سۏنرا اونودورسان هر شئیی / گۆل‌آی طاهیرلی (شعر)

سۏنرا اونودورسان هر شئیی / گۆل‌آی طاهیرلی (شعر)

 

سۏنرا…

سۏنرا اونودورسان هر شئیی…

اۏلوب کئچن‌لری،

اؤلۆب کؤچن‌لری…

دۏغولوب بؤیۆدۆڲۆن اۏ اوچوق-سؤکۆک إوی ده…

حَیَطده‌کی یام-یاشېل آغاج دا

یاواش-یاواش تؤکۆر یارپاق‌لارېنې،

هئچ اۏلمامېش کیمی

سیلینیب گئدیر خیالېندان…

سۏنرا اونودورسان هر شئیی…

اونودورسان گئجه‌نین،

گۆندۆزۆن رنگینی،

سن کی هئچ توتا بیلمه‌دین

بو دۆنیانېن آهنگینی…

ألیفباداکې حرف‌لر اؤلۆر،

رقم‌لر بیرجه-بیرجه دۆشۆر تقویمدن،

بۏشلوق‌لارېن رنگینه بۏیانمېش

اۏ دۏغولدوغون گۆن ده

باشقا گۆن‌لر کیمی سۆرۆشۆر تقویمدن…

سۏنرا اونودورسان هر شئیی…

قۏرخوب باغېرېرسان گۆزگۆدن بۏیلانان

اۏ یاد گؤزلرین دهشتیندن…

قۏووشا بیلمیر کیرپیک‌لر ده

دۏنموش گؤز یاش‌لارې دۆشر دئیه.

ایل‌لردیر قۏرودوغون اۏ هئیکل

آیې‌لار کۆسر دئیه…

سۏنرا اونودورسان هر شئیی…

کیم‌دیر باجېن، قارداشېن؟

سېرداشېن، یۏلداشېن؟

کیمسن سن؟

آخې کیم‌دېر

سنی دۆنیایا گتیرن قادېن؟

سۏنرا اونودورسان هر شئیی…

قارېق-قارېق نه قالېب’سا یانېندا

اۆچۆنجۆ آدام کیمی باخېرسان اۏنا دا…

قۏنشونون آغرې‌سېنې حیص إده بیلدیڲین قدر

حیص إدیرسن اؤزۆوۆ،

سن چۏخدان سؤندۆرمۆسن

اۆره‌ڲیمین یانقې‌سېنې، کؤزۆنۆ…

سۏنرا اونودورسان هر شئیی…

اونودورسان

و باشلایېرسان یاشاماغا…

 

گۆل‌آی طاهیرلی

Yazını bu əlifbada oxuyun: TÜRKCƏ