بیر قادېن واردې دئیه‌جکسن / گۆل‌ساده‌ ایبراهېملې (شعر)

بیر قادېن واردې دئیه‌جکسن / گۆل‌ساده‌ ایبراهېملې (شعر)

بیر زامان‌لار
بیر قادېن واردې دئیه‌جکسن،
خیا‌لې سمادان،
أل‌لری یۏسوندان،
اۆره‌ڲی گۆنَشدن اۏلان بیر قادېن.
سئودی دئیه‌جکسن،
اوشاق کیمی سئودی، آنا کیمی سئودی،
یار کیمی سئودی، یارادان کیمی سئودی دئیه‌جکسن.
ساچ‌لارېنا دن اۏلدوم.
گؤزلرینه‌ دومان کیمی إندی یۏخلوغوم.
قۏرخاق‌لېغېمدا اۆشۆتدۆم جسارَتینی.
بیر قادېن واردې…
گؤز‌لریمه‌ باخا-باخا گئتدی،
إوینی یېخا-یېخا گئتدی،
چېخدې یۏخا گئتدی، دئیه‌جکسن.
یووا اۏلمادېم کیمسه‌سیز‌لیڲینه
دردینه‌ سارېلمادېم،
سئودی، یار اۏلمادېم دئیه‌جکسن.
بیر باشېنا، بیر دیزینه‌ دؤیه‌جکسن…
بیر قادېن واردې، کیشی کیمی سئودی،
من اؤز سئوگیمده‌ کیشی اۏلمادېم دئیه‌جکسن!