یئنی یازې‌لار / Yeni Yazılar
آنا صفحه Ana Səhifə / آیهان میانالې / گئدیش‌لرین قاران‌لېغېندا، داغېلان روحون گؤرۆنتۆسۆ / آیهان میانالې (کؤشه یازې)

گئدیش‌لرین قاران‌لېغېندا، داغېلان روحون گؤرۆنتۆسۆ / آیهان میانالې (کؤشه یازې)

گئدیش‌لرین قاران‌لېغېندا، داغېلان روحون گؤرۆنتۆسۆ / آیهان میانالې (کؤشه یازې)

بعضن یاشامېن إله‌ آن‌لارې اۏلور کی، اینسان قفیل هئچ واخت اؤرگه‌دیلمه‌دیڲی بیر گرچَک’له‌ اۆز-اۆزه‌ قالېر؛ یاخېنلاشمالارېن چۏخونون داوامې اۏلمادېغېنې، درین‌لیک یاراتمادېغېنې و گئتدیکدن سۏنرا قۏیدوق‌لارې یارایا قارشې هئچ بیر گؤرَو حیسّ إتمه‌دیک‌لرینی آنلایېر. آدام‌لار گلیر، قېسا بیر آندا بیزه‌ سؤیکه‌نیر، بیزدن نه‌سه‌ آلېر، ایچیمیزده‌ نه‌سه‌ أکیر و سۏنرا بیر سؤز دئمَزدن، بیر آن بئله‌ دایانمازدان، سانکی یانلېشجا یانېمېز‌دان کئچمیش کیمی یۏخا چېخېر‌لار. بیز ایسه‌ اۏنلارېن گئدیشیندن‌ داها آغېر بیر سوسقونلوق’لا‌ قالېرېق. بو سوسقونلوق بیزه هئچ بیر آچېقلاماسې دا اۏلمور، باغېشلامېر دا، آردېندان دا بو لال سوسقونلوق بیزی اؤنجه‌کی اینسان کیمی بوراخمایېر. بو کئچیدلر، بو نه‌دن‌سیز یۏخا چېخمالار بعضن روحون إله‌ درین قات‌لارېنا چؤکۆر کی، اینسان ایچینده‌ نه‌یین’سه‌ سؤنۆب گئتدیڲینی حیسّ إدیر؛ قفیل بیر اۏلای کیمی یۏخ هااا، ایشېغې یاواش-یاواش آزالان بیر چېراق کیمی، اۏرا قدر داوام إدیر بلکه، یالنېز ایشېغېن کؤلگه‌سی قالسېن. تۏپلوم بئله‌ آن‌لاردا آنلامېنې ألدن وئریر؛ آدام‌لار سایخانلې بیر خطین، بلکه ده بیر مئترۏنون مینَن‌لرینه‌ بنزه‌ییر، یانېمېز‌دان اؤتۆب گئدیرلر، قېسا وارلېق‌لارې‌نېن بیز‌ده‌ هانسې وئران‌لېق قۏیدوغونو بیلمَزدن. آرامېزدا دئییلمیش سؤزلر، قورولموش خاطیره‌لر، یارانمېش اومودلار بیر آندا صاحاب‌سېز قالېر؛ بیز ایسه‌ ایل‌لر’له داشېما‌لې اۏلدوغوموز آغېر بیر یۆکۆن آلتېندا قالېرېق، بو یۆکۆن هارادان گلدیڲینی هئچ کیم آنلامازدان سۏنا دۏغرو داوام إدیریک.

بو کئچیدلردن سۏنرا اینسان یاواشجا-آستاجا هئچ کیمین دانېشمادېغې بیر گرچَک’له‌ اۆزلَشیر؛ آدام‌لارېن گئدیشیندن‌ دۏغان یارا‌لار یالنېز آن‌لېق آغرې دَڲیل کی، اۏنلار روحون یاپې‌سېندا سَس‌سیز و یاواش بیر دَڲیشیک‌لیک دیر. ایچیمیزده‌ نه‌سه‌ یئرینی دَڲیشیر، نه‌سه‌ قۏپوب گئدیر و بیز کئچمیشی ایله‌ ایلگی‌سی قالمایان بیر اؤزۆمۆز’له‌ باش-باشا قالېرېق. آدام‌لار گلیر، ایچیمیزده‌ بیر ایشېق یاندېرېر و گئدنده‌ اۏ ایشېغې اؤز‌لری ایله‌ آپارېر‌لار؛ آما قاران‌لېغې بیز‌ده‌ بوراخېر‌لار. بو قاران‌لېق هایقېرتې دا ایسته‌میر، آچېقلاماق دا، یالنېز دؤزۆم ایسته‌ییر، اؤلۆمه اۏخشار بیر دؤزۆم.

