بارات إششه‌ڲی / منوچهر فضلی خلف(آزرائللی) (حیکایه)
ایمامزادا بولاغیندا، اوز- گؤزونو، ال- آیاغینی یودو- ییخادی، سوْنرا، وضوع آلماغا باشلادی. نه اوْ منی تانیدی، نه ده من اوْنو تانیدیم. سؤز- صؤحبتین آراسیندا، اؤزوموزو تاپدیق
دئدیم: بارات‌عمی، اینشاللاه باغیشلارسان، آخی…، نئچه ایل‌دی سنی گؤرمه‌میشدیم، گومانیمجا…، اوْتوزبئش- آلتی ایل اوْلار؟
بارات، دئدی: هه… بالام، من ده اوولینده، سنی تانیمادیم، یاواش- یاواش، بنزریش‌لر‌دن! بنزتدیم
بیر چوْخلو، سؤز- صؤحبت‌لردن سوْنرا، دئدیم: بارات‌عمی…، اوْ، معروف! باراتائششگی سنین‌دی؟
دئدی: خئییر!
دئدیم: آخی…، کؤیوموزده سندن باشقا، بارات آدلی بیری یادیما گلمیر؟
گولومسرکن، دئدی: بورالاردا بیر بارات وار، اوْ دا منم، البت کی! اوْ قدیمکی باراتین باراتاسی! باراتائششگی ده منیم دئییل! منیم ایدی یاهو
آی بالام، ایندی، هر ائوین، نئچه موْتورو- بیر سوواری‌سی- بیر نئیسانی وار…، ائششک- مئششک! ییغیشیلدی، گئتدی
دئدیم: باغیشلا، باراتائششگی نین هانسی اؤزل‌لییی اوْنو «باراتائششگی» آدلاندیرمیشدی؟
دئدی: سن، نه‌لر ائشیدیبسن؟
دئدیم: واللاه…، یئرلی- یاتاقلی، بیلمیرم، ائشیتدیییمه گؤره، چوْخ کؤنز بیر حئیوان ایمیش، ایندی‌نین ایندی‌سینده ده، هله ده وار، بیزیم بایرام، آرا- بیر، منی «باراتائششگی» دئیه آدلاندیریر، گولور
دئدی: هانسی بایرام؟
دئدیم: بایرام کیشی‌زاده
دئدی: هه…!، بایرام، بایرام!!!
دئدیم: بایرامی بوْش وئرین گئتسین، بارات‌ائششگ‌یندن دئیین
دئدی: هه…! باراتائششگی…!، باراتائششگی چوْخ کؤنز بیر ائششک ایدی، چوْو..و..وخ کؤنز…!، کؤنز وار- کؤنز وار…!، لاپ! بئله، کؤنزلییین ده لجین چیخاراردی. کؤنزلیک‌لریندن بیری، قاپی‌‌‌لارین آچیلماسینا، ماریز اوْلدوغویدو. اؤرنگ اوچون، بیرینی، چوْخ آیرینتی‌لی دئییل، خولاصه دئییم؟…!
: اوزون قیش گئجه‌لری‌نین بیرینده، گئجه یاتمادان، دئدیم: گئدیم، بو حئیوانین قاباغینا بیرآز سار- ساماندان زاددان تؤکوم، یئسین. سامانلیقدان سبت‌چه‌نی دوْلدوردوم، آپارام تؤکم حئیوانین آخورونا، تؤیله‌نین قاپیسینی ها… ایته‌له‌دیم آچیلمادی، سن دئمه! کی، طیبق‌ی معمول!، ائششک هر یئری ویلله‌ییب، گلیب یاتیب قاپی‌نین دالیندا…، سؤزو چوْخ اوزاتماییم، مین‌بیر فندله قاپینی آچدیم، سبت‌چه‌نی ائششگ‌ین آخورونا بوْشالتدیم. نه‌ایسه، گؤردوم، ائششک یئم‌دن یئییر، آما! اوْ حالدا دا بیر جوره! اؤزونو قاپییا ساری وئرمگ ایسته‌ییر! لئشی‌نین مئیلی قاپییا ساری گئدیر!. تؤیله‌کوره‌یینی گؤتوردوم، کوره‌یی سؤیکه‌دیم دووارین کؤشه‌سینه، دسته‌سینی دایادیم! ائششگ‌ین قابیرغاسینا!!!، گئتدیم…
صاباح تؤیله‌یه گئتدیکده، نه گؤرسم؟ یاخشی‌دی؟!. گؤردوم، ائششک، گئجه‌نی صوبحه‌جن! کوره‌یین ساپی‌لا اوغراشیب! قابیرغاسی- بؤیرو یارالانیب، قاناییب، نه ایسه، یئنه ده کوره‌یی ایته‌له‌ییر…
بیر سؤز دئمیش اوْلام!، دئدیم: اوْلور دا…!، اوْ دا بیر دؤوره‌یدی، دئوریلدی- گئتدی
بارات، دئدی: آی بالام، یانیلیرسان!، دئدییین‌کیمی، دئییل، اوْ زامانلار، بیر باراتائششگی وار ایدی، نه ایسه! ایندی، دونیانین دوزه‌نی پوْزولوب، مین‌لر- مین‌لر باراتائششگی وار!
مین‌لر- مین‌لر باراتائششگی…
مين‌لر- مين‌لر باراتائششگی…
–
بَنزَرگه‌لر / Bənzərgələr
ایکی یاشلې کؤرپهنین آجې حیکایهسی / واریث یۏلچویئو…
ایلان / رحیم علییئو (حیکایه)
جزا / سئوینج إلسئور (حیکایه)
قار دنهلری / آیناز بزرگان (حیکایه)
یالقېز إو / سحر روحی (حیکایه)
بوز / اومان میانالې (حیکایه)
دارا / آراز أحمداۏغلو (حیکایه)
بۏش كۏمۏد / حسن ثمودی قلعهلر (حیکایه)
قبیرقازان / ماکسیم قۏرکی (حیکایه)
