بوز / اومان میانالې (حیکایه)

بوز / اومان میانالې (حیکایه)

یۏخ! یازماق گرک ایدی. بو سئوگینی هامې بیلمه‌لی ایدی. ایندییه کیمی بئله بیر سئوگی‌نین دۏغولماسېنې کسگین کیمسه گؤرمه‌ییب. حایېف‌ دېر بو سئوگی‌دن کیمسه‌نین خبری اۏلماسېن!
اۏ گلندن، هر شئی دَڲیشمیشدی. بیر گۆن دۆنیانې قاران‌لېق گؤرن شاعیر، ایندی بیر سؤنمز گۆنَشین دۏغدوغونو دویموشدو.
بو سئوگینی یازماق گرک ایدی..
***
اۏ گۆن بیر آز گئج آیېلدې. اۏنو دلیجه سئون آدام یاتاغېندا دَڲیل. هر گۆن اۏنون اؤپۆشۆ ایله آیېلان سئوگیلی، بو گۆن اؤز عاشیقینی یانېندا گؤرمه‌ییب بیر آز دارېخدې دا. «کسگین بیر ایش چېخېب قاباغېنا، بئله دئمه‌میش گئدیب» ـ بئله دۆشۆنۆردۆ. آرخاسې اۆسته چئوریلیب تاوانا گؤزۆن تیکدی. چۏخ موتلو ایدی.
بو قدر سئویله‌جه‌یینی هئچ خیال‌لاریندا دا دوشونمزدی. بو دونیادا بئله یاخشی بیر اینسانین اولدوغونا دا اینانمازدی. گؤردویو اینسان‌لارین آلت قاتیندا یالانچیلیق، ایکی اوزلولوک، اسکیکلیک وار ایدی. آنجاق اونو سئون اینسان بوتون بیریسی ایدی، گئرچکدن سئون بیر اینسان. یالنیز، آرالاریندا بیر سورون وار ایدی، او دا او عاشیقین داها شعر یازماماغی ایدی، بیر گون باشلاییب یازسایدی بو سئوگی داها دا آرتیق گوجله‌نه بیلردی. او شاعیر، داها شعر ایله ماراقلانمیردی، بوتون سئوگیسین او قوردوق‌لاری ائولیلیگه باغیشلاماق ایسته‌ییردی. تئزدن سئوگی ایله اویانیب، سئوگی ایله یاشایاراق سئوگی ایله ده اویویوردولار. بو گون ائولندیکدن سونرا سئوگیسیز باشلایان بیرینجی گون ایدی، اؤپوشسوز بیر گون. « او نه سؤزدو؟ سئوگی اؤپمک دئییل کی، کسین بیر ایش چیخیب قاباغینا» ـ اؤزونه بئله توختاقلیق وئریب، قالخدی یئریندن.
ال ـ اوزونو یودوقدان سونرا ناشتالیق یئمک ایسته‌دی، آنجاق قاباقکی گون‌لرین ترسینه بو گون ناشتالیق حاضیر دئییلدی. اوره‌یی دؤیوندو بیر آن. نییاران قالدی، گؤتوروب زنگ ووردو شاعیر سئوگیلیسینه. موبایلین سسی تختین یانیندان گلدی. اوره‌یی تیتیره‌دی، ـ « نه اولوب گؤره‌سن، نییه دئمه‌میش گئدیب، هارا گئدیب؟!» اؤزو ده بیلمیردی «گئدیب» هاردان گلدی فیکرینه، هئچ زامان گئتمه‌سینه اینانا بیلمزدی. اؤله‌نه کیمی اونسوز بیر یئره گئتمه‌یه‌جه‌یینی سؤز وئرمیشدی. «اؤلنده ده سنله اؤلمک ایستیرم» ـ بو سؤزو ائولیلیک‌لرینین بیرینجی گونونده دئمیشدی.
ایسته‌دی شاعیرین آناسی‌گیله زنگ وورسون، آنجاق بو ایشین چیی فیکیر اولدوغونو دوشونوب ائله ائتمه‌دی. اوزو ایسلاندی، آغزیندا شورلوق دویدو، آغلاییردی. بیلمیردی نه اوچون آما آغلاییردی. بوغازینداکی دویون نفس آلماغینا ایجازه وئرمیردی، باغیردی، هؤنکور ـ هؤنکور آغلادی..
اؤزونه گلندن سونرا ائشییه چیخیب شاعیری آختارماغی دوشوندو. گئیینمک اوچون اوتاغا کئچدی. قاپینی آچدی، اوتاقدا گؤردویو صحنه‌دن یئرینده دونوب قالدی. بیلمه‌دی نه ائتسین. آجیقلی اولسا دا اوره‌یینده موتلولوق دویدو. بایاق، شاعیره گؤره «گئتمک» سؤزونو دوشوندویو اوچون اؤزونو سوچلو گؤروردو. هئچ زامان اونون گئتمه‌سینه اینانا بیلمزدی. اؤزو ده بیلمیردی «گئتمک» هاردان فیکرینه گلدی. شاعیر گئتمه‌میشدی. اوتاقداکی ماسانین آرخاسیندا اوتورموشدو، یازیردی.
