یارېمچېق سئوگی (۱)/ قاسېم پناهی (پۏوئست)
چیلله نین ان سویوق گئجه لریندن بیری ایدی،سئودا قارانلیق اوتاغینین بوغلانمیش پنجره سینین قیراغینداکی اوتراجاقدا اللرینی قوینونا قویوب شهره زیلله ندی،ایتی باخیشلاری گئجه نین قارانلیغیندا گیزله نمیش توستولری یاریب کئچه بیلسه’یدی ده باش اوجوندا آی اولدوزو گؤره بیلمه دی اونا گؤره ده باخیشلارینی يول بویونجا دوزولموش ائلئکتیریک دیرک’لرینین ساری لامبالاریندان آددیم ـ آددیم سوزدوروب و اونلارین شهرینین یولوندا اولان سئوگیلیسینی دوشونمه گه باشلادی .شهرده سوکوتون پچیلتیسیندان باشقا بیر سس گلمیردی، سئودا دویغوسال بیر انسان اولدوغو اوچون قلمینی گؤتوروب و سئوگیلیسی اوچون بیر شعر یازدی·
شهرین آمانسیز سویوغوندا
سن یوخسان دئیه
اؤزوم ـ اؤزومو قوجاغلاییب
فوتولارلا اؤپوشورم
گلسن
بو تیکانلی یوللار
چیچک آچاجاق گؤزلریمده
ائله بو آنلاردا تئرمینالا گیرن بیر اوتوبوسون سسی شهرین سوکوتون و سئودانین جئب تئلفونونون مئساژ سسی اوتاغین سوکوتونو پوزدو.
سئودا تلسیک جئب تئلفونوندا بیر نئچه توش باساندان سونرا علی’دن ‘جانیم من تئرمینالا یئتیشدیم ‘مئساژینی اوخویوب شوک وئریلمیش کیمی آیاغا قالخیب بینانین اؤنونده ساخلانیلمیش آرابایا دوغرو قاچیب سئوگیلیسینی ائوه گتیرمک ایسته دی،سئودا رولون آرخاسیندا اوتوراندان سئوگیلیسی ایله نئجه قارشیلاشاجاغینی دوشونوردو، جانینا دوشموش استرسدن نه ائده جه یینی بیلمیردی سانکی ال آیاغی دونماق اوزه رینده’یدی آنجاق اؤزونو الده ساخلاسین دئییه اؤز ـ اؤزونه بیر شئیلر پیچیلدایاراق آیریلیغین ان سون آنلارینینی آراباسیلا آیاقلاییب کئچیردی.
اوتوبوس تئرمینالدا دایاناندان سونرا علی قارا اوورکوتونو ایگنینه گئییب قارا یون پاپاغینی باشینا قویوب قولاقلارینا قدر چکیب سوروجویه اللرینه ساغلیق دئییب اوتوبوسدان ائنیب همن سیقار قوتوسوندان بیر گیله سیقار چیخاریب اووجونون آراسیندا آلیشدیریب سئوگیلی یوردوم دئیه الینی تورپاغا سورتوب اؤپودو،سونرا سئودانین نومره سینی آرادی
سئودا-آلو
-آلو، هارداسان جانیم منیم
سئودانین دیلی سؤز توتار توتماز-جانیم بئش ـ اون دیقه’دن سونرا یانیندایام
هله لیک جانیم دئیه علی تئلفونونو جئبینه سوخوب سیقارئتینی پوکلایاراق آددیملاماغا باشلادی،گؤیلرین سینه سینی سؤکموش داغلارین سویوغو سانکی اونو شیلله له میش کیمی بیر نئچه آندا اوزلرینی قیزارتدی آما علی سئوگیلیم گلیر دئیه وئجینه آلماییب آددیملاماسینا داوام ائتدی،بو آندا ایکی اوچ تاکسی سوروجوسو اونا یاخینلاشیب هر بیریسی بیر یئره چکیب قارداش هارا گئدیرسن دئییه سورو وئردیلر , علی بوراخین من هئچ یئره گئتمیرم دئیه تارتینیب اؤزونو اونلاردان خلاص ائتدی آنجاق سوروجولردن بیریسی یئنه اونون قولوندان یاپیشیب دئدی:
– قارداش واللاه بیزده چؤرک اسیرییک،ناراحات اولما گؤرورسن کی گئجه نین یاریسی بو سویوغدا ایتی ووراسان قالاغدان چیخماز آما چاره میز یوخدور آییله میزین یانیندا اوزوموز قارا اولماسین دئیه گئجه-گوندوز ایشله ییریک گل من سنی آپارارام آشاغی حئسابلارام.
