عسگر، سيلاحېوې آشاغې إندير / هدیه شفاقت (شعر)

عسگر، سيلاحېوې آشاغې إندير / هدیه شفاقت (شعر)

عسگر،
سيلاحېوې آشاغې إندير…
اؤلۆم، قان ايسته‌ين، قيصاص ايسته‌ين
گؤزۆوۆن ايچینـه باخماق چتيندی
نه سرحد پۏزانام،
نه دۆزن پۏزان
نه سۏيوق سيلاحېم، اۏدلو سيلاحېم، نه تۏپوم، نه مرمیم…
وار منيم…
اۏلانېم تک بو دېر-قوش کيمی چېرپېنان قلبيم…
بيليرم،
سينه‌مه توشلانان سيلاح
آچېلا دا بيلر، آچېلمايا دا
يالوارېش، گؤز ياشې، ايصرار، إعتيراض
هئچ بيری
بير ايشه يارامېر ايندی…
آما دويورسان‌مې، حک إديلديڲين تابلۏنون تک آدې-
موحاريبه دير…
و من ايسته‌ميرم سن اؤلدۆره‌سن…
…يېغېلار بير يئره بَبَک‌لريم ده
اؤن و آرخا جبهه،
دهشتلی حيسّ دير
گؤره‌رم تؤکۆلر کتانېن اۆسته
قارېشار ساواشېن بۆتۆن رنگ‌لری…
تابوت‌لارې یۏللانار گئرييه-إوه،
سسله‌نر گاه اۏردا، گاه بوردا آذان
و دوعا
و لعنت
کيلیسا زنگ‌لری…
…اوشاق‌لار
کۆچه‌ده وورولوب قالار…
بئش آددېم اۏ يان‌دا يانار هله ده
داغېلمېش بير إوين خارابازارې،
وورولموش عسگرين مئييتی اۆسته
بير قادېن آغلايار…
قادېن کی، قادېن!…
چيچک‌لر…
آچېلار حاصار ديبينده
گۆلله سس‌لرینـه
بير ده گۆنَشه…

بالاجا بير قېزېن توتوق أل‌لری
ياپېشېب قالخماغا بير أل آختارار
ايچيندن کدرلی داغېنتې‌لارېن…
…رسّام
داوام إدر، اۏنون فېرچاسې
دۆنيانېن أن کسگين رنگینی-قانې
باهالې تابلويا چئويرمکده‌دير…
سۆمۆک‌لر-أعلا بیر چئشید چرچيوه‌لر دير…
…عسگر
سيلاحېوې آشاغې إندير…

چېخ گئت ياد تۏرپاقدان،
هاردا’سا،
اۏردا-
إلينده سنی بير قادېن
گؤزله‌يير…