَذَّتی’له هر آخشام حَیَطیمیزین قاباغېندا اۏتوروب گؤتۆر-قۏی إدیردیک.
صینفیمیزین بۆتۆن اۏغلان‌لارې بیر ایل، ایکی ایل بوندان أوّل هانسې’سا قېز‌لارا وورولموشدو‌لار، بعضی‌لری سئویب سئویلیردی، بعضی‌لری محبّتدن یانېب قۏورولوردو. من و ایدبار رازی سئوگی پایېمېزې بؤیۆک شَهَره، عالی مکتبه ساخلایېردېق.
رئلس‌لردن گلَن یئک‌نَسَق “تاق-تاراق” سَسی آرتېق إشیدیلمیردی.
– اۏ قېز بیزیم مکتبیمیزه اۏنونجو صینیفده گلدی. عائله‌سی’یله باشقا رایۏندان کؤچمۆشدۆلر. اۏنو قۏنشو صینفه یئرلشدیردیلـر. من اۏنو ایلک دفعه مکتب دَهلیزینده گؤرَن کیمی نفسیم توتولدو، سینه‌مده نه ایدیسه آز قالا یئریندن چېخدې. من اۏنا إله اۏ ساعات بیر کؤنۆلدن مین کؤنۆله وورولدوم. سن دئمه، بئله ده اۏلورموش. سۏنرا‌لار دَهلیزده اۆز-اۆزه گلدیڲیمده گؤزلرینه باخماغا بئله قۏرخوردوم. من بو رنگده گؤز هئچ هار‌دا گؤرمه‌میشدیم. یاشېل گؤزلرینی اوتانمازدان، چکینمز‌دن آداما زیلله‌ییر، إله تأکید’له باخېردې کی، إله بیل، باخېشې سَنین ایچیندن تئلئویزیۏن، رادیۏ دالغا‌لارې کیمی کئچیب آرخاندا نه وار’سا اۏنا نۆفوذ إدیر. سَنین اؤزۆنۆ ایسه یۏخ، گؤرمۆر. یاشېل گؤزلر سنی آهنروبا کیمی اؤزۆنه دۏغرو چکیر، سَنین باخېشېنې اؤزۆنه سارې یؤنلدندن سۏنرا ایسه چۏخ إعجازکار شکیلده یانا چکیلیر، بو زامان گؤزلری‌نین درین‌لیڲینده گیز‌لَنمیش بۏشلوق آچېلېر، سَنین باخېشېن اۏنون گؤزلری‌نین یانېندان اؤتۆب هامان بۏشلوغا یووارلانېر. بئینیمده غریبه مقام‌لار جانلانېردې. من اۏ بۏشلوغا یاشېل‌گؤزلۆمۆن ظریف أندامېنې قوجاقلایېب اۏنون’لا بیرگه یووارلانېردېم، اؤپۆب-اؤپۆب دیشله‌ییب دۏیمایېردېم، بیر-بیریمیزه دۆنیا‌نېن بۆتۆن شیرین، شهوتلی سؤز‌لرینی دئیه-دئیه اۏ بۏشلوقدا آز قالا گۆله‌شه-گۆله‌شه قالېردېق. سۏنرا یئنه من بۏشلوقدان بو طرفه مکتب دَهلیزینه قایېدېردېم. اۏنون إعتیناسېز گؤزلری منی یئنه قایتارېب دَهلیزین باشېنا گتیریردی. إعتیناسېز یاشېل گؤزلر منه بیر حقیقتی آشکار بَیان إدیردی. بو آدامېن منه قارشې اؤزگه اۏلماسېنې. مکتب دَهلیزینه قایېداندان سۏنرا من اؤزۆمه بو گئن دۆنیادا راحات یئر تاپا بیلمیردیم.
اۏنون’لا بیرجه کلمه کسمک، هئچ اۏلماسا اۏنا اۏلان سئوینج دۏلو، آجې دۏلو حیس‌لریمی سؤیله‌مک منیم اۆچۆن أل‌چاتماز بیر خۆلیا ایدی.
صینیف یۏلداشېم، حَیَط قۏنشوم ایدبار رازی یئنه ده سؤزۆنۆن یئرینی بیلمه‌یه-بیلمه‌یه دئیینیردی:
– نه تَهَر باخېرسان أ، سن بو قېزا؟! إله بیل، یئیه‌جَکسَن اۏنو. نه گؤرمۆسن بو یاشېل‌گؤز سۏنادا؟! اۏدو، نازلې وار، اۏنا نییه باخمېرسان؟! سنی گؤرنده یئریشی ده دَڲیشیر… – ایدبار رازی گویا منیم حالېما یانېردې.
