یئنی قاپې Yeni Qapı یئنی قاپې، یئنی باخېش دېر تۆرک دۆنیاسېنا
دوشونجه‌لر نئجه یارادیجی اولا بیلرلر؟
دوشونمک، اينسان طبيعتينين ان تمل(پایه) ائلئمئنتی اولاراق قبول ائتديگيميز بير فاکتدير.
بو دوغروسو بئله‌ديرمی؟ دوشونمک دئديکده نه‌یی نظرده توتوروق؟ عئينی فيکيرلرين داواملی گليب-گئتمه‌سی حقيقی بير دوشونجه چالیشماغیدیر می؟
“بئینیمه بیر فیکیر گلدی”- دئديگيميز چاغ، بو فيکير هارادان گلير، هارادا داياناجاق و هارا گئده‌جکدير؟ يارادیجی و یئنی دوشونجه‌لر نئجه مئيدانا گلير؟ ايش حاياتيندا بونو نئجه قوللانا بيلريک؟
بو يازيدا بو سورغولارین جاوابلارینی آختاریب،تاپیب ،سیزلرله پایلاشاجاییق.
معیّن اولونموش قالیب لرله ياشايان اينسانين یوخسول چرچووه‌سينين سینیرلی اولدوغونو، اؤيرندیگی بيليکلرين اونو ايره‌لی آپارماق يئرينه حاياتينين داها دا دارالتدیغینی باشا دوشمک چتين دئييل. بو سببدن، تحصيلين يالنيز اينسانلارين ذهنی استوروکتورو(دوزه نی-ساختار) اينکيشاف ائتديرمه‌يه يؤنلدیگینی، آما ذهنين دوغال اعتيباری ايله بو جهدين ده ايسته‌نيلن سونوجو وئرمه‌ديگينين شاهيدی اولاريق. ذهن، موجود اينفورماسييانی قوللانماقدا یئته‌نکلی اولسا دا، یئنی بير شئی ياراتماقدا یئترلی سی قدر باجاریقلی دئييلدير. ذهنه داها چوخ بيليک وئره‌رک بونا ال تاپماق مومکون دئييل.
ايش حاياتيندا، ايداره ائتمه اوزره وئريلن تحصیلی آراشديرارکن ماراقلی نوآنسلارلا(اینجه ده گیشیک لر) قارشيلاشديم. ذهنی داها کسکينلشديرمک و تجهيز ائتمک حاقدا یئته‌نی قدر بيليک اولسا دا، بو اينفورماسييالارين وئریملیلیغی نه قدر آرتيرماسی بحث ائدیب دانیشیلمالیدير. بو چه‌لیشکینین(ضدیت)تمل سببلريندن بيری “يارادیجی دوشونجه”نين نئجه ايشله‌ديگينه اؤنم وئرمه‌مکدير.
ياراديجي دوشونجه‌نين مئيدانا گلمه‌سی، ذهنینده سوره‌کلی موجود اولان اوتوماتیک دوشونجه قالیب‌لرین اورتادان قالديريلماسييلا مومکوندور.
“یئنی” فيکيرلر، آنجاق ذهنین سوسان چاغی دوغولور. اوشاقليقدان، ايش حاياتيميزا قدر اوزانان بير حايات يولوندا آلديغيميز تحصيللره ديقّت يئتيرسک گؤره‌ريک کی، ذهنی دورغونلوقلا سوسدورماق بير يانا دورسون، بيزه ذهنینده‌کی سس-کويو نئجه آرتيرا بيله‌جگيميز اؤيره‌ديلميشدير. بو سس-کويه “دوشونجه” آدینی وئرمک ايسه بيزی “بوخوولايان” باشليجا فاکتوردور.
قونویا ساده سورغولارلا داوام ائدک.
“عاغيلينيزا گلن دوشونجه‌لری ايسته‌ديگينيز چاغ دايانديرا بيلرسينيزمی؟”
“دوشونجه‌لری عاغيلينيزا سيزمی چاغيريرسينيز، يوخسا اونلارين چوخلوسو اؤزلری گليرلر؟”
بو سورغولارین جاوابلاری، بيزيم “يارادیجی دوشونجه” پروسئسه‌سینده هانسی لئوئل‌ده اولماغيميزی معیّن ائده‌جکدير.
ذهن، اوتوماتيک دوشونجه قالیب‌لرینی “کئچميش” و “گله‌جک” کیمی قبول ائدير. حال‌بوکی یئنی فيکيرلر، نه کئچميش، نه ده گله‌جک چاغ‌دا وار اولا بيلمزلر. یئنی فيکيرلر، يالنيز ايچينده اولدوغوموز “آن“دا موجود اولا بيلرلر.
بيز “ايندیکی آندا” ياشاساق و بئله گؤرونسک‌ده، فيکيرلريميز هر زامان يا کئچميش، يا دا گله‌جگه عاييددير.
بيزي “ايندی“ده ساخلاياجاق واسيطه‌لرين ان بؤيوگو “نَفَس“ايميزدير.
نفس آلدیغیمیزا ديقّت وئرديکده ذهنیمیز دورغونلاشماغا باشلايار، چونکی بيز آنجاق “ايندیکی” آندا نفس آليب-وئريريک. نفس بيزی “ايندی“ده ساخلايير. بير مودّت بوتون ديقّتيميزی نفس آلماغیمیزا يؤنلتسک ذهنیمیزين داها درين سوسقونلوقدا باتماغینی حيس ائده‌ريک. بونو حيس ائتديکجه، ايچيميزده بير راحاتليق و یئنی‌لیک دويغوسو دا اورتايا چيخاجاقدير. بئله بير سوسقونلوق و بوشالما دورومونون آردينجا شُعوروموزو دوشونجه‌يه دوغرولتساق، ذهنیمیزده مئيدانا گله‌جک یئنی فيکيرلره حئيرتلنه بيلريک.
اؤزللیک‌له ايداره ائتمه دوروموندا اولان اینسانلار، ذهنی دورغون‌لاشدیرمانی اؤيرنمه‌ليديرلر. بونون رئاللاشماسی، بیزنئس يؤنوملو راديکال قرارلاردا، اورونون(محصول) تکميللشديريلمه‌سی بؤلومونده، یئنی‌لیک‌لرده، ايداره ائتمه ایستراتئژی‌لرینده، دوغرو قرار قبولوندا، مارکالاشمادا. کريتيک(بحرانی) نقطهلرده دولغون و بارلی دوروما فيکيرلرين يارانماسینی تامین ائده‌جکدير. بو یاشامین قوجاغیندا دوغولان فيکيرلر، ایچدن ایچه هئچ بير چئلیشکی ایله اوزلشمه‌ديکلری اوچون، اينسانين دورومو‌دا گرگين وضعيت آلماياجاقدير.
آراشدیریب تدقیق ائدن: آیهان میانالی
بو یازاردان باشقا یازیلار اوخویون