بو سؤزلری دئیه دئیه سوروجونون گؤزلری دولدو،علی’نین قولونو بوراخیب اوزونو قارانلیغین قوجاغیندا بوغولموش شهره ساری دؤنده ریب داوام ائتدی:
-آللاه بئله یاشاییشی کسسین نه دیر آخی،قیزیمین جئهیزینی دوزه لده بیلسه’یدیم بو چتینلیکدن اوزوم قورتاراردی ، آما یوخ بو آجی بیتمه میش باشقاسینین باشلانماسینا امینم ائله حیاتدا بودور “بیزلر یارالی یارانمیشیق، یاشاییشدا یالنیز یارادان -یارایا داشینماقدیر” سوروجو بو سؤزلری دئییب اللرینی کتان شالوارینین جئبینه سوخوب قیسا بویونو آیاق بارماقلارینین اوستونه چکیب درین بیر آه چکدی بو آندا علی آرخادان سوروجونون چیینلرینی اؤفکه له یه رک دئدی:
“هامیمیز فهله ییک
عینی بیر فهله
سنین اللرین قاباردیر
منیم اوره گیم
اونون بئینی
هامیمیز فهله ییک
عینی بیر فهله”
سونرا اللرینی جئبینه سالیب ایکی اللی مین تومنلیک چیخاریب سوروجونون اووجونا باسدی،سوروجو پوللاری گؤردوکده اونون الینی قایتاریب قارداش من دیلنچی دئییلم،اوره گیم دولموشدو اونون اوچون سنله دردلریمی پایلاشدیم ندنینی اؤزومده بیلمه دیم آما چوخ اوره گیمه یاتدین ، علی گوجله پولو سوروجونون اووجونا باساراق:
-آ کیشی مگر ایندی دئمه دین قارداش
سوروجو-هه
-باخما بیز بیر ـ بیریمیزی تانیمیریق آنجاق هئچ نه ده اولماسا وطنداش و دیلداشیق اونسوز دا سن منه قارداش دئدین من ده ایسته ییرم قارداشیما بیر چای پولو وئرم کیمه نه
سوروجو-آخی…
-آخیسی زادی یوخدور هله دئنن گؤرک آدین نه دیر آی قارداش
سوروجو-آدیم یاشار’دیر
-چوخدا گؤزل،یاشار قارداش سیقار چکیرسن می؟
یاشارین دوداقلارینا بیر یاریمچیق گولوش قاچار قاچماز-یاشار سیقارسیز یاشایا بیلمز دئیه علی دن سیقاری آلیب، ایکی بارماغیلا علی نین چاخماغی توتان الینه ووروب سیقارینی آلیشدیردی، سونرا اونلاردان بیر آز اویانلیق اولان اوتراجاغا ساری یئریییب قارداش گل بورادا اوتوراق دئدی. علی ده سیقارینی آلیشدیریب اونون یانیندا اوتوردو، شهرین یاریسینی اونلارین اولدوغو یئردن گؤرمک اولوردو. خییاوانلارین سویوق دؤشله رینه ساچیلمیش ائلئکتریک لامبالارینین سارینتیل ایشیقلاری داریخدیرجی بیر اورتام یاراتسادا اونلار بیر_بیرایله تانیش اولماق اوچون سئوینیردیلر .