بئله‌ بیر دورومدا اینسان یاواش-یاواش آنلایېر کی، ایجتیماعی یاشام یالنېز قېسا وارلېق‌لارېن تۏپلوسو دېر؛ هئچ کیم قالماق اۆچۆن گلمیر، هئچ کیم آنلاماق اۆچۆن دایانمېر. هر کس بیزدن بیر پای آلېب گئدیر و بیز سۏن حالېمېزېن نئجه‌ اۏلاجاغېنې بیلمَزدن، قالا‌ن پارچا‌لارې یئنی‌دن بیرلَشدیرمه‌لی اۏلوروق. بو زامان مَعنوی سرمایه‌ اؤزۆنه باشقا بیر آنلام قازانېر؛ اومود دا دَڲیل، گؤزلَنتی ده سایېلمېر، بلکه اۏ، سۆرَکلی وئرانالېق إحتیمالې ایله‌ یاشانان سَس‌سیز بیر ریسک‌ دیر.

اینسان بو تجرۆبه‌لردن سۏنرا اؤنجه‌کی آدام اۏلمور؛ دۆنیایا باخېشې دَڲیشیر، إعتیبارې باشقا بیر بیچیمه دۆشۆر، حتتا سئوینجی‌نین اؤلچۆ-بیچیمی بئله‌ دَڲیشیر. بعضن آدام‌لارېن ایچینده‌ اؤزۆنۆ یالقېز حیسّ إدیر، بعضن سَس‌سیزلیک‌لری‌نین ایچینده‌ کئچمیشی‌نین سَسی دۏلاشېر، بعضن ایسه‌ یالنېز داوام إدیر و بو داوام ایستکدن قایناقلامېر، بلکه سئچیم‌سیز بیر ایجباردان دۏغولور. آما إله‌ بو داوام إتمه‌، آدام‌لارېن آمان‌سېز گئدیش-گلیشینه‌ باخمایاراق آیاقدا قالما، ایچینده‌ هله‌ نه‌یین’سه‌ یاشادېغېنې گؤرسه‌دیر؛ آدې بلکه‌ اومود دَڲیل، آما سَس‌سیز بیر دایانېش دېر. بلکه بو دایانېش اینسانېن یارا‌لار قارشې‌سېندا تام اۏلاراق چؤکمه‌سینه‌ ایمکان وئرمه‌ین بیر چابا دېر؛ آنجاق هئچ بیر شئی دَڲیشمه‌ییر و یارالار ایچیمیزده‌کی سېزلاماسېنا داوام إدیر.

یازار / Yazar : آیهان میانالیAyhan Miyanalı

Ayhan Miyanalı – Rəsmi Bioqrafiya Ayhan Miyanalı yazıçı, tədqiqatçı, proqramçı və çoxdilli tərcüməçidir. O, müasir sistemlərin layihəçisi və Güney Azərbaycan kimliyinin fəal müdafiəçisidir. Fəaliyyəti müasir texnologiyalar, dilçilik, fəlsəfə, neyroelm və mədəni kimlik sahələrinin kəsişməsində formalaşır. O, YenİQapı media və nəşriyyatının rəhbəridir və uzun illərdir rəqəmsal platformaların qurulması, elmi və ədəbi əsərlərin nəşri və dil strukturlarının inkişafı ilə məşğuldur. Ayhan Miyanalı Güney Azərbaycanın Miyana şəhərində doğulub. Atası Şəki, anası isə İğdır mənşəlidir və bu üç mədəni mühit onun elmi və yaradıcılıq baxışının formalaşmasında mühüm rol oynayıb. O, İran Elm və Sənaye Universitetində mexanika mühəndisliyi – enerji çevrilməsi üzrə magistr dərəcəsi alıb və dilçilik, zehni fəlsəfə, neyroelm və sosiologiya sahələrində tədqiqatlar aparıb. Ayhan Miyanalı Azərbaycan türkcəsinin müasir strukturlaşdırılması, Unicode kodlaşdırılması və rəqəmsal dil texnologiyalarının inkişafında aparıcı simalardandır. O, mühəndislik, təsisat sistemləri, ağıllı ev texnologiyaları və enerji idarəetmə modelləri üzrə geniş təcrübəyə malikdir. a.b.t, YenİQapı, YardımOnline və digər rəqəmsal sistemlərin layihəçisi və inkişaf etdiricisidir. Bir neçə dünya dilində peşəkar tərcümə edən Miyanalı, Güney Azərbaycan kimliyinin və ana dilinin qorunması və inkişafı istiqamətində fəal fəaliyyət göstərir.

بو یازېنې دا اۏخویون /Bu Yazını da Oxuyun

دَڲیشیک دۆنیالارې قېنامایاق! / آیهان میانالې (کؤشه یازې)

دَڲیشیک دۆنیالارې قېنامایاق! / آیهان میانالې (کؤشه یازې) هر اینسان دۆنیانې یالنېز اؤزۆنۆن دایاندېغې بیر …

Leave a Reply

Your email address will not be published. Required fields are marked *