آرتیق بو گؤوده‌یه احتیاجیم یوخ! / سوسن نواده‌رضی (مقاله)

آرتیق بو گؤوده‌یه احتیاجیم یوخ!

یارغیلامایالیم، آچیق اولماغی اؤیره‌نه‌لیم

سوسن نواده رضی

بونجا شیددتلی، دوروست و ایچدن، هم ده یاشامین بوتون بویوت‌لارینی درین‌دن درینه یاشایان بیریسی بلکه ده هئچ گؤرونمه‌میشدیر.

یارغیلاماق، دایانماق دئمک‌دیر، قاپی‌لاری بوتون ایمکان‌لارا باغلاماق، دایره‌نی کیچیلتمک، گؤزو دارالتماق دئمک‌دیر. یارغیلامایالیم ،آچیق اولماغی اؤیره‌نه‌لیم. اینسان‌لارین سایی قدر دونیا وار، یاشام وار، یاشام طرزی وار. اینسان‌لاری بیری- بیریندن آییرد ائدیب سئچدیرن، اونلارین فیزیک‌لری دئییل، دَنه‌ییم‌لری‌دیر، بیچه‌م‌لری‌دیر.

ونسان ون گوگ Vincent van gogh چوخ بؤیوک چاغ‌داش رسام‌لاردان‌دیر. او، بیر ایل بویونجا فرانسانین أن ایستی و یاندیریجی گونشی اولان بیر بؤلگه‌ده،گونشین بوتون دوروم‌لاری‌نین و هر موقعیتی‌نین رسیم‌لرینی چکدی. بیر سیرا تابلو: تمامان گونش‌دن؛ سحر گون چیخان‌دان آخشام گون باتانا کیمی. هر کس اونون دلی اولدوغونو سانیردی. حکیم‌لر بیله گون ووروب بئینینه دئیه، اونو خسته سانیردیلار. ون گوگ  دلی خانادا  دا بوتابلولاری چکمه‌یه داوام ائتدی . ایلگینج بوراسی‌یدی کی، دلی خانادا رسم ائتدیک‌لری، اوندان اؤنجه و سونرا چکدیک‌لریندن قات – قات داها یاخشییدی!

ونسان ون گوگ، بیر ایل دلی خانادا یاتیریلدیغی سوره ایچینده ان یاخشی صنعت اثرلرینی و یارادیجیلیغی‌نین

زیروه یاپیت‌لارینی یاراتمیشدیر. تابلولاری‌نین پریشان اولدوغوندان دولایی هر کس اونون دلی اولدوغوندان قوشقولانیردی. هئچکیمسه اونلارین نه اولدوغونو، نه آنلام داشیدیغینی  باشا دوشموردو ، قاورایا بیلمیردی.

او، رسیم‌لری‌نین بیرینده  اولدوزلاری ایلان کیمی بوروق (مارپیچ) چکمیشدی. تنقیدچی‌لر یونو، اونون دلی اولدوغونا قانیت اولاراق  ده‌یرلندیریردیلر. ون گوگ دئییردی، اولدوزلاری چکمک ایسته‌دیییمده، بوتون وارلیغیم اونلارین

ایلان بنزه‌ری اولدوغونو هایقیریر.

یوز ایل سونرا بیلیم بئله بیر سونوجا  چاتدی کی، اولدوزلار گئرچکدن ده  ایلان کیمی‌دیرلر. دئمک، ون گوگ دلی‌می‌یمیش یوخسا یوز ایل اؤز زمانه‌سیندن ایره‌لی‌ده یاشاییرمیش؟ دلی‌یمیش یوخسا اؤزل باخیش آچی‌سیندان، باشقالاریندا اولمایان و اولامایان بیر آچی‌دان باخیرمیش دنیایا؟

اولدوزلارین  ایلان کیمی  اولدوغونو کشف ائله‌ین بیلیم  آدام‌لاری أن سون بیلیم‌سل تئکنولوژی  و  جیهازلارلا بو کشفه نایل اولموشلارسا  دا، هله گؤزلری‌یله گؤره بیلمه‌میشلر اولدوزلارین ایلان کیمی‌لییینی، یالنیزجا کشف ائدیبلر!

بلکه ده ونسان ون گوگ بوتؤولوک‌له  فرق‌لی بیر بیلیگه صاحیب ایمیش. نه معلوم! بللی اولان بیر تک شئی وار؛ یارغیلامامالی. دوغرو اولوب اولمادیغینی ذهنیمیزه سیغیندیرمادان، بوراخالیم دا هر کس اؤزو اولسون، اؤزونو یاشاسین.

دلی خانادان سونرا، ون گوگ سون تابلوسونو چکمیش، یئنه ده قونو:گونش !

او قارداشینا قیسا بیر مکتوب‌دا  بئله یازمیش: “منیم ایشیم تکمیل‌دیر. من گونشین موقعیت‌لرینی رسم ائدیردیم. بیری أکسیک‌ ایدی چونکی سن منی دلی خانادا یاتیرتدین  و اونلار منی دلی ائدن گونش‌دیر دئیه، گونشی رسم ائتمه‌ییمه  مانع اولدولار. سون تابلونو چکدیم، خلاص اولدوم. تابلومو کامیل‌لشدیردیم، ایشیم سونا ائریب‌دیر. من مطلق رضایت‌چیلیق حیس ائدیرم. آرتیق بو گؤوده‌یه  احتیاجیم یوخ، بو اوزدن کندیمی اؤلدورورم.“

بو مقاله‌نی یئنی قاپې‌نین اۏرتۏقارفی‌سی’یله اۏخویون!