من ایدبار رازییه دۆزه‌مَللی بیر جاواب وئره بیلمیردیم. یا غریب ایمام ریضا، من ایدبار رازییه نئجه دئیه’یدیم کی، بو چلیم‌سیز، یاشېل‌گؤز قېزدان اؤترۆ جانېمې بئله فدا إده‌رم؟! ایدبار رازی منی آنلامازدې.
بیزیم مکتبین ایکینجی مرتبه‌سینده اوزون بیر دَهلیز وار. اۏرتادان ایکی یئره بؤلۆنۆب ساغا دؤنۆردۆ. دؤنن یئرده کۆنجده بیر تاختا قالا‌غې نه زاماندان بری آتېلېب قالمېشدې. هامې بو تاختا قالا‌غېنې اونودوب گئتمیشدی.
بو تاختا قالا‌غې‌نېن آرخاسېندا من اؤزۆمه بیر گیز‌لی یئر دۆزلتمیشدیم. هر سَحَر اۏر‌دا گیزلَنیب یاشېل‌گؤزلۆمۆن مکتبه گلمه‌سینی گؤزلردیم. من اۏنون گلیشینی دَهلیزین اۏ بیری طرفیندن، هله گؤرۆنمه‌دیڲی یئرده ایکن قۏخوسوندان حیسّ إدردیم. تاختا‌لارېن آراسېندا بیر بالاجا دئشیک آچمېشدېم، اۏ دئشیکدن باخېردېم.
همیشه بیرینجی دَ‌ر‌سه گئجیکردی. یاشېل‌گؤزلۆم بۏش دَهلیزی دؤنۆب قنشریمدن کئچنده اۆره‌ڲیم آز قالا دایانار و من نفسیم تنگییه-تنگییه بو قېزېن یانېمدان اؤته‌رَک گؤزدن ایتیب صینفه گیرمه‌سینی ایزلردیم. بعضن اۏ گله‌نه قدر اۏنو گؤز‌له‌مک اۏنون گلیشیندن داها لذّتلی اۏلوردو.
اۏ باهار مکتب حَیَطینده‌کی قېزېل‌گۆل‌لر بیر داها اۏ جۆر بیتمه‌دی. اۏ جۆر، یانې، إله اۆرَکدن، إله عطیر‌لی، إله آل-ألوان، مین بیر رنگلی…
– گۆن‌لرین بیر گۆنۆ…- بورادا قۏنشوم سؤز‌لرینه آرا وئردی و بۏغازېنې آرېتلادې. یئنه قاطار تَکَر‌لری‌نین رئلس‌لر’له تماسېندان دۏغان یئک‌نَسَق “تاق-تاراق” سَسی قولاق دئشمه‌ڲه باشلادې.
– قولاغېن منده‌دی؟! – قۏنشومون جۏد سَسی خنجر کیمی هاوایا ساپلاندې.
من اؤزۆم یئریمده اوزانا-اوزانا، إله بیل، هامان باهارېن طۆغیان إدن چیچک‌لرینی گؤرمه‌ڲه باشلامېشدېم، اۏ باهارېن راییحه‌سینی دویوردوم. چیچک‌لر، حقیقتن، اۆرَکدن آچمېشدېلار، قۏنشوم دئیَن قدر گؤزَل ایدیلر و حتتا چیچک کۏل‌لارې‌نېن اۆستۆنده سېغېرچېن‌لار جیویلده‌شه-جیویلده‌شه دؤوره ووروردو. من اۏ باهارېن ایچینده ایدیم.
