یئنی قاپې Yeni Qapı یئنی قاپې، یئنی باخېش دېر تۆرک دۆنیاسېنا
بیر اومود وئر، اوزاقداکې یاخېنېم / جاببار چتین (2شعر)
1-بیر اومود وئر
سن گئده‌لی گؤزۆمه،
غَنیم دۆشدۆ یوخولار.
آخې کیم اؤز ایچیندن،
بئله مؤحکَم یېخېلا‌ر.
کیمه دئییم دردیمی،
کیمین وئجینه‌یَم‌کی؟!
دارېخېرام سؤزۆنۆ،
سنه نئجه دئیَم‌کی؟!
مندن اوزاق‌لار‌داسان،
اوزاق‌لاردان اوزاقسان.
بیر اومود وئر،گؤزله‌ییم،
هاچان قایېداجاقسان؟!
نه جاواب وار، نه اومود،
یېخېلېرام بئله‌جه.
اؤزۆم پارام-پارچایام،
داغېنېق دېر هر گئجه‌م.
اینصاف دینین یارې‌سې،
سن اینصافا یاد آدام.
بئله دین‌سیز، ایمان‌سېز،
چتین بیر ده قایېدا.
2-اوزاقداکې یاخېنېم
گؤر نئچه پایېزدې گؤرمۆرَم سنی،
گؤر ایندی دۆشۆرمۆ آدېن دیلیمدن
بو دۆنیا گؤزۆمدن دۆشمز بلکه ده،
بیر دفعه أل آتېب، توتسام ألیندن.
اوزاق‌لېق سئوگییه “چین سدّی” کیمی،
آدامې زامان‌سېز طاقتدن سالېر.
داغ بۏیدا سئون‌لر، قارشې-قارشېیا،
“بئرلین دووارې”ندان ساللاشېق قالېر.
هله کی، اومودلار جۆجه‌ریر، بیتمیر،
سیقار بیتسه ده، دۏلسا کۆل‌قابې.
بو بؤیۆک حَسرَتی کسیب، تؤکردیم،
یاتسایدې ألیمه بالتانېن ساپې.
ایچکی شۆشه‌سیندن شعر تؤکۆلۆر،
سنی دۆشۆندۆکجه ایچسَم، حلالدې.
بیرجه باخېشېن’لا، خۏش گۆلۆشۆن’له،
بۆتۆن وارلېغېمې ألیمدن آلدېن.
ایندی دوعا‌لارېم سنه سؤیکه‌نیر،
سَجده‌یه گئدیرم سَنین اوغرونا.
سَنین یاشامې‌نېن بوندان سۏنراسې،
أن کیچیک یانلېشېن، بؤیۆک دۏغرونام.
