یئنی یازې‌لار / Yeni Yazılar

ایکی اؤلۆ / زیبا غیور (حیکایه)

Screenshot_2023-12-16-14-34-34-548_com.camerasideas.instashot-edit
ایکی اؤلۆ / زیبا غیور (حیکایه)

مئیدانېن قېراغېندا بیر نفری یئره اوزالتمېشدېلار، گؤڲ لی شالوار، قارا کاپشئن ایله هئیکَلیندن گنج اولدوغو بس بللی ایدی، اۏردا بیر نئچه پۏلیس وار، دیققت’له باخېب دریندن آه چکدیم، شۏفئر اؤزو-اؤزۆنه نَم‌نه دئدی، هئچ باش تاپمادېم.

دئدیم:
-اؤلمۆشدۆمۆ؟
دئدی:
-هن.
ایلک دؤنه ایدی بئله بیر صحنه گؤرۆردۆم، دویقولارېم’سا قارېشېق ایدی. بیر یاندان اؤلۆب، بو جهنّم‌دن راحاتلاشدې، بیر یاندان ایسه اۏنو سئون‌لری، گؤزۆ یۏلدا اۏلان‌لارې نه حالا قالاجاقلار؟!
گؤره‌سن بالاجا قېزې یۏخسا اۏغلو وارېیدې‌مې؟
شۏفئر دئدی:
-من بیر دؤنه بؤیۆک ماشېن’لا بیرینه ووردوم.
دئدیم:
-بلی؟!
دئدی:
-بؤیۆک ماشېن’لا ووردوم بیرینه، آمبولانسېن گلمه‌سینه دؤزه بیلمه‌ییب، اۏنو تئز گؤتۆردۆم خسته‌خانایا، تصادۆف اۏلماسېنې گؤرۆب، پۏلیسی چاغېردېلار. پۏلیس گلیب دئدی:
-اۏنو اؤزۆن گتیردیڲین اۆچۆن، بیمه بو دوروما توتمور!
سوسدو، سوسدوم، نئچه ثانیه سۏنرا
دئدیم:
-اؤلمۆشدۆ؟
دئدی:
-هن! یۏلدا اؤلدۆ، أح…

ماشېنېن رنگی ده شۆشه‌لری ده، شۏفئرین پالتارلارې دا قارا ایدی، تکجه گۆزگۆدن آسلانان گۆمۆش اۆزۆک پارېلدایېردې، قالان هرنه قارا ایدی، هاوا دا آلتې اۏلمازدان قارالماغا باشلامېشدې.
دئدیم:
-دییه وئردیز؟
آه چکیب بیر اؤزۆنده ترپه‌نیب دئدی:
-هــه. ایسکانیام وار ایدی، من هارا، ایسنپ شۏفئری اۏلماق هارا! سحردن آخشاما مۆسافیرکئش‌لیک إله‌ییرم، أعصابېمدا یئتیرمیر، آما… أح…

چیڲین‌لریمی بۆکۆب، بیر یئره یېغېشېب، پنجره‌نین گوشه‌سین‌دن  إشیڲه باخدېم.
نَفَسیمین سسی، قولاق‌لارېمې دلیردی. سس‌سیز اۏلماغا چالېشدېم، آما بیر سؤز دئییب اۏ آدام’لا اۆرَک‌بیرلیڲی قورمام لازېم ایدی، سوس گلدی ایچیمدن و سوسدوم.

-خانېم سیقار اینجیتمَز بیله‌زی؟
-بلی؟
دئدیڲی بۆتۆن سؤزلری ایلک دؤنه إشیتدیڲیمه باخمایاراق، إشیتمه‌میش کیمی ایدیم؛ بیر داها دئمه‌سینی ایسترکن یانېتا حاضېرلانېردېم، بو دا پیسکۏلۏق اۏلماغېن وئردیڲی تؤحفه اۏلسون گَرَک.
پاکاتدان سقارې چیخاردېب دئدی:
-سیقار اینجیتمَز بیله‌زی؟

اؤزۆم ده چَکمه‌سَم، یۏخ دئدیم. اوزالتدې پاکاتې، اوزالتدېم ألیمی، فندک؟ واردې!

سیقارېن تۆستۆسۆ بهانه‌سی’له ایچینده‌کی آه‌لارې بۏشالدېردې پنجره‌دن هاوایا آه…

یازار / Yazar : آیهان میانالیAyhan Miyanalı

بو یازېنې دا اۏخویون /Bu Yazını da Oxuyun

یانېت‌سېز سۏرغولار / فائضه بزرگان (حیکایه)

یانېت‌سېز سۏرغولار / فائضه بزرگان (حیکایه)   سَس‌لَندیرَن: آیهان میانالې   گؤزلریمی آچېب گئجه گؤردۆڲۆم …

Leave a Reply

Your email address will not be published. Required fields are marked *