– هامان اۏ گۆن من یئنه اؤز یئریمی توتموش ایدیم و تاختاداکې دئشیڲه گؤزلریمی دیکمیشدیم. بو دېر، بیرینجی دَرسین زنگی وورولدو. اۏ یئنه ده زنگ وورولاندان، دَهلیزده‌کی گئدیش-گلیش یېغېشاندان سۏنرا گلدی. دَهلیزی بورولدو و تاختا یېغناغې‌نېن یانېندا… یاشېل‌گؤزلۆم غفلَتَن آیاق ساخلادې. گؤزلرینی منیم باخدېغېم دئشیڲه دیکدی. بئله بیر یاخېن‌لېقدان منیم گؤز‌لریم قاماشدې. اۏنون یاواش سَسی یاغ کیمی جانېما یایېلدې:
– بیلیرم، اۏر‌داسان. هر گۆن گلیب اۏر‌دا گیزلَنیب منی گؤزله‌ییرسن…
من حرکت‌سیز قالمېشدېم. جېنقېرېمې دا چېخارا بیلمیردیم. نفس آلماغا بئله قۏرخوردوم. منی طیلسیمه سالمېشدېلار.
– ایسته‌ییرم، بیله‌سن. منیم ده اۆره‌ڲیم چۏخدان سنینکی اۏلوب. من ده سنی دۆنیا‌لار قدر سئومیشَم. هر مکتبه یاخېنلاشاندا اۆره‌ڲیم گۆپپولده‌ییر، سنی تَنَفّۆسده گؤره‌جه‌ڲیمی مین جۆر خیال إدیرم. إشیت منی. منی بیر داها بوردا بئله گؤزله‌مه. بو تاختا-توختا‌نېن دا آرخاسېندا گیزلنمه. گل سنین’له کلوب‌دا فیلم آخشامې فیلمدن أوّل گؤرۆشک. داها هئچ کیمدن گیزلَتمه‌یَک سیرّیمیزی. قۏی بونو هامې بیلسین… دانېشدېق، باخ، صاباحدان بوردا دورما. من داها گئدیم. سن ده گئت دَ‌ر‌سه. گئج قالدېق. آما بیل. اۆره‌ڲیم سنین’له وورور.
یاشېل‌گؤزلۆم بو سؤز‌لری دئدی، منیم هوشومو ألیمدن آلدې، گئد‌رکن هله بیر دۏداق‌لارېنې بیر-بیرینه سېخېب تاختا دئشیڲیندن منه هاوا اؤپۆجۆڲۆ ده گؤندردی. من ده اؤز نۏبه‌مده دئشیڲین بو بیری طرفینده دۏداق‌لارېمې بیر نئچه دفعه آچېب بیر-بیرینه سېخدېم. گؤز‌لریم یاشارمېشدې.
اۏ گۆن مکتب حَیَطینده‌کی گۆل-چیچه‌ڲین عطری عالَمی باشېنا گؤتۆرمه‌دی می، گؤتۆردۆ. قوش‌لارېن شن چه-چهینی من بو گۆن ده اونودا بیلمیرَم. یۏخ’سا کی بو “تاق-تاراق”؟! آدامې لاپ گیج إدیر…
اۏ گۆن من باشا دۆشدۆم کی، دۆنیانې سئومک نه دئمک دیر. بو، قارشېنا کئچن هر آدامې، تانېدېن، یا تانېمادېن، سئومک دئمک دیر. من اۏ گۆن بۆتۆن دۆنیانې سئویردیم. تکجه اۏنو سئومک آزېما گلمیشدی. خۏشبخت‌لیک ده بو ایدی – تکجه سئودیڲینی سئومیرسن، قارشېنا کئچن هر آدامې، حتتا دۆشمنینی سئویرسن. ایدبار رازی بئله منه گؤزَل-گؤڲ‌چک بیر اۏغلان کیمی گؤرۆنۆردۆ.
قاطار حرکتینی یاواشېتدې. دَمیر تَکَر‌لرین جانېنا أڲلج‌لر نئجه یاپېشدېسا أت‌تؤکن بیر سَس چېخدې. آما قاطار دایانمادې. دریندن نفس دریب فېسېلدادې و یئنه ده یاواش-یاواش سۆرعت یېغماغا باشلادې. “تاق-تاراق-تاق-تاراق…”
قۏنشوم داوام إدیردی:
– اۏ گۆنۆن سحری مکتبه نئجه گلدیڲیمی خاطېرلامېرام. أصلینده، گلمیردیم، اوچوردوم. بۆتۆن گئجه‌نی یاتمامېشدېم. فیکریمده جۆربه‌جۆر خیال‌لار، داها دقیق دئسَم، خیال‌پلۏو‌لار قوروردوم.
