رنگ‌لی کارانداش‌لار / شريف آغايار
قادين إولی‌ليک‌دن يۏرولموشدو، کيشی عاييله‌سيندن يئنی’جه آيريلميشدی…
قادينين إولی‌ليک‌دن يۏرولدوغو کيشی‌نين، عاييله‌سيندن آيريلديغی واخت، تصادۆفن سۏسيال شبکه‌ده تانيش اۏلدولار.
قادين، بو ايل مکتبه گئدن اۏغلوندان، کيشی، ایسکريپکا(ویۏلۏن) چالان قيزيندان دانيشدی، بير-بيرينه اوشاق‌لارين شکیل‌لرينی آتديلار.
داريخديلار بير-بيريندن اؤترۆ، آيدان-اولدوزدان، داغدان-دره‌دن، أن چۏخ دا اوشاق‌لاريندان دانيشماغا احتيياج دويدولار.
گۆن‌لرين بيرينده، گؤرۆشمک قرارينا گلديلر.
بودور، آخشامين آلا-تۏرانين‌دا، ساکيت پارک‌لارين بيرينده ياناشی اۏتوروبلار. گؤز-گؤزه گلمک‌دن اوتانيرلار. دانيشماغا سؤز تاپميرلار. کيشی نهايت بۏغازينی آريت‌لايير:
– اۏغلون نئجه دير؟
قادينين اۆزۆن‌ده خۏشبخت گۆلۆمسه‌مک دۏلاشير، گؤزلری، گئجه چیراق‌لاری، یاشام عشقی ايله، عکس إتديرير:
– اۏنا چۏخلو کارانداش‌لار آلميشام…
ألينی ايره‌لی اوزاديب، بارماق‌لارينی هاوادا اۏينادير:
– ناخيش‌لی… اوزون… رنگ‌به‌رنگ…
اودقونوب دۏ’روخور، گؤزلری خفيف’جه ياشایير، سسی تيتره‌يير:
– حئييف، بو گۆن بيرينی مکتب‌ده ايتيريب.
آرايا يئنه سس‌سیزلیک دۆشۆر. بۆتۆن بيلديک‌لری سؤزلری، اونودورلار. اوزون سس‌سيزليڲين آردين’جا کيشی اؤزۆندن آسيلی اۏلمازدان سۏروشور:
– هانسی رنگی ايتيريب؟..
شريف آغايار
کؤچۆرۆب اویغونلاشدیران: آیهان میانالی
کارانداش: قلم
Yazını bu əlifbada oxuyun: TÜRKCƏ
