یئنی قاپې Yeni Qapı یئنی قاپې، یئنی بير باخېش‌دېر تۆرک دۆنیاسېنا
بایرام عمی / زامان پاشازاده (شعر)
نه سؤزده یاز دویولور دای نه سازدا بایرام عمی
فصیل-فصیل یوبانیبسان بو یاز دا بایرام عمی
کئچن اۏ قېت‌لېق ایلینده یاغېش-یاغېش دیله‌دیم
بو ایل دیزیم سو گتیردی نامازدا بایرام عمی
بو قارتېمېش قارا قارلاردې قۏرخودور گؤزومو
داغېلمامېش سارې اؤد تک بۏغازدا بایرام عمی
خاچ ایسته‌ینده داش آتدې سینیر’له شاختا بابا
بَزَندی قارقېزې قان’لا بیرآز دا بایرام عمی
بیتیبدی آغری داغېندا مین آغرې‌مېن چیچه‌ڲی
باتېبدې بیر شَهَر آرزوم آرازدا بایرام عمی
گل آددېمېن’لا بو یوردو یاشېل-یاشېل بئزه چَک
کی سوسماسېن ساری بۆلبۆل بو یاز دا بایرام عمی