دَهلیزین بورولان یئرینی آز قالا سۆرۆشۆب کئچدیم. ایسته‌دیم، تاختا یېغناغېنا بیر تپیک ووروب یانېندان اؤتۆم کئچیم، إله بیل، کیمسه منه دئدی کی، گل بو گۆن سۏنونجو دفعه بو قېزې سن بوردا گؤزله. گلنده چېخ قارشې‌سېنا، ألینی ألینه آل، گؤزۆنۆ گؤزۆنه دیک…
نهایت، زنگ وورولدو، دَهلیزدن أل-آیاق چکیلدی. ساکیت‌لیک أطرافې بۆرۆدۆ. اۏنون گلیشینی اۏندان أوّل گلیب أطرافا یایېلان قۏخوسوندان دویدوم. آیاق سَس‌لری نهنگ دئو‌لرین آیاق سَس‌لری کیمی آغېر و واهیمه‌لی ایدی. دَهلیزین بورولان یئرینه چاتاندا دایاندې. ایلک اؤنجه دال-دالې أڲیلیب دَهلیزین من طرفینه باخدې، إله بیل، یۏخلا‌یېردې کی، کیمسه وار، یۏخ’سا یۏخدو. سۏنرا اۆزۆنۆ دَهلیزین منه گؤرۆنمه‌ڲن طرفینه توتوب منیم گؤره بیلمه‌دیڲیم کیمین’له ایسه دانېشماغا باشلادې. آرامېزدا، تَخمینَن، 5-6 آددېم‌لېق مَسافه وار ایدی. آما من اۏنون دئدیک‌لرینی بیرجه-بیرجه إشیدیردیم.
تاق-تاراق – تاق-تاراق…
– اۏنون ایلک سؤز‌لری منی سَکسَندیرمه‌دی می، سَکسَندیردی. اۏ سؤز‌لرین کیمه عۆنوانلاندېغېنې گؤره بیلمیردیم، آما من بو سؤز‌لری آرتېق تانېیېردېم. بو سؤز‌لری من دۆنندن دؤنه-دؤنه اؤزۆم-اؤزۆمه تکرار إدیب أزبرله‌میشدیم. یاشېل‌گؤزلۆم دئییردی…
تاق-تاراق-تاق-تاراق…
– هه، یاشېل‌گؤزلۆم منیم گؤره بیلمه‌دیڲیم اۏ طرفده‌کی آداما بئله دئییردی:
– بیلیرم، هر گۆن بوردا گیزلَنیب منی گؤزله‌ییرسن. هر گۆن گلیب منی گؤزله‌مکدن یۏرولمورسان. دۆز دئمیرَم؟! ایسته‌ییرم بیله‌سن. منیم ده اۆره‌ڲیم چۏخدان سنینکی اۏلوب. من ده سنی دۆنیا‌لار قدر سئومیشَم. هر مکتبه گلنده اۆره‌ڲیم گۆپپۆلده‌ییر، سنی نئجه گؤره‌جه‌ڲیمی خیال إدیرم. آما داها سن منی بوردا گؤزله‌مه. گل سنین’له کلوب‌دا گؤرۆشک. فیلم گۆنۆنده. داها هئچ کیمدن سیرّیمیزی گیزلَتمه‌یک. دانېشدېق؟! من داها گئدیم. سن ده گئت دَ‌ر‌سه. گئج قالدېق. آما اۆره‌ڲیم بوردا سنین’له قالېر، بیله‌سن… اۏنون بو دئدیک‌لری عئینَن دۆنن دئدیک‌لری ایدی. نه آرتېق، نه أسکیک…
تاق-تاراق – تاق-تاراق…
– یاتمامېسان هله؟! یاتما. قورتارېرام. یاشېل‌گؤزلۆم گلیب منیم گیزلَندیڲیم تاختا-توختا قالا‌غې‌نېن قاباغېندان کئچنده اۆره‌ڲیم سینه‌مدن چېخېب یئره، آیاق‌لارېمېن آلتېنا دۆشدۆ.
من اؤز یئریمده قورویوب قالمېشدېم. حرکت إله‌مه‌ڲه حالتیم یۏخ ایدی. سَنین عاغلېنا گلرمی، دَهلیزین بورولان یئریندن، منیم گؤرمه‌دیڲیم طرفدن کیم چېخدې؟!
“تاق-تاراق-تاق-تاراق…”
– رازی چېخدې. ایدبار رازی. أڲیله-أڲیله، اۏغرون-اۏغرون اۏرا-بورا باخېب تئز-تله‌سیک گئدیب گیردی صینفه.
