خاطیریمده‌کی سئوگی / تبسم عبداله‌زاده (شعر)

خاطیریمده‌کی سئوگی / تبسم عبداله‌زاده (شعر)

بوز اۆرَک‌لر شَهَرینده هر گئجه

سن‌سیزلیکدن یازدېم دفتر قانادې

قان قوسارکن اۆزۆ قارا سؤزجۆک‌لر

قلم دۏلوب داشېب پۏزدو هرزادې

آیرې‌لېقدان سۏلوب بوردا فصیل‌لر

نه فرق إدیر پایېزمې یا باهارمې؟

اۆرَک سؤزۆ اۆزده گۆزگۆ یارادېر

هامې بیلیر، سندن گیزلی اۏلارمې؟

سن عیصیانلې دالغالانان دنیز قال

عیصیان‌لاردا سئوگی آنلام قازانېر

سۏرما نه‌دن سئودیم سنی دلیجه

واز کئچ سؤزۆ اوزاتدېقجا اوزانېر

قانسا کؤنلۆن درد اهلی‌نین سؤزۆنۆ

دویاجاقسان سؤزلریمده قان ایزی

گمین باتسا یابانجې بیر آدادا

اونوتماسان یاشام بۏیو بو قېزې

داشا دؤنن دیلک‌لری بیر گئجه

گؤزۆ باغلې وئردیم یئله سئوگیلیم

دویقولاردان پارچالانمېش غرورو

سارایلانېب آتدېم سئله سئوگیلیم

بؤیۆک دردلر گۆجلَندیریر اینسانې

اۆزده گۆلۆب اۆرَکده قان آغلادېم

باخېش‌لارېن گۆنش کیمی سېم-سېجاق

چیچک کیمی سنه اۆرَک باغلادېم

خلق ایچینده اۆزۆم دۏلو تبسم

گۆندۆز گۆلۆب گئجه درددن یاتمادېم

دؤنرگه‌میز دؤنۆب آیرې دۆشَرکن

بیرآن سنی خاطیریمدن آتمادېم.

تبسم عبداله‌زاده