اؤزلم / تایماز میانالې

اؤزلم / تایماز میانالې

گؤزلریمدن گئده‌رک گؤیده سنی ایزله‌میشم

گئجه گۆندوز او گؤزل گؤزلریوی گؤزله‌میشم

آند اولا یازمادېغېم شعرلرین دویقوسونا

سنی قوشمامدا قالان دویقو کیمی اؤزله‌میشم

بیلمیرم هاردا قالېب‌دېر یئنه سن‌سیز غزلیم

بیر دنیز حسرت’یله بو گئجه سن‌سیزله‌میشم

هامی حئیران باخاراق گؤزلریمین یول‌لارینا

بیلمه‌ییرلر کی گؤز آردیندا سنی گیزله‌میشم

گئدیرم دای اوچوروم‌لاردان آتام تایمازې من

منده‌کی سن‌لری چوخداندی داها چؤزله‌میشم….