قادېن اۏلماق / گۆل‌ساده ایبراهیملی (شعر)

قادېن اۏلماق / گۆل‌ساده ایبراهیملی (شعر)

بیر کیشی‌نین سرخۏش‌کن خاطېرلادېغې قادېن اۏلماق‌ دېر “سئویلمک”.

یالقېزلېغې دېر،

قاچېب-قاچېب اینسان‌لاردان

یۏلونو ایتیرمیش اوشاق کیمی خاطیره‌لره سېغېنماقدی.

سوسقونلوغودو،

یۏخسونلاشماسېدې،

آدام‌سېزلاشماسېدې…

هر گئجه

یانېنداکې قادېنا

کۆره‌ڲین دؤنمه‌سی دیر “سئویلمک”.

سیقار-سیقار اؤزۆنۆ اؤلدۆرمه‌سیدی.

دۏست مجلیس‌لریندن تله‌سیک گئتمه‌سیدی.

وئریلن سوال‌لارا جاواب‌سېزلېغېدې.

تانېش کۆچه‌لرین،

دۏغما آدام‌لارې‌نېن “اؤزگه‌سی” اۏلماسېدې

“سئویلمک”.

اۆستۆندن کیمسه‌سیزلیک،

یازېق‌لېق تؤکۆلمه‌سی دیر.

بیر کیشی‌نین اؤزۆنه چکیلمه‌سی دیر “سئویلمک”.

هر گۆن گؤرۆش یئرینـه

عئینی واختدا،

ساعاتدا

اومودسوز گلمه‌سیدی.

تایې آیرې یازېلمېش بیر آدېن

هئجا-هئجا کیشی دۏداق‌لارېنې اؤپمه‌سی دیر.

دؤش جیبینده ساخلادېغې أسکی، أزیک بیر شکلین اؤنۆنده هئیکـَله دؤنمه‌سی دیر.

بیر کیشی‌نین کیشی‌سایاغې اؤلمه‌سی دیر… “سئویلمک”.

یئردن، گؤڲدن ألینی اۆزۆب

بیر خیالین خاطیره‌سینـه تاپماق…

بیر کیشی‌نین سیرّی اۏلماق‌ دېر،

قادېن اۏلماق!

Yazını bu əlifbada oxuyun: TÜRKCƏ