یئنی قاپې Yeni Qapı یئنی قاپې، یئنی بير باخېشدېر تۆرک دۆنیاسېنا
واز کئچین بو سئودا’دان! / محمد رحمانیفر
دۏخسان ایل‌دن آرتیق دیر، بو اؤلکه‌ده تۆرکجه‌نی آرادان آپارماق آماجی ایله بۆتۆن گۆجۆنۆزۆ بیر یئره ییغیب‌سینیز. آنجاق، بو‌گۆنه دک، نه تک’جه بو یۏل‌دا هئچ بیر اوغور قازانا بیلمه‌ییب‌سینیز، بلکه سیزین چالیشمالارینیزین ترسی‌نه، بو دیل گۆنۆ-گۆن‌دن داها آرتیق چیچک‌لنمک‌ده، داها آرتیق گلیشمک‌ده‌‌دیر.
اینانین سیز هئچ زامان بو غیر-اینسانی آماجینیزا چاتمایاجاق‌سینیز. بیرآز دۆشۆنسه‌نیز، بو سئودا’دان واز کئچرسینیز. بو هم سیزین خئیرینیزه دیر، هم ده بیزیم! بیزیم دیلیمیز اؤله‌سی بیر دیل دَگیل! نه سیز، نه ده هئچ کیمسه بو دیلی اؤلدۆره بیلمه‌یه‌جک‌دیر. بونو سینادینیز دا، سۏنوجونو گؤردۆنۆز ده! واز کئچین بو قارا سئودا’دان، یۏخ’سا بو سیزه چۏخا باخاجاق دیر!
بونو دا بیلین: بیز هئچ بیر دیلین دۆشمنی دَگیلیک! بیزیم ایسته‌گیمیز بۆتۆن دیل‌لرین اؤز یئرین‌ده اۏتورماسی دیر. آنجاق، سیزین یانلیش سیاست‌لرینیزین سۏنوجو اۏلاراق، بوگۆن چۏخ‌لاری فارسجایا حتی فارس‌لارا نیفرت’له باخیرلار. بونون دا سوچلوسو سیزسینیز. هن، سیز آذربایجان‌دا نیفرت شیتیل‌لری أکدینیز. یۏخ’سا تاریخ بۏیو سیزین دیلینیزی، حتّی سیزین اؤزونوزدن داها آرتیق بیز قۏروموشوق.
سیز فارسجانی قۏروماق ماهناسی ایله بیزیم دیلیمیزی آرادان آپارماغا چالیشماسایدینیز، بلکه إله بوگۆن ده کئچمیش‌لرده‌کی کیمی، هر ایکی دیل ده، آذربایجان‌دا چیچک‌لنمک‌ده ایدی!