یاشار – قارداش هئچ من سنین آدینی سورمادیم
– آدیم علی دیر
یاشار بونو ائشیتدیکده علی دئییب بیر آه چکیب سونرا سیقارینی دریندن پوکلایاراق دانیشماغا باشلادی: منیم گنجلیک چاغلاریمدا بیر یولداشیم وار ایدی اونون دا آدی علی ایدی، گئجه – گوندوزلریمیزی بیرگه کئچیره’ردیک. جئبلریمیزده بیر شئی اولماسادا اوره کلریمیزده سئوگی و بئینیمیزده ساواش وار ایدی. نه چوخ گئجه لری شهرین ان قارانلیق بوجاقلاریندا خیاللاریمیزدان دانیشیب “آکین” و “گونشی ایچنلرین تورکوسو”نو اوخویاردیق آنجاق بیر گون آرادان یوخ اولدو،ائله بیل سو اولوب یئره هوپموشدو نه آییله سینین اوندان خبری وار ایدی نه ده کی منیم. یاشار یاناقلاریندا قیروولانمیش یاشلارینی ساغ الی ایله سیلیب یومروغونو دویونله ییب سینیرلی (عصبی)شکیلده داوام ائتدی: آما بیر نئچه آیدان سونرا تاپیلدی، یازیق ائله بیل همین آدام دئییل دی دلی اولوب خییاوانلارا دوشموشدو. آییله سینه ده بئله چاتدیرمیشدیلار کی گونشه گئدنده باشینا هاوا گلیب دی سونرالار توختایاجاق، ایندی یئددی – سکگیز ایلدیر حیاتینی دییشیبدی آنجاق گون اولماز او ایگیدی خاطیرلامایام، بو آخشام دا کی سن لاپ اونون خاطیره سینی جانلاندیردین. علی آیاغا قالخیب سیقارینی آیاغینین آلتیندا سؤندوردوک’دن سونرا گؤزلرینی یاشارین گؤزلرینده دالغالانان دویغولاردان چکیب قارداش بیز یورولانلاردان دئییلیک گلجک بیزیمدیر دئییب الینی یاشارا ساری اوزادیب سنینله تانیش اولدوغوما چوخ سئویندیم من گئتمه لییم دئیه اونلا ال وئریب آرالاندی.
علی یاشار’دان آیریلدیقدان سونرا بوتونلوکله اونو دوشوندو،اونون چکیجی سسی،ایستی داورانیشی، یاریمچیق گولوشلری و آچیقلامادیغی دوشونجه علی’نی حئیران ائتمیشدی،آنجاق چاره سیزلیک اوزه ریندن اوندان آیریلماق مجبورییتینده قالمیشدی، بئینینده پیرتلاشیق دوشونجه لرینی سهمانلایاراق تئرمینالین چیخیش قاپیسینا ساری یئرییب بیر داها سئودا’نین نومره سینی آرادی آنجاق سئودا اونو جاوابلامادی، بو جاوابسیز آراما بیر آن اونو سیلکه له ییب اؤزونه گتیردی. یئنیدن نومره نی آراسادا یئنه ده جاوابلانمادی،آرتیق دورومون نه قدر چتین اولدوغونو سویوق هاوادا حیس ائتمیردی، بئینینده یاراندیغی بؤیوک ندنه جاواب تاپاماغا چالیشیردی آخی سئودا اونون زنگینی هئچ زامان یانیت’سیز بوراخمازدی آنجاق بو دؤنه…
بئینینه مین-بیر فیکیر گلن علی نه ائده جه یینی بیلمیردی بیر آن کئچمیش ده کی ایلک سئوگیلیسی و اونون فئلینه اویوب نئجه آلداندیغینی خاطیرلاییب سونرا اللرینی بیر ـ بیرینه سورتوب هووخوراراق آستاجاسینا آما یوخ سئودا تام فرقلی بیر اینساندیر دئیه پیچیلدایب اللرینی جئبینه باسدی.
