دۆنیا نه یالان تاپماجا دېر؟ / محمدحسین بهجت تبریزی (شهریار) (شعر)

دۆنیا نه یالان تاپماجا دېر؟  / محمدحسین بهجت تبریزی (شهریار) (شعر)

ایل کئچدی، باهار اۏلدو، خبر یۏخ گۆلۆمۆزدن،

گۆل آچمادې، قۏوزانمادې سس بۆلبۆلۆمۆزدن.

بایرام گۆنۆمۆز، یاسلې گؤرۆش‌لر’له کئچرکن،

شادلېق نه اوماق بیز آیېمېزدان ایلیمیزدن

تقویم آلابیلمَم أله، گؤردۆم منه تقویم،

«گؤزداغ» دېکې (تقویمى) ده گئتدى ألیمیزدن.

بیز باغچامېزې بئلله‌یه بیللیک؟ داها هئیهات!

نایمید أجلین بئلدارې وورموش بئلیمیزدن

(تقویمى) اۏلارداندې کى، یاددان چېخابیلمَز،

یاددان نئجه چېخسېن، آدې دۆشمۆر دیلیمیزدن

إل ایچره، باشى بیر یئره گاهدان اویېغاردې،

اۏ گئتدی، یېغېنجاق دا یېغېشدې إلیمیزدن

یۏلداش سپه‌لَندى، إله بیل سام یئلى أسدى،

سَرسامدې قالان بیزلره، بو سام یئلیمیزدن

دۆنیا نه یامان تاپماجا دېر باش چېخاران یۏخ،

بیز باش تاپاق آنجاق، بو قوبول-منقَلیمیزدن.

(تقویمى) کیمى دوز کیشى؟ هیهات تاپیلماز،

بیر شمع‌دى کى، کؤچدۆ بیزیم محفیلیمیزدن

اۆچ نازلې بالا، همسر ایله قالدېلار- باش‌سېز،

یانساق دا اۏد أل چکمه‌یه‌جکدیر کۆلۆمۆزدن.

بیر (کافیه) اۏندان باجارې یادیگار اۏلسون

باش یۏلمادا، بیرتئلدی قالان کاکیلمیزدن

إل بیرده دئسین: «سئل سارانې قاپدې قاچېرتدې،

آغلاشدې بولودلاردا بو داشقېن سئلیمیزدن

بیر مزرعه دیر (شهریار)ېن عؤمرۆ، نه حاصیل،

سئل، قۏیمورو بیرچؤپ ده قالا حاصیلیمیزدن