چۏبان‌یاستېغې‌نېن لچک‌لرینده أزیلمیش اومودلارېم / آکشین خیال (حیکایه)
اۏنون’لا سۏن گؤرۆشۆمۆز ایدی. باجاردېغېم قَدَر ساعاتا باخماماغا چالېشېردېم کی، بلکه مؤعجۆزه باش وئره، زامان دایانا و بیز آیرېلمایاق. أوّل‌لر هر گۆن گؤردۆڲۆم اۆز بو گۆن منه داها دا گؤزَل گؤرۆنۆردۆ. هر گۆن ساعات‌لار’لا اییله‌دیڲیم ساچ‌لارې بو گۆن داها گؤزَل اییمسه‌نیردی سانکی. گؤزۆمۆ هئچ اۏندان چکمیر، دانېشدېغې هر سؤزۆ یادېمدا ساخلاماغا چالېشېردېم. هر زامان گزدیڲیمیز پارکې بو دفعه أل-أله دَڲیل، یان-یانا گزیردیک.
یاز فصلی اۏلسا دا، سرین مئح آغاج‌لارېن یارپاق‌لارېنې سېغاللایاراق، چیچک‌لرین اییینی بورنوموزا گتیرسه ده، منیم ایچیمده قار‌لې، چۏوغونلو بیر قېش طۆغیان إدیردی. آما بعضی داورانېش‌لارې، ایستی مۆناسیبتی ایچیمده‌کی قېشېن قارېنې أریده‌جَک بیر اومود ایشېغې یاندېرېردې. دۆشۆنۆردۆم کی، یَقین، فیکریندن دانېشېب آیرېلمایاجایېق. نه بو باره‌ده سۏروشماغا جۆرأتیم چاتېردې، نه ده “بلکه آیرېلمایاق، قالدېغېمېز یئردن داوام إدَک” دئمه‌ڲه جسارَتیم یۏخ ایدی. ساده‌جه، ایچیمده‌کی اوموددان بَرک-بَرک یاپېشاراق، “آیرېلمایاجایېق” دئیه اؤزۆمۆ ایناندېرماغا چالېشېردېم. قفیل گؤزۆم پارکېن یانېندا أکیلمیش چۏبان‌یاستېق‌لارېنا ساتاشدې. اۏنون أن سئودیڲی چیچک ایدی. یان-یؤوره‌ده پۏلیس وارمې دئیه ساغا-سۏلا باخېب، بیر چۏبان‌یاستېغېنې دریب، سانجدېم ایییـنه آلوده اۏلدوغوم ساچ‌لارېنا. گؤزلریمین ایچینه باخېب گۆلۆمسۆندۆ. سۏنرا گؤزلرینی یوماراق، دریندن نفس آلېب: “هئچ آیرېلمالې هاوا دَڲیل”،- دئییب، قۏلوما گیره‌رَک، “آجمېشام گئد‌ک بیر یئرده اۏتوراق”،- دئدی. ایچیمده باش قالدېرمېش کیچیجیک اومود ایشېغې شؤعله‌لنه‌رَک، بؤیۆک بیر گۆنَشه چئوریلدی.
یئمه‌ڲیمیزی بیتیریب چای ایچه-ایچه هاوادان، سودان صؤحبَت إدیردیک. ساچېنداکې چۏبان‌یاستېغېنې چېخاردېب ألینده اۏیناتماغا باشلادې. اۏینا‌دا-اۏینا‌دا دا بارماق‌لارې‌نېن آراسېندا ساپلاغېنې قېردې. سانکی، گۆلۆن ساپلاغېنې دَڲیل، منیم اۏنورقامې قېردې همین آن. سۏنرا بارماق‌لارې ایله چیچه‌ڲین لچک‌لرینی قاتلایاراق أزمه‌ڲه باشلادې. چۏبان‌یاستېغې‌نېن لچک‌لری أزیلدیکجه آیرېلمایاجاغېمېزا داییر یارانمېش اومودلارېم بیر-بیر اۏ لچک‌لر کیمی أزیلمه‌ڲه باشلادې. ایچیم قان آغلاسا دا، بونو اۆزه گتیرمه‌ڲه چالېشېر، یالانچې بیر تَبَسّۆم’له گۆلۆمسه‌ییردیم. گئد‌رکن ساپلاغې قېرېلمېش، لچک‌لری أزیلمیش چۏبان‌یاستېغېنې ماسانېن اۆستۆنده‌کی زیبیل قابېنا آتېب، آیاغا قالخدې. بۆتۆن خۏشبخت‌لیڲیم ده، اومودلارېم دا همین گۆن چۏبان‌یاستېغې ایله بیرگه إله اۏ زیبیل قابېندا قالدې.
چۏبان‌یاستېغې: سارې پاپاتیا، بابونه، چیچک آدې.