شهردن آرا بیر زیبیل قابی قیراغیندا بوغوشان پیشیک لرین میریلتیسی گلمه سه ایدی آدام دئیه ردی بلکه بورادا هئچ بیر جانلی یوخدور . گئجه یارینی کئچدیکدن سونرا هاوانین سویوغو ایکی قات داها آرتمیش کیمی گلیردی هر شئی اولدوغو یئرده دونوخوب قالمیشدی یالنیز سئودا بو سسیزلیک و ایسیزلیقدان(خلوتلیکدن)یارارلاناراق یول بویونجا بوتون قیرمیزی لامبالاری دورمادان کئچیریب و تئرمینالا ساری گلمک ده ایدی، آصلیندا او علی نین گلیشیندن او قدر سئوینجک اولموشدو کی هئچ یولدا اولان لامبالاری گؤرموردو یالنیز علی ایله نئجه قارشیلاشاجاغینی دوشونوردو، بو آرادا سئودا داها بیر قیرمیزی لامبانی کئچیردیگی زامان بیر پلیس آراباسی اونون آردینا دوشدو پلیس لر اؤزلرینی سئودانین آراباسینین یانینا یئتیردیکده سئودا ماوی-قیرمیزی لامبانین ایشیغینا اؤزونه گلیب و اونلارین ایسته گی ایله آرابانی بیر قیراغدا دایاندیریب بلگه لرینی الینه آلیب آرابادان ائنیب پلیس لرین آراباسینا ساری گئتدی، اونلاردا آرابادان ائندیلر ، بیریسی سئودایا یاخینلاشیب باخیشلارینی اونون گؤوده سینده گزدیریب بیر یالتاقلی باخیشلا دئدی :گئجه نین یاریسیندا هارا گئدیرسن آی قیز؟
سئودا – تئرمینالا گئدیرم
پولیس گولومسه یه رک سن دئدین منده ایناندیم
سئودا اوزونو تورشودوب دئدی: نه ایسته ییرسیز ؟
ایکینجی پلیس سئودایا یاخینلاشیب گئجه نین بو واختیندا خییاونلار مارالیندان تکجه بیر شئی ایستمک اولار دئییب بوغونتولو بیر سسله گولمه گه باشلادی. سئودا یاواش ـ یاواش ایچینده بیر قورخو حیس ائدیردی ،چتین بیر اویونا دوشدوگونو آنلاییب اؤزونو بیر آز داها غضبلی گؤسته ریب گؤزلرینی پلیس’لرین گؤزلرینه دیکیب :ائله بیل سیز اؤزونوزدن چیخمیسیز، ایندی زنگ آچارام آتام گلسین دئییه جئب تئلفونون گؤتوردو بو آندا بیرینجی پولیس بیر آز ایره لی گلیب بلگه لرینی وئر گؤروم آرابانی آختارمالییق دئیه امک داشینا گؤزلرینین ایشارتی ایله آرابانا گؤستردی. سئودا اؤزونو ایتیرمیش کیمی نه ائده جه گینی بیلمیردی اؤزونو بیر قیراغا چکیب جئب تئلفونونا باخدی،علی نین جاوابسیز آراماسینی گؤرجک تئز اونو آرادی
علی اوزونتولو و تیترک بیر سسله ـ آلو ،سئودام هارادا قالدین یااا؟
ـ پولیس لر ماشینیمی ساخلاییب لار چوخ قورخورام بو پولیس لر پیس داورانیرلار
علی ـ هارداسان؟
ـ باخلونون(موزه)آییی…
چیغیرتیدان سونرا سس کسیلدی. سانکی دونیا علی’نین تپه سینه اوچدو، دوشونمه دن یاشار – یاشار دئیه تاکسی دوراغینا ساری قاچدی. .
آردی وار…..
