یئنی یازې‌لار / Yeni Yazılar
آنا صفحه Ana Səhifə / ادبیات / باش توتمایان رۏمان / ووقار نعمت (حیکایه)

باش توتمایان رۏمان / ووقار نعمت (حیکایه)

ووقار نعمت

باش توتمایان رۏمان / ووقار نعمت (حیکایه)

سوپورلر خیابانی سوپورور. قاپی آغزینا قویولان آشغال‌لاری آشغال ماشینینا تولازلاییرلار. پیشیک‌لر بیربیر آت‌آشغالین ایچیندن چیخیب تیزیخیرلار. پنجره‌نی اؤرتوب ماسانین آرخاسینا کئچدی. گئجه یارینی کئچمیشدی.

بیر گنج قادین قاپینی ایته‌له‌ییر. آچ دئییردی. آچماق ایسته‌میردی. آما آچدی. گؤزلری قادینین گؤزلرینه ایلیشجک، قالدی! گؤزلرینه قان سیچرامیشدی. بو گئجه گؤزو!… یالنیز، چیلپاق بیر قادین!!!.. ؟!…

قاتار فیت وئردی تونئل‌ده. کیشی باشینی قوجاقلاییب، قولاقلارینی توتوب، گؤزلرینی یومدو. قاتار بئینینده سورونوردو هله. قادین اللرینی یوخاری قالدیردی. بیر کیشی باشی‌دیر اللرینده. هله قانی قوروماییب، سوزور.
ـ «اَریمین باشی­‌دیر» دئدی، ـ «گَل آل. گؤردون من اؤلدوره‌رم! راحات اولدوق. به‌یم یوخ؟!..»

ـ «یوخ!… بوندان رومان اولماز»، -دئدی یازیچی، ـ «بئله باشلاماق اولماز. یانی اولار ائ!..، آما یاخشی دئییل.»

پنجره‌یه قالخدی. سوپورلر کوچه‌یه آتیلمیش بیر تئلویزیون اوسته ساواشیردیلار. سیقارئتین توستوسونو پنجره‌دن چؤله پوفله‌دی. قاییتدی.

قادین اَری‌نین کسیک باشی‌نین الینده قالمیشدی، و او باشی باش‌دان ائله‌مک ایسته‌ییردی. ـ «نئینه‌ییم بونو؟!»، دئیه سوروشدو.

ـ «آت ایت‌لره! ایت‌لر یئسین منی. تئز اول… سنین الینده عذاب چکیرم»، کسیک باش دئدی.

ـ «ایتی هاردان تاپیم ائ؟!…»، یازیچی بیر کیتاب آچیب، قویدو قاباغینا. ـ «آی ایتیم! بودورهااااااااا!…» ـ «بورا دولودور. … گئت پالتارلارینی گئی.»

ـ «پالتارلاریمی یاغیش‌دان آسمیشام!»، قادین دئدی.

کاغیذی جیریب قویدو آشغال­‌قابینا. باشقا بیر کاغیذ چیخارتدی.

قاپی دؤیولدو. قاپی‌نین مات شوشه‌سینده ناماز چادراسینا بورونموش بیر چیلپاق قادین گؤزه دَییردی. ایستر-ایسته‌مز قاپینی آچدی. همن قادین ایدی. قاپی‌نین سول طرفینده بیغ‌لاری قولاغی‌نین دیبینده اولان بیر کیشی دایانمیشدی. یازیچی دَوریکدی (دوروخدو). قادین قانلی اللرینی ناماز چادراسی‌نین آلتیندا گیزله‌میشدی: ـ «آغا گؤرورسونوز؟! بو کیشی منیم اریم‌دیر،» کیشی اللرینی بیغ‌لارینا چکیب بیر آز دا خوروزلاندی. ـ «دئدیم کی، یانی منیم اریم وار! بیر ده منه ائولَنمک تکلیف ائتمه‌یه‌سینیز.»

آرواد اری‌نین باشی الینده قاییتدی. الینی کوره‌یینه توتوب بیر بوغما چیخارتدی. بو، سونا چاتمامیش جیردیغی بئشینجی کاغیذ ایدی.

پنجره‌سی ایکی دفعه دؤیولدو. قورخا قورخا پنجره‌نی آچدی. شهرداری سوپورلری‌دیر. ـ «آغا! بو آشغال سیزیندیر؟!… بیز بئله آشغالی پول آلماساق، آپارماریق. آنلاییرسیزمی؟!…»

یازیچی ده‌یه‌جک قالمیشدی. ـ «نه آشغالی؟! نه پولو؟! سیز وظیفه‌نیزی یئرینه یئتیریرسیز. ایستر آپارین، ایستر آپارمایین. منه نه وار!..»

سوپور اللرینی یوخاری قالدیریب، باشی، لامپانین ایشیغینا توتدو. باش همن باشدی. هله قانی دا قوروماییب. ـ «بو باش منیم باشیم‌دان نییه ال چکمیر؟!»، دئدی. چاشمیش کیمی سوپورلرین اوستونه چیغیردی: ـ «اوسته‌کی قاتین زنگینی باسین.»

