اوچوش…/ آلما موغانلې (شعر)

اوچوش…/ آلما موغانلې (شعر)

بیر ایکی اۆچ
اوچ، اوچ، اوچ
بیری‌سی اۏتورموش دېر آیاق‌لارېمېن آلتېندا
باغېرېردې
قانادلاندېغېمدا داها دا آلچالېردېم
قادېن‌لېغېم اوچوردو ایچیندن
اوچماق نه‌دیر
دووارلارېن آلچالماسې دېر
یۏخسا یېخېلماغې
بیری‌سی ایچیمده اوچماق ایسته‌ییردی
آلچالېردې ایچیمده‌کی دووارلار
یېخېلېردېم من
اوچوردو شَهَر آیاق‌لارېمېن آلتېندا
اوچوردوم من دۆز شَهَرین باشېندا
اوچورتما اۏلموشدو شَهَر
گؤڲدن يئره اوچوردوردوم اینسان‌لارې
یېخېلېردې ایشېق‌لار
آلچالېردې دووارلار
و دووارلار دالېنداکې شَهَر گؤرسه‌نيردی
دووارلار آلتېنداکې یاشام اوچوردو
اوشاق‌لار باشماق‌سېز يېخېلېردېلار گؤڲده
آتالار باشماق أل‌لرینده اوچوردولار یئرده
ايچیمده بیری‌سی اوچورومدا اوچوردوردو اؤزۆنۆ
بيري‌سی باشېنې دایامېشدې پنجره‌یه
قوش‌لارېن یېخېلماسېنې ایزله‌ییردی
قوش‌لار آلچالېردې
اوچان اینسان‌لارېن قارشې‌سېندا
ساواشېردېلار دووارلار
و بۆتۆن ساواشچې‌لار اوچوردولار دۆنیانېن باشېنا
قبیر داش‌لارېندان اوچورتما اوچوران بارماق‌لار گؤیـه‌ريردی
و تيتره‌ییردی گۆنش
تانرې سو سَپیردی
اوچان دووارلارېن تۏرپاغې اۆسته
شَهَرده تؤشكۆيۆردۆلر دووارلار
نَفَسينی دَريردی اوچورومدا تانرې
اۆچ ایکی بیر
اوچ، اوچ، اوچ
بیری‌سی باغېرېردې باشېمېن اۆستۆنده

من اوچوردوم شَهَرده
شَهَر ایچیمده اوچورومدا دورموشدو
دووارلار آلچالېردې
دۆنیا باشېما اوچوردو
من دونیانېن باشېندا…