یئنی یازې‌لار / Yeni Yazılar

یالقېز إو / سحر روحی (حیکایه)

Yalqız ev - Səhər Ruhi - YeniQapi.com-
یالقېز إو / سحر روحی (حیکایه)

قلیان تۆستۆسۆ بۆتۆن قفه‌نی گؤتۆرمۆشدۆ. سسین چۏخلوغوندان آغېز دئیه‌نی قولاق إشیتمیردی. اسماعیل عمی بیر یاغلې قاراقورا دستمالې چیڲنینه سالېب بۆتۆن ماسالارې بیر به بیر دۏلانېب، قلیان باش‌لارېنا باخېردې.

قاپې بیردن آچېلیب، إشیڲین شاختاسې باسېر ایچه‌ری. یاشلې آدام أڲنینده بیر قارا اوزون پالتۏ، باشېندا ایسه پاپاغې’یلا ایچه‌ری گیریر.

+اسماعیل عمی: اؤرت کیشی، تئز اؤرت دۏندوق. اؤزۆن ده کئچ گل قېزېش.
– حاج منصور: سلام کیشی یۏرولما. هه دۏغرودان شاختا کسیر. زحمت اۏلماسا منه بیر ایستی چای گتیر.

اسماعیل عمی مطبخه کئچیب، قاینایان سویونون شاققېلتې سسی مطبخی باشېنا گؤتۆرمۆش سارې سماوریندن، حاج منصورا بیر چای تؤکۆر.
اۏنون ماساسېنا کئچیب، اینجه بئل ایستیکانې قۏیور ماسا اۆستۆنه. گؤزلرینی دۏستونون گؤزلرینه تیکه‌رَک دئییر:
نییه پؤرتۆبسن حاجې؟ چۏخ فیکره گئدیبسن.
حاج منصور درین بیر آه چکه‌رَک، آغ قاش‌لارېنې دۆزلدیب دئییر:
قارداشېم قېزې‌نېن صاباح سؤز دانېشماسې دېر.
اسماعیل عمی: به‌به چۏخ مۆبارک دیر، بو کی خئییر ایش دیر، لاپ دا گؤزل بیر خبر دیر.
حاج منصور: قېزېن ۱۳ یاشې وار.
اسماعیل عمی بیرآز تومور، بیردن اؤزۆنه گلیب، دئییر:
– آخې کبینینی کسرلر حاجې؟؟؟
حاج منصور: قالېب هانسې دفترخانا اۏلا. من دئییرم قارداش گۆناه دېر، ظۆلۆم دیر. قېیما اوشاغېوا. دئییر تبریز کیمی یئرده قېز ساخلاماق چتین دیر، قۏی گئتسین، باشې اۆسته بیری‌سی اۏلسون. چؤره‌ڲینی راحاتجاسېنا یئسین.

اسماعیل عمی باشېنې چئویریب شۆشه‌دن خیابانا باخېب، بیر نئچه ثانیه سۏنرا قۏل‌لارېنې قوجاقلایېب دئییر:
بیر سؤز دئمَک اۏلماز. دۆز دئییر، زمانه خاراب دېر، آللاه خۏشبخت إله‌سین.

پامادۏر نایلۏنو آغېرلېقدان بارمارق‌لارېنې کسمیشدی، بیر طرفدن ده هاوانېن سۏیوقلوغو أل‌لرینی کیریتمیشدی. آچارې سالېب قاپېنې آچماغا أل‌لری توتموردو.
قاپېنې آچېب، پيلله‌لری بیر-بیر یئنیر حَیَطه.
أزبردن و فیکری اؤزۆنده اۏلمازدان گیریر مطبخه. بوز دۏلابېنې آچېب، گؤزۆ ساتاشېر خاراب اۏلان پامادۏرلارا. بیر ده ألینده‌کی‌لره باخېب دئییر:
نيیه آلېرام، هئچ بیلمیرم! دئیه‌سن پیشیره‌نیم قالېب باشېنا.
قازېن اۆستۆنده‌کی قابلامانې گؤرۆب، قېزې‌نېن اۏنا یئمک گتیردیڲينی باشا دۆشۆر.
قابلامانېن قاپاغېنې گؤتۆرۆب، یئمه‌ڲین دۏلما اۏدوغونو گؤرۆر.
قابلامانېن ایچینه باخا-باخا دئییر:
– نه ده گؤزل بونلارې اینجه-اینجه سارېب. رحمت‌لیک آناسې کیمی سلیقه‌لی دیر. ۱۵ یاشېنداکې اوشاق ألبته کی إله دۏلما سارماغې گؤزلجه باشارار، نه اوشاق دۏغماغې!

حاج منصور ۲۵ یاشېندا یاشام یۏلداشې ایله إولَنیب، اۏ رحمت‌لیک ۱۵ یاشېندا قېزېنې دۏغاندا دۆنیاسېنې دَڲیشمیشدی. بو اۏلایدان دۏلایې حاج منصور هر زامان اؤزۆنۆ بو حاقدا سوچلو گؤرَردی و اؤز فیکرینده اؤزۆنۆ جزالاندېرماق اۆچۆن هَمَشه یالقېز قالماغې سئچمیشدی.

یازار / Yazar : آیهان میانالیAyhan Miyanalı

بو یازېنې دا اۏخویون /Bu Yazını da Oxuyun

یانېت‌سېز سۏرغولار / فائضه بزرگان (حیکایه)

یانېت‌سېز سۏرغولار / فائضه بزرگان (حیکایه)   سَس‌لَندیرَن: آیهان میانالې   گؤزلریمی آچېب گئجه گؤردۆڲۆم …

Leave a Reply

Your email address will not be published. Required fields are marked *