سئویم رۏمانېندان بیر پارچا / آیهان میانالې

سئویم رۏمانېندان بیر پارچا / آیهان میانالې

آلچاق دووارلارېن آرخاسېنداکې گیزله‌نن باغ‌لارېن ایچینده اۏلان بۆتۆن اۏلاناق‌لار، گؤزلرین قاماشېندا اؤزلرینی ایشېلدادېردېلار.
ساعات گئجه‌نین یارې‌سېنې گؤرسَتسه’یدی ده، هر شئی آپ-آیدېن گۆن اۏرتا کیمی وار-اۏلان گؤرۆنتۆلری سرگیله‌ییب، گؤزلریمیزین بوجاغېنداکې یاغېشېن هئچ اۏلماسا بیر نئچه دامجې‌سېنې یاغماغا راضېلاشدېرېب، هر شئیی یئنی‌دن قالدېرماغا باشلامېشدې.
هر گئجه هامې یاتاندان سۏنرا، چایلاغېن دردلرینی داشېیان داش‌لارېن سسینی إشیتمک اۆچۆن، قارا پالتارلارېنې گئیینیب کندین کۆچه‌لرینده دۏلاشماغا باشلایاردې. اۏنو ایتیرن آخشامدان بری، آرتېق گئجه‌لرین یوخوسونا حسرت قالېب، بو داش‌لارې بیر-به-بیر دینله‌ییب، ایچینده‌کی بۏغولموش دیلک‌لرینی دووارلارداکې چایلاق داش‌لارې‌نېن قولاق‌لارېنا پېچېلدایاردې.
هر زامان اۏنو چایلاغېن یالېن ساحیلینده گؤرمک اۏلاردې. پایېزېن سۏن گۆن‌لرینه یاراشان سۏیوق هاوادا گۆن‌اۏرتادان سۏنرا جان‌سېز گۆنَشین ایزینتی‌سینده آیاق‌لارېنې چایلاغېن بوزلو سویوندا ایسلادېب، یئریدیکجه‌ سویون سۏیوقلوغونو اۏلدوقجا حیسّ إدیب ایچیندن درین بیر آهې، اۆره‌ڲینه باتان اۏخ کیمی هاوادا سَسلَندیرَردی، سۏنراسې تؤوشه‌یه-تؤوشه‌یه ساحیله قایېدېب سۏیوقدان دری‌سی گیزیلده‌یه‌رَک، قومسال‌لاردا اۏتوروب، یئنی‌دن ایچینده‌کی کَدَرلرینه دالماغا باشلایاردې.
آخشام چاغې چۏبان‌لار داوارلارې قایتاراندا، چایلاغېن قېراغېندا اۏنلارې سووارماق اۆچۆن بیر ساعات‌لېق دینج‌لرینی آلېب، سۏنراسې کنده سارې یۏلا دۆشرلر. هر آخشام سۆرۆنۆن اؤنۆنده گئدن ایتی، چایلاغېن قېراغېندا، اۏنون یان-یؤوره‌سینده سۆمسۆنۆب، دیل‌سېزلیک’له اۏنا بیر سؤزلر آنلاتماغا چالېشار.
کندین بۆتۆن خالقې ایل‌لر دیر کی اۏنون گل-گئدینی أزبرله‌ییبلر. هر کنده دؤندۆڲۆنده، ݝریبه بیر حال-أحوال ایله اۏنا سلام سؤیله‌ییب، سایقېلایارلار. گئدندن سۏنرا دا باش‌لارېنې تۏولایېب، ایچدن درین بیر آه چکرلر.
اۏنون یاشامېنې آنلاتماق اۆچۆن، اوزون بیر یۏلون گزی‌سینه چېخماق گره‌کیر. بعضن بئله دۆشۆنۆرم کی، هر شئی اینسانېن ایستک‌لری‌نین لاپ ترسه یؤنۆنده آیارلانېر. بو آیارلانماغېن قایناغې‌نېن هاردان باش آلېب اۏلاناقلې اۏلدوغونو، هئچ بیر زامان باشا دۆشمه‌دیم. شۆبهه دۏلوسو بیر یاشامېن گؤزلرینده اؤرتۆ-باسدېر اۏلماق دا اینسانا هئچ خۏش بیر حیس یارادا بیلمیر.

بونلارې دیل اوجوندا سایاقلایان یازار، هر شئی‌دن اینجیکلی بیر اینسان کیمی، گؤزلرینی قاپادېب، اۆره‌ڲیندن گلن نه اۏلوردو، دیلی‌نین اوجوندا اوچوشدورماغا چالېشېردې.
بو قۏنویا هر باخدېغېمدا، اۏ یازېق ننه‌سی اؤلمۆش یازارا اۆره‌ڲیم یانېردې. کاف گئتمیش بیر دۆنیانېن یالان وارلېغېنا راست گلمیش بیری‌سینه اۏخشایېردې. إله اۆستۆ-باشېندان هر دانېشدېغېندا کدر ایله آغېر بیر دردین شله‌سی یاغېردې.
إله بیل چۏخ دانېشېب، اۏخوجولارېن گؤزل واختېنې آلدېم. بو حئساب ایله من سسیمی کسیرم، سیز ایسه بو اۏلای‌لارې یازارېن اؤز دیلیندن اۏخویون!