یئنی یازې‌لار / Yeni Yazılar
آنا صفحه Ana Səhifə / قادین‌لار / إله گیزله‌دیرلر سانکی اینسان‌لېغېن أن بؤیۆک سوچو دېر! / سئودا مددنژاد (کؤشه یازې)

إله گیزله‌دیرلر سانکی اینسان‌لېغېن أن بؤیۆک سوچو دېر! / سئودا مددنژاد (کؤشه یازې)

1F
إله گیزله‌دیرلر سانکی اینسان‌لېغېن أن بؤیۆک سوچو دېر! / سئودا مددنژاد (کؤشه یازې)
قادین پَدینی یئددی قاتا بۆکۆب پالتارې‌نېن آلتېندا گیزله‌دیب گئدیر!
ساتېجې کیشی بیز اوتانمایاق دئیه، یا دا اؤزۆ بو دۏغال اۏلای اۆچۆن باش‌آشاغې اۏلمایا! أن قارا و کیفیر نایلۏن‌لارېنې قادېن پَدینی ایچینه قۏیماق اۆچۆن ألینده ساخلایېب.
بؤیۆک اۏغلونو بۆتۆن قۏنولار حاققېندا اؤزگۆر بوراخېب، گؤزلرده گۆنده‌مده یاشایان اینسان‌لاردان گؤرۆنَن بیر آنا، قادېن پَدی‌نین آدېنې بئله گتیرمکدن اوتانېب اۏغلونون یانېندا بو بؤیۆک گۆناهې اوشاق پَدی آدلاندېرېر!!!
اۏغلونو قاندېریب یۏزدوراراق، آغرې‌دان اؤزۆنده قېورېلېر، سۏیوق تر آلنېندا یاغېشلانېر، رنگی-روفو سارالېر، ایگید آصلانې‌نېن گؤزۆنده خسته گؤرۆنسۆن دئیه، یالاندان گۆلۆمسه‌نیب دئییر:
-بیر شئییم دَڲیل، باشېم آغریییر!

بیزیم اؤلکه‌نین مئدیالارېندا قادېن پَدی‌نین آدې بئله رئکلام‌لاردا اؤزۆنه یئر تاپا بیلمیر!
مۆسلمان اۏلدوغوندان دۏلایې اۏروج توتور، پئریۏد اۏلان چاغې بئله اۏروج توتماق مجبورلوغوندا دېر، نه‌دن کی بو گۆن‌لرینده اؤزۆنۆ کیشی‌لرین آلچادېجې باخېش‌لارې و قادېن‌لارېن اوتاناجاقلې سئزمه‌لریندن قۏروماغې، هر شئی‌دن اۆستۆن توتور!

پئریۏد دېر. آغرې‌دان درس کیلاسېندا دایانان حالې اۏلمایان چاغ، یا دا سېناغېن تام اۏرتاسېندا آغرې‌دان گؤزلری قاران‌لېغا بۏی آتان زامان، اوستادا اۆز توتوب، بیر سۏرونو اۏلماغېنې آچېقلایېر، آتاسې‌نېن خسته‌لیڲی یا دا اؤزۆنۆن خسته اۏلماغېنې آنلادېر، کیشی اوستادې‌نېن سۏرغولو گؤزلرینه باخاراق، پئریۏد اۏلدوغونو گیزلَتمک اۆچۆن، باجاردېغې قَدَر یالان دانېشېر…!

قادېن‌لار قادېن‌لېق‌ اۏلای‌لارېنې اینکار إدن یئرده، بیر دۏغال اۏلایې خسته‌لیک آدې ایله اؤرتۆ-باسدېر إدن زامان، جسارت’له “من پئریۏد-ام”سؤزۆنۆ اوتانماقدان دۏلایې دیله گتیرمه‌یَن چاغ، کیشی‌لر و کیشی‌سئور قانون-قایدالارې اۏلان اۏرتام‌لاردان نه قدر گؤزله‌ییشیمیز اۏلا بیلر؟

پئریۏد قادېن‌لارېن أن تَمَل اۏلای‌لارېندان دېر، آما سیرّ دَڲیل، داها دۏغروسو قادېن‌لار اۏلایې دَڲیل، بو بیر أن آچېق و نئت بیر اینسان قۏنوسو دېر.
قادېن‌لېق گرچک‌لریمیزدن اوتانمازدان، اۏنلارې گیزلتمه‌ییب، اینکار دا إتمه‌یک. پئریۏد، بۏیلولوق (حامیله‌لیک)، اوشاق سالدېرماق و بونلار کیمی اۏلای‌لار هامې‌سې دۏغال و اۏلاناقلې اۏلای‌لار دېرلار. اۏنلاردان تام بیر خاطیره کیمی، یا دا بیر لذّت، آغرې و بونلارا بنزَر اۏلای‌لار کیمی، چکینمه‌ییب اوتانمازدان دانېشماق اۏلار!

دانېشېق‌لارېمېزدا کئچمیشده‌کی‌لرین إتدیک‌لرینی حیا و سایقې سانېب، اۏنلارې دستکله‌ییریک، آما بونو هله بیلمه‌میشیک کی هر دؤنه‌مین اؤزۆنه قورالې قایداسې وار!
ایندی دردینی گیزله‌دن اینسان، ایچینده درد آغاجېنې أکمکده‌ دیر. اۏ گۆن‌لره وای اۏلسون کی بو آغاج یاشامېندا بیر اۏرمان چئوریله!
اوتانمازدان گرچک و دۏغال اۏلایېوې، کۆبارجاسېنا سسله،
سن بیر قادېنسان
سسله، کسگین‌لیک‌’له اینسان‌لېق سَسیوه سَس وئره‌جک!

 

یازار: سئودا مددنژاد

چئویرَن: آیهان میانالې

Yazını bu əlifbada oxuyun: TÜRKCƏ

یازار / Yazar : آیهان میانالیAyhan Miyanalı

بو یازېنې دا اۏخویون /Bu Yazını da Oxuyun

“قۏرقود”، “قۏرقوت” یۏخ’سا …؟ / آراز أحمداۏغلو (مقاله)

“قۏرقود”، “قۏرقوت” یۏخ’سا …؟ / آراز أحمداۏغلو (مقاله) کؤچۆرن: آیناز بزرگان اؤزت حال-حاضېردا دۆنیا کیتاب‌خانا‌لارېندا …

Leave a Reply

Your email address will not be published. Required fields are marked *