یئنی قاپې Yeni Qapı یئنی قاپې، یئنی باخېش دېر تۆرک دۆنیاسېنا
شاه‌گؤلۆ‌ده قار یاغېر…/ رعنا زارع (شعر)
شاه‌گؤلۆ‌ده قار یاغېر
سئرچه‌لر بارماق‌لارېمېن اوجوندا دېر
آیاق‌یالېن اوچور دۆشۏنجه‌م.
همان اۏ إوده‌سن
گؤلۆن اۏرتاسېنداکې رئستورانا باخېر پنجره‌ن
سن باشقا گؤزل‌سن
قارقالارېن قۏجالماغېنې
ترک إدیلمیش بالاجا قایېق‌لارې
قار آلتېندا دۏنان پَشمَک آغاج‌لارېنې
داها یاخشې گؤردۆڲۆن اۆچۆن.
شاه گؤلۆ‌ده قار یاغېر
گۆنئی سۏیوغوندان دۏنان آغاج‌لارېن بیری‌یم
قۏل‌لارېمدا اؤزگۆرجه‌سینه حسرت وار
و بلکه منم، پنجر‌ه‌ن‌دن آسلانان بوز پارچاسې
باهار نه بؤیۆک قۏرخو دېر!
شاه‌گؤلۆ‌ده قار یاغېر
بؤیۆک دَده‌م کۆرسۆ قوروب فَوّاره‌لرین اۏلدوغو یئرده
اوشاق‌لېغېم بوز اۆستۆنده زۆیۆر
نَنه‌م قار یئمیشانې داغېدېر گلیب گئتمه‌یه‌نه
آتام شهریار اۏخویور
من قاردان آدام
قاردان قادېن
قاردان آزادلېق دۆشۆنۆرم
سنه بنزه‌ییر
أصلینده بۆتۆن گؤزلۆک‌لر سنی گؤرسه‌دیر.
شاه‌گؤلۆ‌ده قار یاغېر
نؤقطه-نؤقطه اۏینایېر بئینیمده آنې‌لار
دیزاین إدیرم سنی إویمده
یۏخلوغونو کۆره‌ییرم دامدان
پنجره‌نـه باخېر تبریز
و منیم دوستاق دووارېم
جۏراب‌سېز اۆشۆیۆر آسېلمېش آرزې‌لار
فېرلانېرام سَس‌سیز
دمپایه‌لریم…آخ!
دۆشۆن‌سَنه!
نه اؤزگۆر هیجان دېر
شاه‌گؤلۆ‌ده قار یاغېر…