سن ده دئییرسن، محبّت بئله گلدی، بئله گئتدی… اۏ واختدې، بو واختدې من سئوگی، محبّت نه‌دی بیلمه‌نم، بیلمک ده ایسته‌میرم. هر شئی اؤلدۆ منیم‌اۆچۆن. ایندییه‌نه قدر گۆنۆم بو یۏل‌لاردا، إله بو قاطار‌دا کئچیر. دی، بَسدی. یۏردوم سنی. یاتاق. گئجه‌ن خئیره قالسېن.
من گؤزلریمی یومدوم. یئنه ده قایسې، گیلاس، ویشنه آغاج‌لارې چېچک آچان بیر مکتب حَیَطینده‌یدیم. گۆن ایشېغې حزین-حزین نورونو أطرافا یایېردې. تۏرپاغېن عطری آدامې بی‌هوش إدیردی… بیردن بو یاز طراوَتی ایله دۏلو حَیَطه لئیسان یاغېشې یاغماغا باشلادې. بیر نئچه ثانییه ایچینده نه گۆل-چیچکدن أثر-علامت قالدې، نه دینج-دینج اوچوشان قوش‌لاردان…
کوپه‌نین قاپې‌سې شست’له یانا آچېلېب شیشمان بَلَدچی قادېنې ایچه‌ری بوراخاندا من دیکسینیب گؤزلریمی آچدېم. یاتېردېم مې، آیېق ایدیم می – بیلمیرَم. بَلَدچی قادېنېن گۆمراه، قالېن سَسی کوپه‌نی باشېنا گؤتۆردۆ:
– چای، چای واختېدې. چای‌لارېنېز گلدی. قالخماق لازېمدې. بیر ساعات‌دان آز واختېمېز قالېب. اینشاللاه، بو دفعه گئجیکمه‌ریک. سن هله بایېردا‌کې لئیسان یاغېشا باخ، یاغېشا… یا غریب ایمام ریضا…
بَلَدچی قادېن غریبه بیر سلیقه ایله أل-آیاق إله‌ییب چای ایستیکان‌لارېنې، لیمۏن قابېنې، بالاجا قند قابېنې کوپه‌ده‌کی میزین اۆستۆنه دۆزدۆ.
قۏنشوم آرتېق اؤزۆنه ساهمان-سلیقه وئریب منیم قارشېمداکې یاتاقدا اۏتورموشدو. قاش-قاباق’لا پنجره‌دن چؤله باخېردې. یاغېشېن ألیندن پنجره‌دن اۏ طرفده هئچ نه‌یی سئچمک اۏلموردو. اۏ ایسه یئنه ده قاطارېن یئک‌نَسَق “تاق-تاراق” سَسی‌نین آهنگینه اویقون اۏلاراق باشېنې آشاغې-یوخارې ترپتمکده ایدی.
– سَنین سئودیڲین مورابّا‌دان قالمایېب. باغېشلا…
بَلَدچی قادېن بو سؤز‌لری قۏنشوما عۆنوانلایېب شیشمان بَدَنینی قاپېیا طرف چئویرمزدن أوّل منی اؤز یاشېل گؤزلری’له دیققت’له سۆزه‌رَک گۆلۆمسۆندۆ، سۏنرا کؤکسۆنۆ اؤتۆرۆب کوپه‌دن چېخدې. قۏنشوم بو قادېنېن سؤز‌لرینه هئچ بیر تپکی وئرمه‌دی.
تَکَر‌لرین سَسی یئنه قولاق دئشمه‌ڲه باشلادې: تاق-تاراق-تاق-تاراق…
سۏن
بَنزَرگه‌لر / Bənzərgələr
من یازاندا دینجهلیرم / کامال عبدالله (مۆصاحیبه)
من آداملارې گؤزلریندن تانېیېرام / گۆلآی طاهیرلی (شعر)
ایکی یاشلې کؤرپهنین آجې حیکایهسی / واریث یۏلچویئو…
جزا / سئوینج إلسئور (حیکایه)
بوز / اومان میانالې (حیکایه)
یالقېز إو / سحر روحی (حیکایه)
قار دنهلری / آیناز بزرگان (حیکایه)
ایلان / رحیم علییئو (حیکایه)
دارا / آراز أحمداۏغلو (حیکایه)
