یئنی یازې‌لار / Yeni Yazılar
آنا صفحه Ana Səhifə / آیهان میانالې / سئویم رۏمانېندان بیر پارچا (2) / آیهان میانالې

سئویم رۏمانېندان بیر پارچا (2) / آیهان میانالې

Sevim romanından bir parça (2) - Ayhan Miyanalı -YniQapi.com--
سئویم رۏمانېندان بیر پارچا (2) / آیهان میانالې

-سلام خالا! منم آیهان….
سؤزۆمۆ کسیب دئدی:
-خالان سنه قوربان، گل ایچه‌ری، خۏش گلیبسن.
قاپې‌نېن گیریشیندن کئچیب، چمدانېمې اۏ تزه مۆزاییک اۏلونموش حَیَطین جانېندا یۆرۆتمه‌ڲه چالېشدېم. چمدانېن تَڲَرلری إله های-کۆی سالمېشدې گل گؤره‌سَن…!
آلمینییۏمدان اۏلان گیریش قاپې‌یا چاتېب، ألیمی اوزالدېب قاپېنې آچدېم. گۆلخانانېن قاباغېندا ایکی نفرلیک مۏبلون اۆستۆنده اۏتوران بتول خالام، منی گؤرجک سئوینیب، سئوینجیندن دئدی:
-خالانېن سارې‌شین بالاسې خۏش گلیبسن؛ نه یاخشې کی یالقېز خالاوا باش ووروبسان، گل ایچه‌ری جانووا قوربان اۏلوم.
چمدانې اۆست قاتا چېخان پیلله‌لرین یانېندا یئره قۏیوب، خالاما سارې گئدیب، اۏنا سارېلدېم.
-منیم گؤزل اۆزلۆ-اۆرَکلی خالام نئجه دیر!!؟
خالام إله آنامېن اییینی وئریردی. اۏنو قَییمجه‌سینه باغرېما باسېب، یانېنداکې بۏش یئرده اۏتوردوم.
یۏلدان تزه یئتیشدیڲیمه گؤره آیاغا قالخېب منه بیر شئی‌لر گتیرسین دئه، مطبخه سارې گئتدی.
بو مطبخ من ایله کیچیک باجېمېن خاطیره‌لر اۏجاغې ایدی. اوشاق‌لېغېمېزېن شیرین ایزگه‌لرینی، إله اۏلدوغو کیمی حیس إده بیلدیریردی. بؤیۆک باجېم أری‌نین خیانتینه گؤره، اؤزۆنۆ اۏد ووروب تبریزین خسته‌خاناسېندا یاتاندا، آنام من ایله کیچیک باجې قارداشېمې خالاما، بؤیۆک باجې-قارداشېمې ایسه بؤیۆک دده‌م گیله تاپشېرېب، تبریزده باجېمېن یانېندا قالېردې.
اۏ گۆن‌لر خالامېن بیزه إتدیڲی محبت، آنامېن بۏشلوغونو دا انوتدورا بیلمشدی.
خالام گلینجه من ده گئدیب أل-آیاغېمې یویوب بیرآز دینجَلدیم. گۆلخانانې ایزله‌یَرکن، خالامېن ألینده مئیوه طاباغې، مطبخدن إشیڲه چېخدې. اۏتوروب بیر نئچه مئیوه سۏیوب یئدیم. خالام إله محبتلی اۆزۆمه باخېردې، سانکی منی نئچه ایلدن سۏنرا تزه‌دن تاپېب.

فتانه کانادادا ایدی، فرامرز’له فاطې دا تئهراندا یاشایاردېلار. ریضا عمی‌اۏغلو اؤلَندن سۏنرا خالامېن یانېندا قالېب اۏنا باش چکن‌لره تکجه حۆسئین ایله فرانک ایدیلر.
خالامېن إوی لاپ بیر نیسگیل دۏغوران إوین اؤز سیمگه‌سی ایدی. کۆبارلېق یالقېزلېقدا گئیینمیش کؤینه‌ڲینی قاپ-باجاسېندا سرگی‌لَییردی.
إشیک پالتارلارېمې دَڲیشیم دئیه چمدانېمې گؤتۆرۆب، پیلله‌لردن یوخارې چېخدېم.
فتانه‌نین اۏتاغې إله کانادایا گئتدیڲی گۆن کیمی تر-تمیز دۆزنلی قالمېشدې. منیم بو خالام هر زامان بئلنچې تمیز بیر قادېن دېر دئییب، چمدانېمې آچېب، إو پالتارلارېمې گئیمه‌ڲه باشلادېم.
یاتاغېن اۆستۆنده اوزانېب، لاپ إله اوشاق‌لېق چاغ‌لارېما دالېب، بیرآن اؤزۆمۆ بو دۆنیادان اۆزۆب، اۏ گؤزل ألوان-بۏیاقلې گۆن‌لریمیزده گؤردۆم.
****

یازار / Yazar : آیهان میانالیAyhan Miyanalı

بو یازېنې دا اۏخویون /Bu Yazını da Oxuyun

اۏ هله دیری دیر! / آیهان میانالې (حیکایه)

اۏ هله دیری دیر! / آیهان میانالې (حیکایه)   “کئچمیشین باغرې چاتلایېر کیتابېندان” کئچن گۆن‌لرین …

Leave a Reply

Your email address will not be published. Required fields are marked *