شاعیرین ائوده اولماسیندان چوخ، یازماغا قاییتماسینا سئویندی. اونون شعرلرینی چوخ سئوسه ده، چوخدان ایدی یئنی بیر شعر، یئنی بیر یازی اوخومامیشدی اؤز سئوه‌نیندن. سئوگیلیسینین قویوب گئتمه‌سینی آز دا اولسا فیکیرلشدیگی اوچون اؤزونو باغیشلامیردی، ایسته‌دی گئدیب باغرینا باسسین شاعیری. ایندییه کیمی، بو قدر اونو سئودیگینی بیلمیردی. بو سحر یاشادیغی آن‌لار بو سئوگینی اونا آنلاتدی. هه، اونسوز بیرجه آن دا قالا بیلمزدی. شاعیر همیشه بو سؤزو دیلینه گتیرسه ده، او، ایندییه کیمی بو سؤزو دئمه‌میشدی. دئمه‌سه ده بو گون اونو سومویوینن آنلادی.
کئچدی قاباغا، قول‌لارینی سالدی شاعیرین بوینونا، اوزوندن اؤپدو. شاعیر بیر سؤز دئمه‌دی. یازیردی..
بو ایشینه گؤره اؤزونو قینادی، بلکه بو ایشیینن شاعیرین دویغوسونو قاچیرداجاق ایدی. او اؤپوشه گؤره اؤزونو سوچلو بیلدی. اؤز ائولیلیگینه خیانت ائله‌ییب باشقا بیریسی ایله اؤپوشسه‌یدی بئله سوچلو گؤرمزدی اؤزون. اؤپولدویو اوچون دئییل، اؤپدویو اوچون سوچلو گؤروردو اؤزون.
اوتاقدان ائشییه چیخیب، ناشتالیق حاضیرلاماغی دوشوندو. بیرینجی دفعه اوچون بو ایشی گؤروردو. گئدیب تزه چؤرک آلدی. ائوه قاییتدیق دا اؤزو ایسته‌مه‌سه ده اوتاغین قاپیسین آچدی، شاعیر هله ده ماسانین آرخاسیندا اوتورموشدو، باشی آشاغی یازیردی. قاپینی یاواشجادان اؤرتوب ناشتالیق حاضیرلاماغا دؤندو.
هر نه‌یی، یئمک ماساسینین اوستونه دوزوب ایکی ایسته‌کان چای دا سوزدو. قاپینی آچیب سئوگیلیسین چاغیردی. ـ «اوره‌ییم! گل بیر شئی یئ سونرا گئدیب یازارسان». بیر سس چیخمادی شاعیردن. قاییدیب اوتوردو سوفرانین باشیندا. بیر آز گؤزله‌دیکدن سونرا الین سوفرایا آپاردی. بیر تیکه چؤرک گؤتوروب، اوستونه، آلدیغی قایماقدان یاخدی. یئدی، چای دا ایچدی.
گئجیکمیشدی، ایش یئرینه گئتمه‌لییدی. دونن دانیشدیغی پروژه‌نین یئرینه باخماق اوچون گئده‌جک ایدی. دوققوز قاتلی بیر تیکینتی. بو، اونون اوجا یئرلره چاتماغی اوچون بیرینجی آددیم ایدی. بو آددیمی باشاری ایله آتسایدی گلن آددیم‌لار چوخ راحات اولا بیلردی.
ناشتالیق یئیندن سونرا اوتاغین قاپیسین سسسیزجه آچیب پالتارلارینی گئیمک اوچون اوتاغا گیردی. گئییندی ده، اوتاقدان چیخاندا پیچیلداییب «نفسیم! ناشتالیق حاضیردی، یازینی قورتاراندان سونرا گئدیب یئیرسن» ـ دئدی. اوره‌یینده «سنی سئویرم» ده دئدی، آما دیله گتیرمه‌یی سوچ بیلدی..
***
او یازی بئله تئز قورتارمازدی، او ایکی ایللیک سئوگینی یوز ایل ده یازسایدین قورتارمازدی. او سئوگینین هر دیقه‌سین آنلاتماق اوچون نئچه ایل دانیشماق گرک ایدی. بو ایشی او شاعیر باشاردی، او گوجلو بیر یازیچی ایدی.
گئجه‌یاری آییلیب یازماغا باشلایاندا، ایسته‌ییردی سحر آچیلانا کیمی یازیب، یازی‌لارینی ناشتالیق یئینده سئوگیلیسنه پای وئرسین.
قاپینی آچیب ائشییه چیخدی. سئوگیلیسینی اویاق گؤردوکده دیسکینیب یئرینده دوردو. اؤزونو سوچلو گؤروردو، بو گون اونو اؤپوب اویاتمامیشدی..
سئوگیلیسی یئمک ماساسینین آرخاسیندا اوتورموشدو. تزه چؤرک ده آلمیشدی، چای دا دمله‌میشدی. دئیه‌سن یازماسی بیرآز چوخ چکمیشدی. «نه‌دن گلیب منی چاغیرماییب» ـ دوشوندو. سونرا گئتدی سئوگیلیسینه ساری. اییلیب اوزوندن اؤپدو. سئوگیلیسینین اوزو بوم ـ بوز ایدی. دوداق‌لاری بوز باغلادی. دوداغینین بوزو گئنیشله‌نیب اوزونون هر یئرین ساردی، اوزوندن کئچیب بدنینین هر یئرین بورودو..
ماسانین اوستونده ایکی دنه قورویوب داشا دؤنموش داستانا، چایی ایچیلمه‌میش قورتاران ایکی ایسته‌کان دا چای وار ایدی…

02/03/2021