سن‌سیزلیک‌ / ارشد نظری

سن‌سیزلیک‌ / ارشد نظری

نئچه پایېز کئچیر اۏ آیرې‌لېق‌دان
یوبانما قار یاغار خاطیره‌میزه
یئنه قاران‌قوش‌لار گل ها گلـده دیر
باغچادا خزل‌لر یئتیشیب دیزه

چینار آغاجې‌نېن سۏن یاپراق‌لارې
وحشی یئل‌لر ایله عؤمۆر سۆره‌جک
سن’له أکدیڲیمیز آلما آغاجې
یاری‌سی دیش‌لَمنیش آلما وئره‌جک

کۆچه‌میزده‌کی اۏ کۏولان آغاجې
ایندی ده اؤزۆنۆ اؤوسه‌ییر سن‌سیز
اۆرک پنجره‌مین سۏن باخېشې‌سان
ایندی آستانام گؤینه‌ییر سن‌سیز.