بالاجا اوتاق‌دا آددیم‌لاماغا باشلادی. تامام یازیچی‌لارا سؤیوش یاغدیردی. نه اوچون گرک رومان‌دا بیرینی اؤلدوره‌سن؟! نه اوچون آخی، بیریسی اؤلمه‌دن، بیریسی خیانت ائتمه‌دن، بیر جينایت، بیر فاجعه اوز وئرمه‌دن، بیر رومان بیتمیر؟! سونرا دوشوندو: اصلینده حیات بئله‌دیر آخی! گئرچه‌یی، گؤزو یوموق جاماعاتا دا باشا سالماق گرکدی. یازیچی‌لاردان عوذر ایسته‌دی.

یاتاغینی آچارکن اوره‌یی بولاندی. حیَه‌طین بوجاغیندا اولان آیاق یولونا یؤنَلدی. تامام یئدیکلرینی گئری قایتاریب، گئری قاییتدی. همن قادین چیلپاقجاسینا یاتاغیندا اوزانمیشدی. دوداق‌لاریندا قیمیلدانان یالانچی بیر گولوش سیچان اؤرتویون قیراغینی گمیرن کیمی اوره‌یینی چئینه‌ییردی سانکی.

«سنی اؤلدورمک ایسته‌میرم»، -دئدی یازیچی، ـ «الیمی سنین قانینا باتیرماق ایسته‌میرم. آنجاق سن بیردن-بیره یوخ اول، ایت. ائله ایت کی، تانری دا، سوراغینی وئرمه‌سین… بئله‌جه داها دا، جاذيبه‌لی اولار.»

قادین آیاغا قالخیب قاپی‌دان چیخاندا، یاتاق‌دا بیر کؤرپه ویغیلدادی. – «او سنین اوشاغیندی» – قادین دئدی.

یازیچی آیاق‌لارینی یئره دؤیدو، اوشاق کیمی. قادین گئتمیشدی.

بالاجا بیر اوشاغی بؤیودوب قهرمان ائتمک چتین ایش‌دیر. یازیچی دوشوندو.

پنجره تئز-تئز دؤیولوردو، آردی کسیلمه‌دن. سوپورلر شهرین بوتون پولیس‌لری ایله تؤکولوب پنجره‌نین قاباغینا. یازدیغی کاغیذلاری یاندیردی. پنجره تئز-تئز دؤیولوردو. پنجره‌نی آچدی. پنجره‌دن خیابانا اوزانان ساری ایشیق‌دا آغ دولولار قارا آسفالت‌دا لزگی اویناییردیلار.

کول قابی سیقارلا دولموشدو. اوشاق تورپاق اوسته اویناییر. اوشاق تورپاق یئییردی. الینی جیبینه سالدی. اللری ائشییه چیخماغا اوتانیردی. بیر کؤلگه شاققا چکیب گولدو. بیر قادین کؤلگه‌سی. آجیماسیز، سویوق و ساختا بیر گولوش‌له. دیوارلار قوپوب تؤکولوردو گؤزیاش‌لاری کیمی. سیقارا پاکتی بوشا چیخمیشدی.

ـ «یازیچی‌لیغی یئره قویاجاغام» دئدی. «دوشونمک دونیانین ان آغیر عذابینی چکمکدیر.»

اوشاغا دوغرو یؤنَلدی. بوغازیندان یاپیشیب سیخدی. ایکی ده‌یقه کیمی ائله‌جه ساخلادی. سونرا بوراخدی. بیر کولک اسدی. اللری گؤیده اوچوردو. کولک برک اسمیشدی. بالاجا اوتاغی دا، پنجره قانادلارینی آچاراق، گؤی‌ده اوچوردو. یئریمک ایسته‌دی. آیاق‌لاری یئرده قالدی. سوپورلر یوخا چیخمیشدیلار. گؤیه باخدی! یازیب جیردیغی کاغیذلار، او قادین، او کسیک باش، چکدییی سیقارلارین فیلتیری، بیر ده اؤز اوتاغی کولک‌ده اویناشیردیلار.

داها اللرینی گؤرمه‌دی. اوتاغی‌نین اورتاسیندا قویلادیغی اوشاغین قبری اوسته یاتاغینی آچیب یاتاغا اوزاندی. عؤمرونده بئله‌جه راحات یاتمامیشدی.
Payız

1384

یازار / Yazar : آیهان میانالیAyhan Miyanalı

بو یازېنې دا اۏخویون /Bu Yazını da Oxuyun

körpü- Elyar Polad-YeniQapi.com---

کؤرپۆ / إلیار پۏلاد (حیکایه)

قاراباغ دؤڲوش‌لرینده قهرمانجاسېنا وارلېق‌لارېنې قوربان وئرن‌لرین أبدی خاطیره‌­سینه: کؤرپۆ / إلیار پۏلاد (حیکایه)    اۆچ …


Warning: count(): Parameter must be an array or an object that implements Countable in /home/yeniqapi/public_html/wp-includes/class-wp-comment-query.php on line 399

Leave a Reply

Your email address will not be published. Required fields are marked *