یئنی یازې‌لار / Yeni Yazılar

دَلی کیم دیر؟! / رسول قدیری (حیکایه)

Screenshot_2024-01-16-21-45-31-488_com.camerasideas.instashot-edit
دَلی کیم دیر؟! / رسول قدیری (حیکایه)

طیبّ باجې‌سې اۆچ دَنه‌ حب ایله‌ بیر بارداق سو اۏنا طرف اوزالدېب دئدی:
– حَب‌لری‌نین واختې دېر. آل بونلارې اود.
– نه‌دن بونلارې اودمالې‌یام؟! من خسته‌ فیلان دَڲیلم.
– خسته‌ اۏلماسایدېن بورا گتیرمزدیلر. جیسمین ساغلام اۏلسا دا روحون خسته‌ دیر. سن دلی‌سن!
– من دَلی دَڲیلم. منی بورا گتیرَنلر دَلی دیر‌لر.
طیبّ باجې‌سې اوجا سَس’له‌ گۆلۆب دئدی:
– دَلی اۏلماسایدېن نییه‌ سنی بورا گتیریردیلـر؟! سن ده‌ بوراداکې‌لارېن هامې‌سېنا تای دلی‌سن. یۏخ’سا هئچ بیرینیزی بورا گتیرمزدیلر.
– بیز دَلی دَڲیلیک، تکجه‌ آزېن‌لېقدایېق. سیز چۏخونلوق‌دا اۏلدوغونوزا گؤره‌ بیزه‌ گۆج گلیر‌سینیز.
– بۏش-بۏش دانېشما! آل خۏش‌دیللی‌لیک’له حَب‌لرینی اود.
– اودمایاجاغام. اودماسام نه‌ إده‌جکسن؟
طیبّ باجې‌سې بؤلمه‌نین ایشچی‌لرینی یاردېما چاغېردې. ایشاره‌سی ایله‌ اۏنلاردان ایکی‌سی اۏنون أل‌لرینی، بیری ده‌ آیاق‌لارېنې برک توتدو. طیبّ باجې‌سې اؤزۆ ایسه زۏر’لا اۏنون آغزېنې آچدېرېب حَب‌لری آغزېنا اؤتۆردۆ. اۆستۆند‌ن ده‌ سو بارداغې‌نېن بۆتۆن سویونو آغزېنا بۏشالتدې. سویون یارې‌سېندان چۏخو اۏنون اۆزۆ ایله‌ سینه‌سینه‌ تؤکۆلمۆش اۏلسا دا آغزېنا آخېدېلان سو، حَب‌لری اۏنا اوددورماغا یئتر‌لی اۏلدو. طیبّ باجې‌سې‌نېن دۏداغېنا، گؤره‌وینی تاماملادېغېندان آرخایېن اۏلدوغو اۆچۆن اودوش گۆلۆمسه‌مه‌سی قۏندو. ایشچی‌لره اۏنون أل-آیاغېنې اؤتۆرمه‌لرینی أمر إتدی. اۏنلار طیبّ باجې‌سې ایله‌ بیرلیکده‌ گئری قایېتدېلار. اۏتاقدان چېخا-چېخدا آرخادان طیبّ باجې‌سېنې چاغېرېب دئدی:
– حَب‌لری منه‌ اوددوردون. آنجاق بیرجه‌ آن تک‌لیڲینده دۆشۆن. کیمین دَلی اۏلدوغونو، دلیجه‌سینه‌ داوراندېغېنې دۆشۆن…

۱۱-یانوار-۲۰۲۴

یازار / Yazar : آیهان میانالیAyhan Miyanalı

بو یازېنې دا اۏخویون /Bu Yazını da Oxuyun

بۏش كۏمۏد / حسن ثمودی قلعه‌لر (حیکایه)

بۏش كۏمۏد / حسن ثمودی قلعه‌لر (حیکایه) لئيلا محمده دئدیم: «گئدَك مشهده، هاوامېز دَڲیشيلسين؛ يایېن …

Leave a Reply

Your email address will not be published. Required fields are marked *