اولدوزلار / کریم گل اندام
هرشئی آیدینلیقدا آشکارا چیخار
سیز نئجه ایشیقدا گیزله نیرسینیز ؟؟!!
هرشئی قارانلیقدا گؤزلردن ایتر
زیل قارانلیقلاردا ایزله نیرسینیز !!
اولدوزلار،اولدوزلار سوزن اولدوزلار
سونسوز ماویلیکده اوزن اولدوزلار
گئجه یاخاسیندا گوموش دویمه لر،
گوندوز یاخاسینی چکیب دویمه لر !
یوز مین گونش ایلی یول کسیب گلر
سوت یولو ایچینده گزن اولدوزلار
اوردوسون سیرایا دوزن اولدوزلار
هله درینلیکده اولانلارچوخدور
باخیشلاردان گیزلی قالانلار چوخدور
بلكه یارانمامیش، سولانلار چوخدور
دوداقلارین بیزه بوزن اولدوزلار
الینی حیاتدان اوزن اولدوزلار
من ده بیر اولدوزام اولدوزلار ایچره،
سئوگيليمدن اوزاق، یالقیزلار ایچره !
جوشقون نغمه لریم قوپوزلار ایچره
سیزه دیر میلیون ایل دؤزن اولدوزلار
قاش -گؤزونو اوینات ،بزن اولدوزلار
1389-اورمو
