ایستانبول / سخاوت عزتی – عندلیب
سنه حئیران باخېرام مین گؤزۆنن ایستانبول،
گلمیشم قوللوغونا سۏن حېزېنان ایستانبول.
قېشېن اۏغلان چاغې‌دېر دۆشدۆ سنین’له دیدار،
خۏش کئچیندی نئچه گۆن قېش بیزی‌نن ایستانبول.
قېشدا اۏلسا منی آلقېشلادې گۆل‌لر بوردا،
بزه‌نیب‌دیر نه گؤزل نرگیزی‌نن ایستانبول.
توفیقی ، عاکیفی ، ناظیمی ده یاد إده‌لیم،
فاتیحه قاتقیلی قوتسال سؤزۆنن ایستانبول.
فاتیحین آت نالې‌نېن ایزلری حالا گؤرۆنۆر،
فخر إدیر میللتیمیز مرد ایزی‌نن ایستانبول.
منی حئیران إدیجی آبیده‌لر وار بوردا،
هۆنرین ذۏوقونو بولدوم سیزی‌نن ایستانبول.
یئر اۆزۆنده بیلیرم چۏخلو شَهَرلر واردېر،
کؤنلۆمه حکّ اۏلونوب تبریزی‌نن ایستانبول.
عندلیب سنده اۏلان هر شئیی پارلاق گؤردۆ،
گئجه‌نیز فرق إله‌میر گۆندۆزۆنن ایستانبول.
