یئنی قاپې Yeni Qapı یئنی قاپې، یئنی بير باخېش‌دېر تۆرک دۆنیاسېنا
بیز خارابات أهلی‌ییک… / علی‌آغا واحید (شعر)
بیز خارابات أهلی‌ییک، مئیخانه‌لردن چېخمېشېق،
با‌ده‌لر نوش إتمیشیک، پئیمانه‌لردن چېخمېشېق.
آتشی-غمدن نه قۏرخاق کیم، سمندرخیصلَتیک،
شمع‌لر یاندېرمېشېق، پروانه‌لردن چېخمېشېق.
ایندی بیز ایکراه إدیب مئیدن، نظردن دۆشمۆشۆک،
یۏخ’سا مین-مین مجلیسی-مستانه‌لردن چېخمېشېق.
گاه اؤپۆب یارېن آیاغېن، گـه دۏلاننېق باشېنا،
بیز پریشان زۆلف‌لرتک شانه‌لردن چېخمېشېق.
قدرۆ قیمَت‌سیز بیزی ظنّ إتمه، واحید، عاریف اۏل،
پۆربها گنجینه‌ییک، ویرانه‌لردن چېخمېشېق.
