ائله گیزله‌دیرلر سانکی اینسانلیغین أن بؤیوک سوچودور!

ائله گیزله‌دیرلر سانکی اینسانلیغین أن بؤیوک سوچودور!
قادین باغینی(نوار بهداشتی) یئددی قاتا بوکوب پالتارینین آلتیندا گیزله‌دیب گئدیر!
ساتیجی کیشی(فروشنده) أن قارا و کیفیر نایلون‌لارینی قادین باغینی قویماق اوچون حاظیرلاییب،ندن‌کی یا بیز اوتانمایاق،یادا اؤزو بو دوغال اولای اوچون باش‌آشاغی اولمایا!
بیر آنا کی بؤیوک اوغلونو بوتون قونولار حاققیندا اؤزگور بوراخیب و بوگون‌کی‌لردن گؤرونور گؤزلرده،قادین باغینین آدین بیله گتیرمک‌دن اوتانیب اوغلونون یانیندا اوشاق باغی(پوشک بچه)آدی ایلا سسله‌ییر بو بؤیوک گوناهی!!!
اوغلونو قاندیریب یوزدورماق‌دا آغریدان اؤزونه بورولور،سویوق تر آلینیندا یاغیشلانیر،سارالیر رنگی،گولومسه‌ییب دئییر کی بیر شئییم دئییل باشیم آغریییر! ندن کی خسته گؤروشسون ایگیت آصلانینین گؤزونده!

بیزیم اؤلکه‌نین مئدیالاریندا قادین باغینین آدی بیله یئر تاپیب رئکلاملارا گیره بیلمیر!

مسلمان اولدوغوندان دولایی اوروج توتور،قادینلیق دؤنمین‌ده(پریود) بیله اوروج توتماق مجبورلوغوندادیر ندن کی کیشی‌لرین آلچاتما باخیشلاری و قادینلارین اوتاناجاقلی باخیشلاریندان قوروماغی هر شئی دن اوستون بیلیر بو گونلرینده!

پریود دیر آغریدان درس کیلاسیندا دایانان حالی اولمایان چاغ ، یا دا سیناغین تام اورتاسیندا آغریدان گؤزلری قارانلیغا بوی آتان زامان اوستادا سورونو اولماغینی آچیقلاییر،آتاسی‌نین خسته‌لیگی یا دا اؤزونون خسته اولماغین آنلاتیر،کیشی اوستادین سوروجو گؤزلرینه باخاراق پریود اولدوغونو دئمه‌مک اوچون باجاردیغی جان یالان سؤیله‌ییر….!

قادینلار قادینلیق‌ اولای‌لارین اینکار ائدن یئرده،بیر دوغال اولایی خسته‌لیک آدی ایلا اؤرتوب گیزله‌دن زامان،

جسارتله “من پریود-ام”سؤزونو اوتانماقدان دیله گتیرمه‌ین چاغ ،کیشی‌لر و کیشی سئور توپلومدان نه قدر گؤزله‌ییشیمیز اولا بیلر؟

پریود یا قادینلارین آیلیق دؤنمی  قادینلارین اَن تمل و قولای بیر اولایلاریندان دیر،آما سیر(راز) دئییل،داها یاخشی‌سی قادینلار یئرینه بیر اینسان قونوسو آدلاندیرماق دیر.

قادینلیق اولای‌لاریمیزدان اوتانمادان اونلاری گیزلتمه‌ییب،اونلاری اینکار ائتمه‌یک،پریود،بویلولوق(حامیله‌لیک)،اوشاق سالدیرماق….بونلار هامیسی دوغال و اولاناقلی اولای‌لاردیلار،کی اونلاردان تام بیر خاطیره کیمی یا دا بیر لذت،آغری و بونلارا بنزه‌ر اولای‌لار کیمی چکینمه‌ییب اوتانمادان دانیشماق اولار!

دانیشیقلاریمیزدا کئچمیشده‌لرین ائتدیک‌لرینی حیا و سایغی سانیب اونلاری دستکله‌ییریک ،آما بونو هله بیلمه‌میشیک کی هر دئوریمین اؤزونه قورالی قایداسی وار!

ایندی دردینی گیزله‌دن اینسان ایچینده درد آغاجینی اکمکده‌دیر.او گونلره وای کی بو آغاج حایاتیندا بیر اورمان یاردا.

اوتانمادان گرچک و دوغال اولایینی کیبارجاسینا سسله،

سن بیر قادین‌سان

سسله کسگینلیک‌له سسینه سس وئره‌جک اینسانلیق!

 

یازار : س-م

چئویرن : آیهان میانالی

Yazını bu əlifbada oxuyun: TÜRKCƏ